ފިކުރެއްގެ ދިރުން ޕާޓީ އުފައްދަން މިއަދު އީސީއަށް ހުށަހަޅަނީ

ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެމްޑީޕީ ތެރޭ އުފެއްދެވި "ފިކުރެއްގެ ދިރުން" ފެކްޝަންގެ މެންބަރުން އެ ޕާޓީން ވަކިވުމަށް ފަހު އުފައްދާ އާ ޕާޓީ މިއަދު ރަޖިސްޓްރީކުރަން އިލެކްޝަންސް ކޮމިޝަން (އީސީ) އަށް ހުށަހަޅަން ނިންމައިފި އެވެ.

ނަޝީދު ފިޔަވައި، ފިކުރެއްގެ ދިރުމަށް ނިސްބަތްވާ އެމްޑީޕީގެ 12 މެންބަރަކު އެ ޕާޓީން ވަކިވީ މިދިޔަ ބުދަ ދުވަހު އެވެ. އެ 12 މެންބަރުންގެ އިތުރުން ނަޝީދަށް ތާއީދު ކުރައްވާ އެމްޑީޕީގެ ބައެއް އާންމު މެންބަރުން ވެސް އެ ދުވަހު އެމްޑީޕީން ވަކިވި އެވެ.

އާ ޕާޓީގެ ސްޕޯކްސްޕާސަން އަފްޝަން ލަތީފް މިއަދު ވިދާޅުވީ ސިޔާސީ ޕާޓީ އުފެއްދުމުގެ ހުއްދައަށް އެދި ފޯމު ހުށަހަޅަން މިއަދު އީސީއަށް ވަޑައިގަތުމަށް ހަމަޖައްސާފައިވާ ކަމަށެވެ. އެ ޕާޓީގެ ރަސްމީ ނަން އިއުލާންކުރައްވާނީ ރަޖިސްޓްރީކުރަން ހުށަހެޅުމަށް ފަހު ކަމަށް ވިދާޅުވި އެވެ.

"ރަޖިސްޓްރޭޝަނަށް ހުށަހެޅުމަށް ފަހު ނަން ހިއްސާކުރާނެ،" އަފްޝަން ވިދާޅުވި އެވެ.

އީސީއަށް ފޯމު ހުށަހެޅުމަށް ފަހު ބާއްވާ ނޫސްވެރިންގެ ބައްދަލުވުމުގައި ޕާޓީއާ ގުޅޭ އިތުރު ތަފްސީލް ދޭގޮތަށް ވަނީ ހަމަޖައްސައިފަ އެވެ.

ފިކުރެއްގެ ދިރުންގެ ފަރާތުން އެންމެ ފަހުން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މަޖިލީހުގެ ނައިބު ރައީސް އަދި ގަލޮޅު އުތުރު ދާއިރާގެ މެންބަރު އީވާ އަބްދުﷲ ވިދާޅުވި ގޮތުގައި އެ ޕާޓީ އުފެއްދެވުމުން ގިނަ އަދަދެއްގެ މެންބަރުން އެ ޕާޓީ އާ ގުޅިވަޑައިގަންނަވާނެ އެވެ.

ފިކުރެއްގެ ދިރުންގެ ފަރާތުން ރިޔާސީ ކެންޑިޑޭޓެއް ވެސް ނެރޭނެ ކަމަށް އީވާ ވިދާޅުވި އެވެ.

އެމްޑީޕީން ވަކިވެ އާ ޕާޓީއެއް އުފައްދަނީ، އެ މެމްބަރުން ވިދާޅުވެފައިވާ ގޮތުގައި، އެމްޑީޕީގެ އަސާސްތަކާއި ޑިމޮކްރެޓިކް ހަމަތަކުން ބޭރުވެ ޕާޓީ ހައިޖެކްކޮށްގެން ހިންގާތީ އެވެ.

އެމްޑީޕީގެ ރައީސްގެ މަގާމުގައި ހުންނެވި ނަމަވެސް ނަޝީދު ގެންދަވަނީ ފިކުރެއްގެ ދިރުން ހަރަކާތްތައް އެމަނިކުފާނުގެ ރަސްމީ ޓުވީޓާ އެކައުންޓުން ރީޓުވީޓް ކުރައްވަމުންނެވެ.

އެހެން ނަމަވެސް އެމްޑީޕީން ނިންމާފައި ވަނީ މި ވަގުތަށް އެމަނިކުފާނަށް އެއްވެސް ފިޔަވަޅެއް ނާޅައި ޕާޓީގައި ބެހެއްޓެވުމަށެވެ.