އެމްޑީޕީގެ މައި ހަރުގެ ހުސްކުރަން ދިން ނޯޓިސް ހަމަވުމުން އެހެން ބަޔަކަށް ކުއްޔަށް ދީފި

މާލޭގެ އާޓިފިޝަލް ބީޗު ސަރަހައްދު ކުރިމަތީގައި ހުންނަ އެމްޑީޕީގެ މައި ހަރުގެ ހުރި ބިން ހުސްކުރަން ދިން ނޯޓިސްގެ މުއްދަތު ހަމަވުމުން ވެރިފަރާތުން، އެހެން ބަޔަކަށް ކުއްޔަށް ދީފި އެވެ.

ގިނަ ބަޔަކަށް އެއްވެ ސިޔާސީ ހަރަކާތް ހިންގޭ ގޮތަށް، އެމްޑީޕީގެ ހަރުގެ އާޓިފިޝަލްބީޗާ ކައިރީގައި ހިންގަން ފެށީ، ކުރީގެ ރައީސް އަބްދުﷲ ޔާމީންގެ ވެރިކަމުގައި ސިޔާސީ ކަންކަން އެންމެ ހަލަބޮލިވި ދުވަސްވަރެވެ. އެމްޑީޕީ ހަރުގެ ހަދާފައި ވަނީ އެ ޕާޓީގެ ހަރަކާތްތަކުގެ ކުރީ ސަފުގައި އުޅުނު، ޝަފިއްޔާ ޒުބައިރުގެ ބިމެއްގަ އެވެ.

ޝަފިއްޔާގެ ވަކީލް، ހަމްޒާ ހަލީލް މިއަދު "މިހާރު"އަށް ވިދާޅުވީ އެމްޑީޕީގެ ހަރުގެ ހިންގާ ބިން ހުސްކުރަން ދިން މުއްދަތު މިދިޔަ ހަފުތާގައި ހަމަވެފައިވާ ކަމަށެވެ. އެ މުއްދަތު ހަމަވުމާ ހަމައަށް، އެތަން ބޭނުންވެގެން ޝައުގުވެރިކަން ފާޅުކޮށް އެއްބަސްވުމަށް ބަދަލު ގެނެސްފައި ނުވާ ކަމަށް ވިދާޅުވި އެވެ.

އެކަމަކު ފުރަތަމަ ނޯޓިސްއާ އެކު، ރިޔާސީ އިންތިހާބު ކުރިއަށް އޮތުމާއި އިތުރު ތަނެއް ނެތް ކަން އަނގަބަހުން މުއާމަލާތް ހިނގި ނަމަވެސް ފަހުން އެކަމުގައި ގޮތެއް ނުނިމޭ ކަމަށް ހަމްޒާ ވިދާޅުވި އެވެ. ގޭގެ ވެރިފަރާތުން ބިން ބޭނުންވާތީ، ނޯޓިސް ދިނުމަށް ފަހު ތަނާ ހަވާލުވެފައިވާ ކަމަށް އޭނާ ވިދާޅުވި އެވެ.

"ބިމުގެ ވެރިފަރާތުން މިހާރު ވަނީ އެތަން އެހެން ފަރާތަކަށް ކުއްޔަށް ދޫކޮށްފައި،" ހަމްޒާ ވިދާޅުވި އެވެ.

އެންމެ ފުރަތަމަ އެމްޑީޕީއަށް ހަރުގެ ހުސްކުރަން ނޯޓިސްދިނީ އެ ބިން ތަރައްގީކުރަން ވެރިފަރާތުން ބޭނުންވެގެންނެވެ.

އެ ގޭގެ ވެރިފަރާތް، ޝަފީއާ ޒުބެއިރު އަންނަނީ އެމްޑީޕީގެ ހިޔާލުތަފާތުވުމުގައި، "ފިކުރެއްގެ ދިރުން" ފެކްޝަންގައި އިސްކޮށް ހަރަކާތްތެރިވަމުންނެވެ.

އެމްޑީޕީން ބުނެފައި ވަނީ ހަރުގެ ހުސްނުކޮށް ހުރީ އެތަން ބަދަލުކުރާނެ އިތުރު ތަނެއް އަދި ނުލިބިގެން ކަމަށެވެ. ތަނެއް ލިބެންދެން އެތަނުގައި ތިބެވޭނެ ގޮތް ހަދައިދޭން ގޭގެ ވެރިފަރާތުގައި އެދުނު ކަމަށް އެ ޕާޓީން ބުންޏެވެ.

އެ ޕާޓީން ބުނި ގޮތުގައި، އެ ބިމުގައި ހަރުގެ ހިންގަން ދިން އެއްބަސްވުމުގެ މުއްދަތު ހަމަވެފައި ވިޔަސް، އެތަން ހުސްކުރަން ވެރިފަރާތުން އެންގީ ސެޕްޓެމްބަރު 9 ގައި ބާއްވާ މި އަހަރުގެ ރިޔާސީ އިންތިހާބު ނިމެންދެން އެތަނުގައި ތިބެވޭނެ ކަމަށް ބުނުމަށް ފަހު އެވެ.