ކެޔޮދޫ މިސްކިތަށް ގެއްލުންދިން މީހާ ޝަރީއަތް ނިމެންދެން ބަންދު

ވ. ކެޔޮދޫގެ މިސްކިތަށް ގެއްލުން ދިން މައްސަލައިގައި ހައްޔަރުކުރި މީހާ ޝަރީއަތް ނިންމެންދެން ބަންދު ކުރުމަށް ކޯޓުން އަމުރުކޮށްފި އެވެ.

ފެލިދޫ މެޖިސްޓްރޭޓް ކޯޓުން އިއްޔެ ނެރުނު މި އަމުރަށް ފަހު އެ މީހާ މިހާރު ވަނީ އދ. މަހިބަދޫގެ ފުލުހުންގެ މަރުކަޒަށް ގެންގޮސް އެތަނުގައި ބަންދުކޮށްފަ އެވެ.

މަހިބަދޫ ފުލުހުންގެ ކަސްޓޯޑިއަލް އަށް އޭނާ ފޮނުވާލީ ދިގު މުއްދަތަށް މީހުން ބަންދުކޮށްފައި ބައިތިއްބަން އެކަށީގެންވާ ގޮތަށް ވ. އަތޮޅުގައި އެ ނޫން ތަނެއް މިވަގުތު ނެތުމުންނެވެ. ފެލިދޫ ފުލުހުންގެ އިދާރާގައި ހުރި ދެ ގޮޅި އަކީ މީހުން ބަންދުކުރަން އެކަށީގެންވާ ހާލަތުގައި ހުރި ތަންތަން ނޫން ކަމަށް އެޗްއާރްސީއެމް އިން ވަނީ ނިންމައިފަ އެވެ.

މިދިޔަ ހޯދަ ދުވަހުގެ ރޭ 11:50 ހާ އިރު ކެޔޮދޫގެ މިސްކިތުގެ މައި ދޮރުގެ ބިއްލޫރިގަނޑު ތަޅާލި މައްސަލަގައި ހައްޔަރުކޮށްފައިވަނީ އުމުރުން 27 އަހަރުގެ ދިވެއްސެކެވެ.

މިސްކިތަށް ގެއްލުން ދިނުމުގެ އިތުރުން ދެ ފަހަރެއްގެ މަތިން އެރަށުގެ މިސްކިތުގެ ހަތިމުތައް ވީދި މައްސަލައެއް ވެސް ވަނީ ފެންމަތިވެފަ އެވެ.

ހަތިމުތަކެއް ވީދާލައިގެން އެންމެ ފުރަތަމަ ކައުންސިލަށް ރިޕޯޓްކުރީ މިދިޔަ އަހަރު އޮކްޓޯބަރު މަހު އެވެ. އެ ފަހަރު 10 ހަތިމު ވީދާލައިފައި އޮތެވެ. އޭގެ ފަހުން މިދިޔަ ހޮނިހިރު ދުވަހު އިތުރު 20 ހަތިމު ވީދާލައިފައި އޮތް ކަމަށް އެ ރަށު ކައުންސިލުން ބުނެ އެވެ.