ޖިނާއީ މައްސަލަތަކުގައި ހެކިބަސް ދޭން ދެކޮޅު ހަދާ މީހުން ވަގުތުން ޖަލަށްލެވޭ ގޮތަށް ހަދައިފި

ޖިނާއީ މައްސަލަތަކުގައި ހެކިބަސް ދޭން ދެކޮޅު ހަދާ މީހުން ގިނަވެގެން ތިން މަހަށް ޖަލަށްލުން ނުވަތަ ގޭ ބަންދުކުރަން ވަގުތުން ހުކުމް ކުރެވޭ ގޮތަށް ސުޕްރީމް ކޯޓުން މިއަދު ހަމަޖައްސައިފި އެވެ.

މިއަހަރު އަމަލުކުރަން ފެށި ހެއްކާބެހޭ އާ ގާނޫނު އޮންނަ ގޮތުން ހެކިބަސް ދޭން ލާޒިމް ކުރުވުމުގެ ބާރު އޮވެ އެވެ. އެ ގާނޫނުގެ ދަށުން ހެކިބަސް ދޭން އެންގުމާ ބެހޭގޮތުން ހަދަންޖެހޭ ގަވާއިދުތައް ހެދުމުގެ ބާރު އޮންނަނީ ސުޕްރީމް ކޯޓަށެވެ. މިއީ ރާއްޖޭގައި ހެކިބަސް ނުދޭ މީހުންނަށް ފިޔަވަޅު އަޅަން ފެށި ފުރަތަމަ ފަހަރެވެ.

ސުޕްރީމް ކޯޓުން މިއަދު ހަދައި، އަމަލުކުރަން ފެށި ހެއްކާބެހޭ ގަވާއިދު އޮތްގޮތުން ހާޒިރު ކުރެވޭ ހެއްކަކު ހެކިބަސް ދޭން ދެކޮޅު ހަދާނަމަ، ހެކިބަސް ދޭން އެންގުމުގެ ބާރު ކޯޓަށް އޮންނާނެ އެވެ. އަދި ޖިނާއި މައްސަލައެއްގައި ހެކިބަސް ދޭން ދެކޮޅު ހަދައިފިނަމަ ކޯޓުތަކާބެހޭ ގާނޫނުގެ ދަށުން ތިން މަހަށް ވުރެ ދިގު ނޫން މުއްދަތަކަށް ޖަލަށްލުން ނުވަތަ ގޭގައި ބަންދު ކުރުން ނުވަތަ ގިނަވެގެން 10،000ރ. އިން ޖޫރިމަނާ ކުރަން ވަގުތުން ހުކުމް ކުރަން ޖެހޭނެ ކަމަށް އެ ގަވާއިދުގައިވެ އެވެ.

އެ ގަވާއިދުގައިވާ ގޮތުން އާއިލީ ގުޅުމެއް އޮތުމުގެ ސަބަބުން ހެއްކާބެހޭ ގާނޫނުގެ ދަށުން ހެކިބަސް ދޭން ދެކޮޅު ހެދުމުގެ ބާރު އޮންނަ މީހުންނާއި އެ ގާނޫނުގެ ދަށުން ހެކިބަސް ދޭން ލާޒިމް ނުކުރެވޭނެ މީހުން ފިޔަވައި ދެން ތިބި އެންމެންނަށް އެ ގަވާއިދުގެ ދަށުން ފިޔަވަޅު އެޅިދާނެ އެވެ. އަދި އެފަދަ މީހުން ކޯޓަށް ހާޒިރުވާން ދެކޮޅު ހަދާނަމަ އެ މީހުން ހައްޔަރުކޮށްގެން ވެސް ކޯޓަށް ހާޒިރު ކުރެވިދާނެ ކަމަށް އެ ގަވާއިދުގައިވެ އެވެ.

މީގެ އިތުރުން މަދަނީ މައްސަލަތަކުގެ ތެރެއިން އެއް ލައްކަ ރުފިޔާއަށް ވުރެ ދަށުގެ އަދަދުގެ ފައިސާ ހިމެނޭ މައްސަލަތަކުގައި ހެއްކެއް ނެތް ނަމަ ހުވާ ކުރުވައިގެން ދައުވާ ސާބިތު ކުރުމުގެ އުސޫލު ވެސް އެ ގަވާއިދުގައި ހިމަނާފައިވެ އެވެ. އަދި މިގޮތަށް ހުވާކުރަން ފުރުސަތު ދެވެނީ އެއްވެސް ހެއްކެއް ނެތް ހާލަތުގައި ކަމަށާއި އެ ހާލަތުގައި ދައުވާލިބޭ މީހާ ހުވާކުރަން ދެކޮޅު ހަދައިފިނަމަ އެ ދައުވާއެއް ސާބިތުވާނެ ކަމަށް އެ ގަވާއިދުގައިވެ އެވެ.