ރަޖިސްޓްރީ ނުކުރާ ސްކީމްތަކުން ގެއްލުންވާ މީހުން ޝަކުވާ ހުށަހަޅަން އެދެފި

ކެޕިޓަލް މާކެޓް ޑިވެލޮޕްމަންޓް އޮތޯރިޓީ (ސީއެމްޑީއޭ) ގައި ރަޖިސްޓްރީ ނުކޮށް ހިންގާ އިންވެސްޓްމަންޓް ސްކީމެއްގައި ބައިވެރިވެގެން ގެއްލުން ލިބިފައިވާ ނަމަ އެކަމުގެ ޝަކުވާ ހުށަހަޅަން ސީއެމްޑީއޭއިން އެދެފި އެވެ.

ސީއެމްޑީއޭއިން މިއަދު ނެރުނު ބަޔާނެއްގައި، މާލީ ސެކިއުރިޓީޒްގެ މުއާމަލާތުގެ ތެރޭގައި ހިމެނޭ ކަމެއް ހުއްދަ ނެތި ނުކުރެވޭނެކަން ކުރިން އަންގާފައިވާނެކަން ހަނދާންކޮށްދީފައިވެ އެވެ. އަދި އެފަދަ ސްކީމެއްގެ ސަބަބުން ގެއްލުން ލިބިފައިވާ ނަމަ މިމަހުގެ 30 ވަނަ ދުވަހުގެ ކުރިން ޝަކުވާ ހުށަހަޅަން ވަނީ އެެދިފަ އެވެ.

އެ ބަޔާނުގައިވާ ގޮތުން އެފަދަ ޝަކުވާތަކެއް އެ އޮތޯރިޓީން މިހާރު ވެސް އަންނަނީ ބަލަމުންނެވެ.

އެ ބަޔާނުގައިވާ ގޮތުން ސެކިއުރިޓީޒްގެ މާނައިގެ ތެރޭގައި ފައިސާއިން ފައިދާ ހޯދުމަށްޓަކައި އިންވެސްޓް ކުރުމާއި އެފަދަ ހުރިހާ މުއާމަލާތްތަކެއް ހިމެނޭނެ އެވެ. އަދި އެފަދަ މުއާމަލާތްތަކުގެ ތެރޭގައި އިތުބާރު ގެއްލޭ އަދި ނޭދެވޭ ކަންކަން ހުއްޓުވުމަކީ އެ އޮތޯރިޓީގެ ޒިންމާއެއް ކަމަށް އެ ބަޔާނުގައިވެ އެވެ.

ސީއެމްޑީއޭއިން އެގޮތަށް ބުނިއިރު، ރައްޔިތުންގެ މަޖިލީހުގެ ފޭދޫ ދާއިރާގެ ކުރީގެ މެމްބަރު އަލްހާން ފަހުމީގެ މަސްލަހަތު އޮތް ކުންފުންޏަކުން ގިނަ ބައެއްގެ އަތުން ފައިސާ ނަގައިގެން އިންވެސްޓްކުރި ސްކީމެއްގެ މައްސަލަ ފުލުހުން ވެސް އަންނަނީ ބަލަމުންނެވެ.

އޭގެފަހުން އަނެއްކާވެސް އެ ކުންފުނިން ވަނީ އާ ސްކީމެއް ފަށައިފަ އެވެ.