އުރީދޫގެ އަހަރީ އާންމު ޖަލްސާ އަންނަ މަހުގެ 8 ވަނަ ދުވަހު

އުރީދޫގެ އަހަރީ އާންމު ޖަލްސާ، އަންނަ މަހުގެ 8 ވަނަ ދުވަހުގެ ރޭ ބާއްވަން ނިންމައިފި އެވެ.

އުރީދޫން ބުނީ އަހަރީ އާންމު ޖަލްސާގައި ބައިވެރިވާން ރަޖިސްޓްރީވާ ފަރާތްތަކަށް އޮންލައިންކޮށް އަދި ޖަލްސާ ބާއްވާ ތަންކަމުގައިވާ ކްރޮސްރޯޑްސް މޯލްޑިވްސްގެ އިވެންޓް ހޯލަށް ހާޒިރުވެގެން ބައިވެރިވެވޭނެ އެވެ.

ކްރޮސްރޯޑްސްގެ އިވެންޓް ހޯލަށް ދެވޭނީ 120 ހިއްސާދާރުންނަށެވެ. އޮންލައިންކޮށް ބައިވެރިވާ ފަރާތްތަކަށް "ފަހިވޯޓު" މެދުވެރިކޮށް ޖަލްސާގައި ބައިވެރިވުމުގެ އިންތިޒާމުތައް ހަމަޖައްސައިދެވޭނެ އެވެ. ޖަލްސާއަށް ގޮސް ސީދާ ބައިވެރިވާ ފަރާތްތަކާއި، އޮންލައިންކޮށް ބައިވެރިވާ ފަރާތްތަކަށް އެ މައުލޫމާތު މާޗް 7 ވަނަ ދުވަހު ކުރިން އަންގާނެ ކަމަށް އުރީދޫން ބުންޏެވެ.

މި ޖަލްސާގައި މިދިޔަ އަހަރުގެ ފައިދާއިން ޑިވިޑެންޑުގެ ގޮތުގައި ބަހާނެ ފައިސާ ކަނޑައަޅާނެ އެވެ. މިދިޔަ މަހު ބޭއްވި އެކުންފުނީގެ ބޯޑު ބައްދަލުވުމުގައި ވަނީ ހިއްސާއަކަށް 3.04ރ. ބަހަން ނިންމާފަ އެވެ. އެ ނިންމުން ފާސް ކުރާނީ އަހަރީ އާންމު ޖަލްސާގަ އެވެ.

އުރީދޫއަށް މިދިޔަ އަހަރު ގާތްގަނޑަކަށް ދެ ބިލިއަން ރުފިޔާގެ އާމްދަނީއެއް ލިބުނު އިރު ފައިދާގެ ގޮތުގައި ވަނީ 560 މިލިއަން ރުފިޔާ ލިބިފަ އެވެ.

އުރީދޫން ޕަބްލިކް ކުންފުންޏަކަށް ބަދަލުކޮށް، އާއްމުންނަށް ހިއްސާ ވިއްކަން ފެށީ 2016 ވަނަ އަހަރު އެވެ. އެ ކުންފުނިން މިހާތަނަށް ހިއްސާއަކަށް އެންމެ ބޮޑު އަދަދެއް ދޫކުރީ 2019 ވަނަ އަހަރު އެވެ. އެ އަހަރު ހިއްސާ އަކަށް 3.30ރ. ބެހި އެވެ. އެއީ މިހާތަނަށް އެ ކުންފުންޏަށް އެންމެ ބޮޑު ފައިދާއެއް ވެސް ލިބުނު އަހަރެވެ. އެ އަހަރު އުރީދު އަށް ވަނީ ގާތްގަނޑަކަށް 600 މިލިއަން ރުފިޔާގެ ފައިދާއެއް ލިބިފަ އެވެ.