ރާއްޖޭގެ 11 ރިސޯޓަކަށް ފޯބްސްގެ "ފަސް ތަރި"

ފޯބްސް ޓްރެވަލް ގައިޑުން ދޭ ފަސް ތަރީގެ އެވޯޑު ރާއްޖޭގެ 11 ރިސޯޓަކަށް ލިބިއްޖެ އެވެ.

މިއީ، ފޯބްސް މަޖައްލާ އިން ދޭ އެންމެ މަތީ ދަރަޖައިގެ ޓްރެވަލް އެވޯޑެވެ. ކޮންމެ އަހަރަކު ވެސް ދުނިޔޭގެ ހުރިހާ މަންޒިލުތަކެއްގެ އެންމެ ލަގްޒަރީ އަދި ހިދުމަތްތައް އެންމެ ފުރިހަމަ ރިސޯޓުތަކާއި ހޮޓާ، ސްޕާ އަދި ރެސްޓޯރެންޓްތަައް ފޯބްސް އިން ރޭޓު ކުރަނީ މި އެވޯޑުންނެވެ. ގިނަ އަދަދެއްގެ ޓޫރިސްޓުން ދަތުރުކުރަން އެންމެ ރަނގަޅު މަންޒިލް ކަނޑައަޅާ މި ލިސްޓުގައި ހިމެނޭ ރިސޯޓުތަކާއި ހޮޓާތަކަށް ފޯޯބްސް އިން އެވޯޑު ދެ އެވެ.

މި އަހަރުގެ މި ލިސްޓުގައި ޖުމްލަ 48 ރިސޯޓަކަށް ފަސް ތަރި ލިބިފައިވެ އެވެ. އޭގެ ތެރޭގައި ރާއްޖޭގެ 11 ރިސޯޓު ހިމެނެ އެވެ.

ފަސް ތަރީގެ އެވޯޑު ލިބުނު ރިސޯޓުތައް

- ޝެވަލް ބްލަންކް ރަންދެލި

- ފޯ ސީޒަންސް އެޓް ކުޑަ ހުރާ

- ފޯ ސީޒަންސް އެޓް ލަނޑާ ގިރާވަރު

- ޖޯލި މޯލްޑިވްސް

- ކުޑަދޫ ޕްރައިވެޓް އައިލެންޑް

- ވަން އެންޑް އޮންލީ ރީތި ރަށް

- ފަރި އައިލެންޑްސް

- ސޮނޭވާ ޖާނީ

- ސެއިންޓް ރެޖިސް ވޮއްމުލި

- ވެލާ ޕްރައިވެޓް އައިލެންޑް

- ވޮލްޑޯފް އެސްޓޯރިއާ، އިތާފުށި އައިލެންޑް

މި ރިސޯޓުތަކަށް ފޯބްސްގެ އެންމެ މަތީ ދަރަޖަ ލިބުނު އިރު، ފޯބްސްގެ ޓްރެވަލް ގައިޑުގައި ރާއްޖޭގެ 22 ރިސޯޓެއް ހިމެނެ އެވެ. އޭގެ ތެރޭގައި ހަތަރު ތަރި ލިބުނު ރިސޯޓުތަކާއި "ރެކޮމެންޑެޑް" ގެ ގޮތުގައި ރޭޓުކޮށްފައިވާ ރިސޯޓުތައް ވެސް ހިމެނެ އެވެ.

ފޯބްސް ޓްރެވަލް ގައިޑަށް ރިސޯޓުތައް ހޮވަނީ އެ މަޖައްލާގެ ރިޕޯޓަރުން ޓޫރިސްޓުންގެ ގޮތުގައި ރިސޯޓުތަކަށް ގޮސް ކުރާ ތަޖުރިބާތަކަށް ބަލައިގެންނެވެ. އެވޯޑު ދިނުމުގައި ވެސް އެ ރިސޯޓަކުން ފޯރުކޮށްދޭ ތަޖުރިބާތަކަށް ބަލާނެ އެވެ.

ރާއްޖޭގައި 160 ރިސޯޓު ހިންގަމުން އަންނަ އިރު ދުނިޔޭގެ އެންމެ ނަން މަޝްހޫރު ލަގްޒަރީ ބްރޭންޑްތަކުގެ ރިސޯޓުތައް ރާއްޖޭގައި އަންނަނީ ހިންގަމުންނެވެ. ރާއްޖެއަކީ ލަގްޒަރީ ރިސޯޓުތައް ހިންގުމުގައި ދުނިޔޭގައި އެންމެ މަޝްހޫރު އެއް މަންޒިލެވެ. މި އަހަރުގެ މިހާތަނަށް ރާއްޖެއަށް ދެ ލައްކައަށް ވުރެ ގިނަ ޓޫރިސްޓުން އައި އިރު ސަރުކާރުގެ އަމާޒަކީ ރާއްޖެއަށް މިއަހަރު 1.8 މިލިއަން ޓޫރިސްޓުން ގެނައުމެވެ.