ޝިއުނާގެ މަރުގެ ދައުވާ ލިބޭ މީހާ، ޝަރީއަތް ނިމެންދެން ބަންދުކުރަން އަމުރުކޮށްފި

މިިދިޔަ ސެޕްޓެމްބަރުމަހު ހުޅުމާލޭގައި ހިނގި އެކްސިޑެންޓެއްގައި މަރުވި ފާތިމަތު ޝިއުނާގެ މަރުގެ މައްސަލާގައި ދައުލަތުން ދައުވާކުރާ މީހާގެ ޝަރީއަތް ނިމެންދެން ބަންދުގައި ބަހައްޓަން ކްރިމިނަލް ކޯޓުން މިއަދު އަމުރުކޮށްފި އެވެ.

ޝިއުނާ މަރުވީ ރަށްޓެއްސަކާ އެކު ސައިކަލެއްގައި ދުއްވާލަން ނުކުމެ އުޅެނިކޮށް، ފަހަތުން އައި ކާރެއް އެ ސައިކަލުގައި ޖެހި އެކްސިޑެންޓް ވެގެންނެވެ. މި މައްސަލާގައި ދައުލަތުން ދައުވާކުރަނީ ކާރު ދުއްވި ގ. ސީވޭވް، އަހުމަދު މަލްދާން އަލީގެ މައްޗަށެވެ. އޭނާގެ މައްޗަށް ކުރަނީ މީހަކު މަރުވެ ދިއުމުގެ އިހުމާލުގެ އަމަލެއް ކުރުމުގެ ދައުވާ އެވެ.

މި މައްސަލައިގެ ޝަރީއަތް މިއަދު ފަށައި، މައްސަލަ ނިމެންދެން މަލްދާން ބަންދުކުރަން ކޯޓުން އަމުރުކުރީ ދައުލަތުން އެގޮތަށް އެދުމުންނެވެ. މަލްދާން އެދުނީ ބަންދަށް ލުޔެއް ދިނުމަށެވެ. މަލްދާން ބުނީ އޭނާ އަކީ އާއިލާގައި ހުރި ހަމައެކަނި ފިރިހެންމީހާ ކަމަށާއި މިހާރު ވެސް ގިނަ ދުވަސްތަކެއް ބަންދުގައި ހޭދަވެފައިވާ ކަމަށެވެ.

މި މައްސަލަ ބައްލަވާ ގާޒީ އާދަމް އާރިފް ވިދާޅުވީ، އެއީ ބަންދަށް ލުއި ދެވޭ ބާވަތުގެ މައްސަލައެއް ނޫން ކަމަށެވެ. މަލްދާން ބަންދުކުރަން އަމުރުކުރީ މުޖްތަމައުގެ ސަލާމަތަށް ނުރައްކާ ވެދާނެތީ އާއި ހެކިންނަށް ނުފޫޒު ފޯރުވަފާނެ ކަމަށް ބެލެވޭތީ އެވެ.

ދައުވާގައިވާ ގޮތުން، އެކްސިޑެންޓް ހިނގީ ބަލަންވާ ވަރަށް ނުބައި، މަލްދާން ކާރު ދުއްވުމުގެ ސަބަބުންނެވެ. ދައުވާ ސާބިތުވެއްޖެ ނަމަ ގިނަވެގެން ހަތަރު އަހަރުގެ ދުވަހުގެ މުއްދަތަށް އޭނާ ޖަލަށް ލާނެ އެވެ.

އެކްސިޑެންޓް ހިނގިއިރު، ޝިއުނާ އިނީ ސައިކަލުގެ ފަހަތުގަ އެވެ. މި އެކްސިޑެންޓުގައި، ސައިކަލު ދުއްވީ މީހާ އަށް ވެސް ސީރިއަސް އަނިޔާތަކެއް ލިބުނެވެ.