އާދީއްތަ އިން ފެށިގެން ޑިޖިޓަލް ޑްރައިވިން ލައިސަންސް ބޭނުންކުރަން ފަށަނީ

އަންނަ އާދިއްތަ ދުވަހުން ފެށިގެން ޑިޖިޓަލް ޑްރައިވިން ލައިސަންސް ބޭނުންކުރަން ފަށާނެ ކަމަށް ޓްރާސްޕޯޓް މިނިސްޓްރީން މިއަދު ބުނެފި އެވެ.

މިނިސްޓްރީން ބުނީ އެ އިދާރާއިން ދޭ ހިދުމަތްތަކުގެ ފެންވަރު މަތިކޮށް، ލުއިފަސޭހަކަމާއެކު އެ ހިދުމަތްތައް ލިބޭނެ އިންތިޒާމު ހަމަޖައްސައިދިނުމުގެ މަގުސަދުގައި އަލަށް ފަރުމާކުރެވުނު ސޮފްޓްވެއާގެ ބައިތަކުގެ ތެރެއިން އެއްގަމު އުޅަނދު ދުއްވުމުގެ ލައިސަންސް ހިދުމަތް އަންނަ އާދިއްތަ ދުވަހުން ފެށިގެން ބޭނުންކުރަން ފަށާނެ ކަމަށެވެ.

އެ ހިދުމަތް ފެށުމާއެކު ފުލުހުންގެ މޯބައިލް އެޕްލިކޭޝަން "ޕޮލިސް އެމްވީ" އިން ފެންނަ މިނިސްޓްރީގެ ޑިޖިޓަލް ލައިސަންސް އަކީ އުޅަނދުތައް ދުއްވާ ފަރާތްތަކުގެ ލައިސަންސްގެ ގޮތުގައި ބައްލައިގަންނާނެ ކަމަށް ވެސް ބުންޏެވެ.

ޕޮލިސް އެޕްލިކޭޝަން އިން ފެންނަ ލައިސަންސްއަކީ މުއްދަތު އޮތް ލައިސަންސްއެއް ނަމަ އެއީ ސައްހަ ލައިސެންސް ކަމުގައި ފުލުހުން ބަލައިގަތުމަށް މިނިސްޓްރީން އަންގަފާއިވާނެ ކަމަށް ވެސް ޓްރާންސްޕޯޓް މިނިސްޓްރީން ބުންޏެވެ.

"މި ބަދަލާ ގުޅިގެން މިހާރު ޕްރިންޓިންއަށް ކުރަމުން ގެންދާ ހޭދަ ކުޑަވާނެ އެވެ. ޑިޖިޓަލްކޮށް ލައިސަންސް ދޫކުރާ ގޮތަށް ބަދަލުކުރި ނަމަވެސް ކޮންމެހެން ލައިސަންސް ކާޑު ޕްރިންޓް ކޮށްގެން ގެންގުޅުއްވަން ބޭނުންފުޅުވާ ފަރާތްތަކަށް އެ ފުރުސަތު ވެސް ފަހިކޮށް ދެވޭނެ އެވެ،" މިނިސްޓްރީން ބުންޏެވެ.

ޓްރާންސްޕޯޓް މިނިސްޓްރީން ދޭ ހިދުމަތުގެ ފެންވަރު ރަނގަޅުކުރުމުގެ ގޮތުން އަލަށް ބޭނުންކުރަން ފަށާ ސޮފްޓްވެއާއަށް ބަދަލުވުގެ މަސައްކަތް ކުރުމަށް، ޑްރައިވިން ލައިންސަންސާ ގުޅޭ ހުރިހާ ހިދުމަތެއް މިދިޔަ އާދިއްތަ ދުވަހުން ފެށިގެން ވަނީ މެދުކަނޑާލައިފަ އެވެ.

އަލަށް ތައާރަފުކުރާ މި ސޮފްޓްވެއާގައި ލައިސަންސަށް އެދި ހުށަހެޅުމާއި އެހެން ހިދުމަތްތައް ވެސް ޑިޖިޓަލްކޮށް ކުރެވޭނެ އެވެ. އަދި ލައިސަންސް ދޫކުރާނީ ވެސް ޑިޖިޓަލްކޮށެވެ.