ދެ ފަނޑިޔާރެއްގެ ސުލޫކީ މައްސަލަ ޖޭއެސްސީން ބަލަނީ

ދެ ފަނޑިޔާރެއްގެ ސުލޫކީ މައްސަލަ ބަލަން ޖުޑީޝަލް ސާވިސް ކޮމިޝަން (ޖޭއެސްސީ) އިން ނިންމައިފި އެވެ.

ޖޭއެސްސީން އިން މިއަދު ނެރުނު ބަޔާނެއްގައިވާ ގޮތުން ސުލޫކީ މައްސަލަ ބަލަން ނިންމީ ސިވިލް ކޯޓުގެ ގާޒީ ފައްޔާޒް ޝާތިރާއި ސ. ހިތަދޫ މެޖިސްޓްރޭޓް ކޯޓުގެ މެޖިސްޓްރޭޓް ޒިޔާދާ ތާހިރާ ގުޅޭގޮތުންނެވެ.

ޖޭއެސްސީން ބުނިގޮތުގައި ގާޒީ ފައްޔާޒްގެ މައްސަލަ ބަލަން ނިންމީ އޭނާ ބެއްލެވި މައްސަލައެއްގެ އަޑުއެހުން ނިންމާލުމަށްފަހު ހުކުމް ނުކޮށް އަހަރަކަށް ވުރެ ގިނަ ދުވަސް ވަންދެން ބޭއްވުމުގައި އޭނާ ފަރުވާ ކުޑަކުރި ކަމަށް ބުނާ ޝަކުވާއަކާ ގުޅިގެންނެވެ.

މީގެ އިތުރުން މެޖިސްޓްރޭޓް ޒިޔާދާގެ މައްސަލަ ބަލަން ނިންމީ މަސްއޫލިއްޔަތު އަދާކުރުމާއި އަދި ޝަރީއަތުގެ މަޖިލިސްތައް ހިންގުމުގައި ޒިންމާދާރުކަން ކުޑަކޮށް އަމަލުކުރި ކަމަށް ބުނާ މައްސަލައެއްގައި ކަމަށް ޖޭއެސްސީން ބުންޏެވެ.

އެ ދެ މައްސަލަ ބެލުމަށް ތަހުގީގު ކޮމެޓީ އެކުލަވާލާފައިވާ ކަމަށް ޖޭއެސްސީން ބުންޏެވެ.