ސިއްހީ ދާއިރާގެ އެންމެންގެ މުސާރަ ބޮޑުވާނެ: ފިނޭންސް މިނިސްޓްރީ

ހެލްތު މިނިސްޓްރީގައި މަސައްކަތްކުރާ މުވައްޒަފުންނާއެކު، ސިއްހީ ދާއިރާގެ އެންމެންގެ މުސާރަ ބޮޑުވާނެ ކަމަށް ފިނޭންސް މިނިސްޓްރީން މިއަދު ބުނެފި އެވެ.

އެ މިނިސްޓްރީގެ އޮފިޝަލަކު "މިހާރު" އަށް ވިދާޅުވީ ޑޮކްޓަރުންނާއި ނަރުހުން އަދި ސިއްހީ ފަންނީ ދާއިރާގައި ތިބި އެންމެންގެ މުސާރަ ބޮޑުވާނެ ކަމަށެވެ.

ނަމަވެސް، އެކަމުގެ ތަފްސީލުތައް ހާމަކުރައްވާނީ ރައީސް އިބްރާހިމް މުހައްމަދު ސޯލިހު ކަމަށް ސަރުކާރުން ނިންމާފައި ވާތީ އިތުރު މައުލޫމާތެއް އަދި ނުލިބެ އެވެ.

ޑޮކްޓަރުންނާއި ނަރުހުންނާއި ސިއްހީ ހިދުމަތްތެރިންގެ މުސާރަ ބޮޑު ކުރުމަށް ދައުލަތުގެ މި އަހަރުގެ ބަޖެޓުގައި ވަނީ 500 މިލިއަން ރުފިޔާ ކަނޑައަޅައިފަ އެވެ.

ސިއްހީ ދާއިރާގެ މުސާރަތައް ބޮޑުކުރަން ނިންމިއިރު، މިދިޔަ މެއި މަހުން ފެށިގެން ޓީޗަރުންނާއި ޕްރިންސިޕަލުންގެ މުސާރަ ވަނީ ބޮޑުކޮށްފަ އެވެ.

މުސާރައިގެ އާ އޮނިގަނޑާ އެކު ޑިޕްލޮމާ ލެވެލްގެ ޓީޗަރަކަށް 13،266ރ، ޑިގްރީ ލެވެލްގެ ޓީޗަރަކަށް 19،467ރ. އަދި މާސްޓާސް ލެވެލްގެ ޓީޗަރަކަށް 20،895ރ. ލިބެ އެވެ. ޕްރިންސިޕަލުންގެ ތެރެއިން ވެސް ރޭންކް 1 ގައި ހިމެނޭ ޕްރިންސިޕަލަކަށް 30،610ރ. އަދި ރޭންކް 2 ގައި ހިމެނޭ ޕްރިންސިޕަލަކަށް 33،075ރ. ލިބެ އެވެ.

ރައީސް އިބްރާހިމް މުހައްމަދު ސޯލިހު އޭރު ވަނީ ދެން އެންމެ އަވަހަށް ބޮޑު ވާނީ ސިއްހީ ދާއިރާގެ މުސާރަ ކަމަށް އިއުލާން ކުރައްވައިފަ އެވެ.