ކުވެއިތު ފަންޑުގެ ހޮސްޕިޓަލްތައް އިމާރާތް ކޮށްދޭނެ ބަޔަކު ހޯދަން އަނެއްކާ އިއުލާނުކޮށްފި

ކުވެއިތު ފަންޑުގެ އެހީގައި އިމާރާތްކުރާ ހަތް ހޮސްޕިޓަލްގެ މަސައްކަތް ކޮށްދޭނެ ބަޔަކު ހޯދަން އަނެއްކާ ވެސް އިއުލާނުކޮށްފި އެވެ.

އެ ފަންޑުގެ އެހީގައި 30 އެނދުގެ ހޮސްޕިޓަލްތަކެއް އިމާރާތް ކުރާނެ ބަޔަކު ހޯދަން އެންމެ ފުރަތަމަ އިއުލާނުކުރީ މިދިޔަ އޭޕްރީލް މަހު އެވެ. އެކަމަކު، އެކަން ކޮށްދޭނެ ބަޔަކު ނުލިބުމުން އިއްޔެ އަލުން އިއުލާން ކުރީ އެވެ.

ފިނޭންސް މިނިސްޓްރީން ބުނީ ކުވެއިތު ފަންޑު ފޯ އަރަބް އިކޮނޮމިކް ޑިވެލޮޕްމަންޓް (ކޭއެފްއޭއީޑީ) ގެ ދަށުން އިމާރާތްކުރާ ހޮސްޕިޓަލްތަކުގެ ބީލަންތަކުގައި ބައިވެރިވުމަށް އަންނަ މަހުގެ ފަސް ވަނަ ދުވަހުގެ ކުރިން މައުލޫމާތު ސާފުކުރަން ޖެހޭނެ ކަމަށެވެ.

ބިޑް ހުޅުވުން އޮންނާނީ އަންނަ މަހުގެ 19 ވަނަ ދުވަހެވެ.

އާ ހޮސްޕިޓަލްތައް އަޅަން ނިންމާފައިވަނީ؛

- ހދ. ހަނިމާދޫ

- ށ. މިލަންދޫ

- ނ. ވެލިދޫ

- ކ. ތުލުސްދޫ

- އދ. މާމިގިލި

- ވ. ފެލިދޫ

- ތ. ވިލުފުށި

އެ ހޮސްޕިޓަލްތަކުގެ ބިޑް ސެކިއުރިޓީގެ ގޮތުގައި 35،000 ޑޮލަރު ހުށަހަޅަންޖެހެ އެވެ.