އުމުރުން ދުވަސްވީ މީހުންގެ މަރުކަޒެއް އައްޑޫގައި ހަދަނީ

އުމުރުން ދުވަސްވީ މީހުން ބައިތިއްބާ ހާއްސަ މަރުކަޒެއް (އެލްޑާލީ ހޯމް) އައްޑޫގައި ހަދަން ސަރުކާރުން ނިންމައިފި އެވެ.

ރާއްޖޭގައި ފުރަތަމަ ފަހަރަށް އިމާރާތްކުރާ އެ މަރުކަޒުގެ މައިގަނޑު ބޭނުމަކީ ޖެންޑާ މިނިސްޓްރީން ބުނިގޮތުގައި އުމުރުން ދުވަސްވީ މީހުންގެ ހައްގުތައް ރައްކާތެރި ކުރުމެވެ.

އެފަދަ މީހުންނަށް މިނިވަން މާހައުލެއް ގާއިމު ކޮށްދިނުމާއި އެކިއެކި ސަބަބުތަކާ ގުޅިގެން ސަރުކާރުގެ ބެލުމުގެ ދަށަން ގެންދާ އެމުރުން ދުވަސްވީ މީހުން ބަލަހައްޓަން އެކަށީގެންވާ މާހައުލެއް ގާއިމު ކުރުމަކީ "އެލްޑާލީ ހޯމް" އެއް ހެދުމުގެ ބޭނުމެއް ކަމަށް އެ މިނިސްޓްރީން ބުންޏެވެ.

އެ ވިލެޖުގެ ހިދުމަތް ހޯދާ މީހުން ބަހާލާފައި ވަނީ ތިން ބަޔަކަށެވެ. އެއީ:

- އެ ތަނުގެ ހިދުމަތް ހޯދަން އަމިއްލަ އަށް ބޭނުންވާ މީހުން (ޕްރައިވެޓް ރެސިޓެންޓްސް)

- އެހީތެރިކަމާއި އަޅާލުން ބޭނުންވާ އުމުރުން ދުވަސްވީ މީހުންގެ ތެރެއިން ދައުލަތުގެ ބެލުމުގެ ދަށުގައި ތިބި އުމުރުން ދުވަސްވީ މީހުން.

- ގޭގައި ބަލަހައްޓަމުންދާ ދޮށީ އުމުރުގެ މީހުން، އެ މީހުން ބަލަހައްޓަމުންދާ މީހުން ވަޒީފާ އަދާކުރުމަށް މަގުފަހިކޮށްދިނުމުގެ ގޮތުން ވަޒީފާ އަށް ދާ ވަގުތު ތަކުގައި "ޑޭ ކެއާ"ގެ ގޮތުގައި.

މި ވިލެޖް ގާއިމް ކުރުމަށް ހަމަޖެހިފައިވަނީ ޕަބްލިކް ޕްރައިވެޓް ޕާޓްނާޝިޕްގެ އުސޫލުންނެވެ.

އުމުރުން ދުވަސްވީ މީހުންނަށް މަރުކަޒެއް އެޅުމަށް ނިންމާފައި ވާއިރު، އަޅާލާނެ މީހަކު ނެތި ތިބޭ އެ ފަދަ މީހުން މިހާރު ބަލަމުން ގެންދަނީ ދައުލަތުގެ ބެލުމުގެ ދަށުގައި ހުންނަ ގުރައިދޫ މަރުކަޒުގަ އެވެ.