މުސާރަ ނުދީގެން ހާލުގައި ޖެހިފައި ތިބި ޖައުސާގެ މުވައްޒަފުން މިއަދު ވެސް އިހްތިޖާޖުގައި

ހުޅުމާލޭގައި ފްލެޓް އިމާރާތްކުރުމުގެ މަސައްކަތުގައި އުޅޭ ޖައުސާ/ ޖާހު ކުންފުނީގެ ބިދޭސީންނަށް އެތައް މަހަކު މުސާރަ ނުދީގެން ހާލުގައި ޖެހިފައިވާ ކަމަށް ބުނެ މިއަދު ވެސް މުޒާހަރާކޮށްފި އެވެ.

ސެންޓްރަލް ޕާކު ކައިރީގައި ގިނަ އަދަދެއްގެ ބިދޭސީން އިހްތިޖާޖް ފެށީ އެތަނުގައި އިށީނދެ ތިބެގެންނެވެ. ޖާހް އިންވެސްޓްމަންޓުން، އެ މީހުންގެ ނިގުޅައިގެންފައިވާ މުސާރައިގެ ހައްގު ހޯދައިދޭން ދިޔައީ އަޑުއުފުލަމުންނެވެ.

އިހްތިޖާޖުގައި ހުރި ބިދޭސީއަކު "މިހާރު" އަށް ބުނި ގޮތުގައި މަސައްކަތް ކުރުވައި މުސާރަ ނުދޭތާ ފަސް މަސްވެއްޖެ އެވެ. ގައުމުގައި ތިބި އާއިލާ އަށް ފައިސާ ނުފޮނުވިގެން އެ މީހުން ހާލުގައި ޖެހިފައިވާ ކަމުގެ ޝަކުވާ ކުރި އެވެ.

"މުސާރަ ނުދެންޏާ ޕާސްޕޯޓް ހަވާލުކުރަން ބުނިން. ފެމިލީ ކައިރިއަށް އިންޑިއާ އަށް ގޮސް މަސައްކަތްކުރަން. މުސާރަ ވެސް ނުދޭ، ޕާސްޕޯޓް ވެސް ނުދޭ،" އޭނާ ބުންޏެވެ.

"މިތަނުގައި 93 މީހުން މަސައްކަތް ކުރޭ. އެކަމަކު 54 މީހުންނަށް މުސާރަ ނުދޭ."

ގަވާއިދާ ހިލާފަށް އެ މީހުންގެ ޕާސްޕޯޓު ހިފަހައްޓާފައިވާ ކަމަށް ބުނެ މުވައްޒަފުން ވަނީ އިމިގްރޭޝަނާއި ލޭބަ އޮތޯރިޓީ އަށް ވެސް މައްސަލަ ހުށަހަޅައިފަ އެވެ.

މުވައްޒަފުން ލައްވައި މަސައްކަތް ކުރުވައި މުސާރަ ނުދޭ މައްސަލާގައި ސޯޝަލް މީޑިއާގައި ވެސް ބައެއް މީހުން ދަނީ ކަންބޮޑުވުންފާޅުކުރަމުންނެވެ. މިއީ، ގާނޫނުގައި އެންމެ ހަރުކަށި އަދަބު ކަނޑައަޅާފައިވާ ކުށްތަކުގެ ތެރޭގައި ހިމެނޭ ހިއުމަން ޓްރެފިކިންގެ އަމަލެއް ކަމަށާއި މިކަމުގައި ފިޔަވަޅު އަޅަން ވެސް ގޮވާލާފައިވެ އެވެ.

މީގެ ހަފުތާއެއްހާ ދުވަސްކުރިން ވެސް މި މުވައްޒަފުން ނުކުމެ މުޒާހަރާކުރި އެވެ. އޭގެތެރެއިން ދެ މީހަކު ވަނީ މަގު މެދުގައި އޮށޯވެ އަމިއްލަ ހަށިގަނޑަށް ގެއްލުންދޭން ވެސް އުޅެފަ އެވެ. އެކަން ހުއްޓުވީ އެ މީހުންނާ އެކު މަސައްކަތްކުރާ އެހެން ބިދޭސީންތަކެކެވެ.

މި އިހްތިޖާޖް ހުއްޓުވަން ފުލުހުން މިއަދު ވެސް ހަރަކާތްތެރިވި އިރު ކުރިން ފަހަރު ވެސް ފުލުހުން ގޮސް މައްސަލަ ބެލި އެވެ.

ބިދޭސީނަށް މުސާރަ ނުދޭ މައްސަލާގައި ޖާހް ކުންފުނީގެ ބަހެއް ނުލިބުނެވެ. ތަކުރާރުކޮށް ގުޅުމުން ވެސް އެ ކުންފުނީގެ އިސް ބޭފުޅަކާ ގުޅޭ ގޮތެއް ނުވި އެވެ.

މުސާރަ ނުދީ މުވައްޒަފުން ހާލުގައި ޖައްސާފައިވާ ކަމުގެ ތުހުމަތު ޖައުސާ އަށް ކުރާއިރު، އެ ކުންފުނިން ފްލެޓް ގަތުމަށް ހުށަހެޅި މީހުންގެ އަތުން ފައިސާ ނަގައި ފްލެޓް ހަވާލުނުކޮށް އެތައް އަހަރެއް އަހަރުވެފައިވާ ކަމަށް ބުނެ ވެސް ދަނީ ކަންބޮޑުވުންފާޅުކުރަމުންނެވެ.

ބިދޭސީންތަކެއް ލައްވައި މަސައްކަތްކުރުވައި މުސާރަ ނުދީ ގެންގުޅުނު ސީރިއަސް މައްސަލައެއް 2020 ގައި ވެސް ވަނީ ފެންމަތިވެފަ އެވެ. ސައްހަ ޑޮކިއުމެންޓެއް ނެތް ބިދޭސީންތަކެއް ލައްވައި، ބޮޑުފިނޮޅުގައި މަސައްކަތްކުރުވައި، އެތައް މަހެއް ވަންދެން މުސާރަ ނުދިނުމާއި، އެތަނުން ފޭބިޔަނުދީ ގެންގުޅުނުކަން އެނގުނީ އެ މީހުން މުޒާހަރާ އަށް ނުކުމެ ދިވެއްސަކު ރަހީނުކުރުމުންނެވެ.

ބޮޑުފިނޮޅުގައި މަސައްކަތް ކުރި ބިދޭސީންގެ މުސާރަ އުޅެނީ، 4،000-7،000އާ ދެމެދުގަ އެވެ. ބައެއް މީހުންނަށް ހަ މަހުގެ މުސާރަ ނުދީ ހިފެހެއްޓި އެވެ. މި މައްސަލައިގައި ރައްޔިތުންގެ މަޖިލީހުގެ މިލަންދޫ ދާއިރާގެ މެމްބަރު އަލީ ރިޒާގެ މައްޗަށް ހިއުމަން ޓްރެފިކިންގެ ތުހުމަތުކޮށް މައްސަލަ ތަހުގީގު ވެސް ކުރި އެވެ.

އެކަމަކު، ރިޒާގެ ހިއްސާ އޮންނަ ރިޒް މޯލްޑިވްސްގެ މައްޗަށް ކުރި ތުހުމަތާ އެކު ހިންގި ތަހުގީގު އޮބި، ބިދޭސީ މުވައްޒަފުން ސަރުކާރުން ގައުމަށް ފޮނުވާލީ އެވެ.

ހިއުމަން ޓްރެފިކިންގެ މައްސަލަ ސީރިއަސް ލެވެލްއެއްގައި ރާއްޖޭގައި އޮތް އިރު އެކަމަށް ހައްލު ނުހޯދޭ ކަމުގެ ކަންބޮޑުވުން ޖަމިއްޔާތަކުން ވެސް ފާޅުކުރެ އެވެ.