ސްމާޓް ސިޓީ މަޝްރޫއު: އެޗްޑީސީން، ވާވޭ ކުންފުންޏާއެކު އެއްބަސްވުމަކަށް

ސްމާޓް ސިޓީއެއްގެ ގޮތުގައި ހުޅުމާލެ ހެދުމަށް އެޗްޑީސީން ފަށާފައިވާ "ސްމާޓްކޮމް" އަށް އެހީތެރިކަން ފޯރުކޮށްދިނުމަށް އެ ކުންފުންޏާއެކު ވާވޭ ލަންކާ ޕްރައިވެޓް ލިމިޓެޑުން އިއްޔެ އެއްބަސްވެއްޖެ އެވެ.

އައިސީޓީ އިންފްރާސްޓްރަކްޗާ އަދި ސްމާޓް ޑިވައިސްތައް ފޯރުކޮށްދިނުމުގައި ދުނިޔޭގެ އެންމެ ކުރީ ސަފުގައި ފާހަގަކޮށްލެވޭ ވާވޭ ކުންފުންޏާއެކު އެޗްޑީސީން ވި އެއްބަސްވުމުގެ ދަށުން ސްމާޓް ސިޓީ ސޮލިއުޝަންތައް ޑިޒައިންކޮށް، ތަންފީޒު ކުރުމަށް ވާވޭގެ ފަންނީ ތަޖުރިބާ ފޯރުކޮށްދޭނެ އެވެ.

މިދިޔަ އަހަރުގެ ޑިސެމްބަރު 12 ގައި ތައާރަފުކުރި "ސްމާޓްކޮމް" ބްރޭންޑަކީ ހުޅުމާލޭގެ ހުރިހާ ކޮމިއުނިޓީއެއް ޑިޖިޓަލްކޮށް، ގުޅުވައިލުމަށް ތައާރަފުކުރި ބްރޭންޑެކެވެ. ހުޅުމާލޭގެ ކަންކަން ކުރިއަށް ގެންދިއުމަށް ތަފާތު ސްމާޓް ސޮލިއުޝަންތައް ތައާރަފުކޮށް، ރައްޔިތުން ހިމެނޭހެން ޕާޓްނާޝިޕްތައް އެ ބްރޭންޑްގެ ދަށުން އުފައްދާނެ ކަމަށް އެޗްޑީސީން ބުނެފައިވެ އެވެ.

އެޗްޑީސީ އާއި ވާވޭ އިން ގަބޫލުކުރާ ގޮތުގައި، އެ އެއްބަސްވުމުގެ ސަބަބުން ސްމާޓް ސިޓީ މަޝްރޫއަށް ތަފާތު ފައިދާތަކެއް ވާނެ އެވެ. ހުޅުމާލެއަކީ ރާއްޖޭގެ ފުރަތަމަ ސްމާޓް ސިޓީއަށް ބަދަލުކުރުމަށް ބޭނުންވާ ތަޖުރިބާ އާއި ޑިޖިޓަލް ސޮލިއުޝަންތައް ހޯދޭނެ ކަމަށް ވެސް ބުންޏެވެ.

"ޑިޖިޓަލް ޓްރާންސްފޯމަޝަން އަވަސް ކުރުމަށް ރާއްޖެ އަށް އެހީތެރިވުމުގެ ގޮތުން ސްމާޓް ސިޓީ، ސްމާޓް ޓޫރިޒަމް އަދި ސްމާޓް އެޑިކްޝަންގެ ދާއިރާއިން އަޅުގަނޑުމެންގެ ބައިނަލްއަގްވާމީ ތަޖުރިބާ ހިއްސާ ކުރުމަށް ވާވޭ އިން މިތިބީ ތައްޔާރަށް،" ވާވޭ ލަންކާގެ ސީއީއޯ ޓާއޯ ގުއަންޔާއޯ ވިދާޅުވި އެވެ.

އެޗްޑީސީގެ "ސްމާޓްކޮމް" ބްރޭންޑްގެ ސަބަބުން ޓެކްނޮލޮޖީ އާއި އުފެއްދުންތެރިކަން ބޭނުންކޮށްގެން ރައްޔިތުންގެ ދިރިއުޅުމަށް ލުއި ފަސޭހަކަން ގެނެސް ދޭނެ ކަމަށް ވެސް އެޗްޑީސީން ބުންޏެވެ.