އެސްޓީއޯ މުވައްޒަފުންގެ އަގުވަޒަންކުރުމަށް އެވޯޑް ދީފި

އެސްޓީއޯގެ މުވައްޒަފުންގެ އަގުވަޒަންކުރުމުގެ ގޮތުން އެވޯޑު ދީފި އެވެ.

ރޭ ދަރުބާރުގޭގައި ބޭއްވި "އެސްޓީއޯ ސްޓާފް އެވޯޑް" އަކީ އެ ކުންފުނިން މިފަދަ އެވޯޑު ހަފްލާއެއް ބޭއްވި ފުރަތަމަ ފަހަރެވެ.

އެސްޓީއޯއިން ބުނީ މުވައްޒަފުންގެ އަގުވަޒަންކުރުމުގެ އިތުރުން ކުންފުނި ކުރިއަރުވައިދޭ މުވައްޒަފުންގެ ހުނަރާއި މަސައްކަތަށް ހައްގު ޝަރަފެއް ދިނުމަކީ މި އެވޯޑް ދިނުމުގެ މަގްސަދު ކަމަށެވެ.

އެވޯޑް ދިނީ އެވޯޑަށް ނަން ހުށަހަޅަން ބޭނުން ކޮންމެ ސްޓާފަކަށް ވެސް ފުރުސަތު ދީގެން އޭގެ ތެރެއިން ހޮވާލައިގެން ކަމަށް އެ ކުންފުނިން ބުންޏެވެ.

އެވޯޑަށް ނޮމިނޭޓުކޮށްފައިވަނީ، އެސްޓީއޯ އިން ބުނި ގޮތުގައި، މިދިޔަ އަހަރުގެ ސެޕްޓެމްބަރު މަހުން ފެށިގެން މި އަހަރުގެ އޮގަސްޓް މަހުގެ ނިޔަލަށް ހިދުމަތްކުރި މުވައްޒަފުންނެވެ. މުވައްޒަފަކު ނަން ހުށަހެޅި ތާރިހުގައި، އެ މުވައްޒަފަކީ، ކުންފުނީގެ ފުލްޓައިމް މުވައްޒަފަކަށް ވާންޖެހެ އެވެ.

ރޭގެ ހަފްލާގައި އެސްޓީއޯއިން 11 އެވޯޑެއް ދީފައިވެ އެވެ. އެއީ "ބްރިލިއަންސް އެވޯޑް"، "އެޑިއުކޭޝަނަލް އެޗީވްމަންޓް އެވޯޑް"، "އައުޓްސްޓޭންޑިން އިނޮވޭޓިވް އެވޯޑް" އަދި "ގޮޓް ދެޓް އެކްސްޓްރާ މައިލް" އެވޯޑް، އެވެ. މި އެވޯޑްތައް ޝަރުތުހަމަވާ ކޮންމެ މުވައްޒަފަކަށް ވެސް ލިބިފައިވެ އެވެ.

އޭގެ ތެރެއިން، މުވައްޒަފުންގެ ތެރޭގައި ހުރިހާ ގޮތަކުން ވެސް މަގުބޫލުކަމަށް ވޯޓު ނަގައި، އެންމެ ގިނަ ވޯޓް ލިބުނު މުވައްޒަފަށް "އެމްޕްލޯއީ ޗޮއިސް އެވޯޑް" ވަނީ ދީފަ އެވެ. އަދި މުޖުތަމައުއަށް ފައިދާހުރި ހިދުމަތެއް ކޮށްދީފައިވާ މުވައްޒަފުންނަށް ހުށަހެޅި "ހައިޕާ ހެލްޕާ އެވޯޑް" އަށް އެއްވެސް މުވައްޒަފަކު ނޮމިނޭޓެއް ނުވެ އެވެ.

އެސްޓީއޯއިން ބުނީ ނޮމިނޭޝަނަށް ހުޅުވާލި މުއްދަތުގައި 598 ނޮމިނޭޝަން ލިބިފައިވާ ކަމަށެވެ. އެ އެވޯޑުތަކަށް ނޮމިނޭޓްވެފައިވާ މުވައްޒަފުންގެ ނަންތައް އިވެލުއޭޓްކުރީ އެކަމަށް އެކުލަވާލި ފަސް މެންބަރުންގެ ކޮމިޓީއަކުން ކަމަށެވެ.