މާސްކުގައި ސޮން އަށް ދަތިކަމެއް ނެތް، މުޅިން ފިޓް

އަލް ރައްޔާން (ނޮވެމްބަރު 24) - މި މަހުގެ އެއްވަނަ ދުވަހު ޓޮޓެންހަމް ހޮޓްސްޕާއާ އެކު ޔޫއެފާ ޗެމްޕިއަންސް ލީގު ގުރޫޕް ސްޓޭޖުގެ ފަހު މެޗުގައި ދެކުނު ކޮރެއާގެ އިތުބާރު ފޯވާޑް ސޮން ހެއުން މިން ގެ ބޮލަށް ލިބުނު އަނިޔާއިން ރަނގަޅުވެ، އޭނާ ހުރީ ވޯލްޑް ކަޕްގެ ފުރަތަމަ މެޗުގައި އުރުގުއޭއާ ދެކޮޅަށް ކުޅެވޭވަރަށް ފިޓް ވެފައި ކަމަށް ކޮރެއާގެ ކޯޗު ޕައޮލޯ ބެންޓޯ ބުނެފި އެވެ.

ސޮންގެ މޫނުގެ ވާތްފަރާތު ލޯ ކަށިގަނޑަށް ގެއްލުން ވެގެން ސޮން ވަނީ ސާޖަރީއެއް ހަދައިފަ އެވެ. އަދި ވޯލްޑް ކަޕަށް ކޮރެއާ އިން ނެގި ޓީމުގައި ހިމެނި، އޭނާ އަންނަނީ ސަލާމަތީ މާސްކެއް އަޅައިގެން ޓީމުގެ ފަރިތަކުރުންތަކުގައި ވެސް ބައިވެރި ވަމުންނެވެ.

"ސޮނީ އަށް ކުޅެވޭނެ. މާސްކު އެޅިއެއް ކަމަކު އޭނާ އަށް އެއިން އުނދަގުލަކާ ކުރިމަތިވެދާނެ ކަމަށް އަހަރެންނަށް ގަބޫލެއް ނުކުރެވޭ، އެއީ ގުދުރަތީ ކަމެއް. އަހަރެމެން މިތަނަށް (ގަތަރަށް) އައި އިރުގެ ޕްލޭނާ އެއްގޮތަށް ކުރިއަށް ދާނަން،" ދެކުނު ކޮރެއާގެ ކޯޗު، ޕޯޗުގަލްގެ ބެންޓޯ ބުންޏެވެ.

"އަހަރެމެންގެ އުންމީދަކީ އޭނާ (ސޮން) އަށް އެންމެ ފަސޭހަ ހާލަތުގައި ހުރުން، އަދި މެޗުގައި ފަސޭހަކަން އިހުސާސް ވާނެ ފަދަ އެންމެ ރަނގަޅު ސްޓްރެޓެޖީ އެއް ބޭނުންކުރުން. އަނިޔާއާ ގުޅިގެން އަހަރެމެންނަށް އޭގެ ރިސްކު ނުނެގޭނެކަން އޭނާ އަށް ވެސް އެނގޭނެ."

ފުރަތަމަ މެޗަށް ސޮން ފިތް ކޮށް ހުރި ނަމަވެސް، އަނިޔާގައި ހުރި ވުލްވްސް އަށް ކުޅެމުން އަންނަ ފޯވާޑް ހްވަންގް ހީ ޗަން ރަނގަޅު ނުވާކަން ބެންޓޯ ހަމަ ކުރެ އެވެ.

އަމިއްލަ ގައުމުގައި 2002 ވަނަ އަހަރު ވޯލްޑް ކަޕް ސެމީ ފައިނަލް ކުޅުނު ފަހުން ދެކުނު ކޮރެއާ އިން ވޯލްޑް ކަޕް ގައި ދެވަނަ ބުރަށް ދަތުރު ކުރީ 2010 ވަނަ އަހަރެވެ. ބެންޓޯ ބުނީ އޭނާގެ ވިސްނުމަކީ މެޗަކަށް ފަހު މެޗެއްގައި ނަތީޖާ ނެރެގެން މި އަހަރުގެ ނޮކައުޓް ބުރުން ޖާގަ ހޯދުން ކަމަށެވެ.

"އަހަރެމެންނަށް ރަނގަޅަށް އެނގޭ ވާދަވެރި ޓީމުތަކަކާ ދެކޮޅަށް ކުޅޭ އިރު އުނދަގޫތަކާ ކުރިމަތި ވާނެކަން. އަދި ވޯލްޑް ކަޕްގެ ތާރީހުގައި ވެސް ދެކުނު ކޮރެއާ ނޮކައުޓް ބުރު ކުޅުނީ ދެ ފަހަރު، އޭގެ ތެރޭން އެއް ފަހަރު އެއީ ޖަޕާނާ އެކު ކޯ ހޯސްޓުންގެ ގޮތުގައި ބޭއްވި މުބާރާތުގައި.

"ކުޅުންތެރިންނަށް މާ ބޮޑު ޕްރެޝަރެއް ދޭން ވީ ސަބަބެއް ވެސް އަހަރެންނަށް ނުވިސްނޭ. އެކަމަކު މިއީ އާއްމުކޮށް ނޮކައުޓް ބުރަށް ދާ ޓީމެއް ނަމަ އަހަރެން ބުނާނަން، އާން، ކޮލިފައި ވާން ޖެހޭނެއޭ."

އުރުގުއޭ އާއި ދެކުނު ކޮރެއާގެ އިތުރުން މި ގުރޫޕުގައި ދެން ހިމެނެނީ ގާނާ އާއި ކޯޗުގެ އުފަން ގައުމު ޕޯޗުގަލް އެވެ.

ޕޯޗުގަލްގެ ގައުމީ ޓީމަށް ވެސް ކުޅުނު ކޯޗު ބެންޓޯ ވަނީ 2014 ވަނަ އަހަރު ބްރެޒިލްގައި އޮތް ވޯލްޑް ކަޕް ގައި އެ ގައުމަށް ކޯޗު ކޮށްދީފަ އެވެ. ނަމަވެސް އެ އަހަރުގެ މުބާރާތުން ބެންޓޯ އަށް ޕޯޗުގަލް ދެވަނަ ބުރަށް ގެންގޮސް ނުދެވުނެވެ.

އުރުގުއޭއާ ދެކޮޅަށް ދެކުނު ކޮރެއާ ކުޅޭ މެޗު ފަށާނީ މިއަދު އިރު އޮއްސި 6 ޖަހާއިރެވެ.

މެޗުގެ ސްކޯ ދިމާ ކުރުމުގެ ފުރުސަތު މެޗު ފެށެންދެން "މިހާރު" ގެ ސްކޯ ޕްރެޑިކްޓާގައި ވަނީ ހުޅުވާލައިފަ އެވެ.