އޮސްޓްރޭލިއާއިން ޑީޕޯޓް ކުރި ޖޮކޮވިޗަށް އަލުން ވިސާ ދީފި

މެލްބަން (ނޮވެމްބަރު 17) - ކޮވިޑް ވެކްސިން ނުޖަހައި ހުރުމުން، މިއަހަރު އޮސްޓްރޭލިއާއިން ޑީޕޯޓް ކުރި ޓެނިސް ކުޅުންތެރިޔާ ނޮވާކް ޖޮކޮވިޗަށް އަލުން އެ ގައުމުގެ ވިސާ ދީފި އެވެ.

މި އަހަރު އޮސްޓްރޭލިއަން އޯޕަން މުބާރާތަށް ޖޮކޮވިޗް ދިއުމުން، މުބާރާތް ފެށުމުގެ ކުރިން އޭނާ ޑީޕޯޓް ކޮށްލީ 2025 ވަނަ އަހަރުގެ ނިޔަލަށް އޮސްޓްރޭލިއާ އަށް ނާދެވޭ ގޮތަށެވެ.

އެކަމަކު އޮސްޓްރޭލިއާގެ ސަރުކާރުން އިއްޔެ ވަނީ ކުރިން ނިންމައިފައިވާ އެ ނިންމުން ބަދަލުކޮށް އަންނަ އަހަރު ބާއްވާ މުބާރާތުގައި އޭނާ އަށް އޮސްޓްރޭލިއާ އަށް ދަތުރު ކުރެވޭ ގޮތަށް ވިސާ ދީފަ އެވެ.

"މި އަށް ވުރެ ރަނގަޅު ހަބަރެއް އަހަންނަކަށް މިހާރު ނުލިބޭނެ،" ޖޮކޮވިޗް ބުންޏެވެ.

"އޮސްޓްރޭލިއަން އޯޕަން މުބާރާތަކީ ގްރޭންޑް ސްލޭމްގައި އަހަރެންގެ އެންމެ ކާމިޔާބު މުބާރާތަކީ އެއީ. ވަރަށް އުފާވެރި ހަނދާންތަކެއް އެ މުބާރާތުގައި އަހަންނާއެކު ވޭ. އަލުން އެ މުބާރަތަށް ދެވޭ ގޮތް ވުމަކީ ބޮޑު ހިތްހަމަޖހުމެއް."

އޮސްޓްރޭލިއާގެ ޓެނިސް އެސޯސިއޭޝަނުން ބުނީ ޖޮކޮވިޗަށް މަރުހަބާ ކިޔަން އެ އެސޯސިއޭޝަނުން ތައްޔާރަށް އޮތް ކަމަށެވެ.