ނެޓްވޯކު ފުޅާކުރަން 55 މިލިއަން ޑޮލަރުގެ ފެސިލިޓީއެއް ދެނީ

ނެޓްވޯކު ފުޅާކުރުމަށާއި ޑިޖިޓަލް އިންފްރާސްޓްރަކްޗާ ވަރުގަދަކުރަން އިންޓަނޭޝަނަލް ފައިނޭންސް ކޯޕަރޭޝަން (އައިއެފްސީ) އަދި އޭޝިއަން ޑިވެލޮޕްމެންޓު ބޭންކު (އޭޑީބީ) ގުޅިގެން ދިރާގަށް 55 މިލިއަން ޑޮލަރު (848 މިލިއަން ރުފިޔާ)ގެ ފެސިލިޓީއެއް ދޭން ނިންމައިފި އެވެ.

ވޯލްޑް ބޭންކުން އަމިއްލަ ވިޔަފާރިތަކަށް އިންވެސްޓު ކުރަން ހާއްސަކޮށްފައިވާ ގޮފި، އައިއެފްސީން މިދިޔަ ހަފުތާގައި ނެރުނު ބަޔާނެއްގައި ބުނީ އޭޑީބީއާ ގުޅިގެން ދިރާގަށް ދެ ފެސިލިޓީއެއް ދޭން ނިންމާފައިވާ ކަމަށެވެ. އެއީ 25 މިލިއަން ޑޮލަރު (385 މިލިއަން ރުފިޔާ) ގެ ފެސިލިޓީއަކާއި 30 މިލިއަން ޑޮލަރު (462 މިލިއަން ރުފިޔާ)ގެ ފެސިލިޓީ އެކެވެ.

ފުރަތަމަ ފެސިލިޓީ، 25 މިލިއަން ޑޮލަރު ބޭނުން ކުރާނީ ދިރާގުގެ ހިންގުމުގެ ހަރަދުތަކަށާއި 5ޖީ އަދި ފައިބަ ބްރޯޑްބޭންޑު ހިދުމަތް ރަށްރަށުގައި ފުޅާކުރުމުގެ އިތުރުން އެ ކުންފުނިން ރާއްޖޭގައި އަޅާ ޑޮމެސްޓިކް ސަބްމެރިން ކޭބަލް ތަރައްގީ ކުރުމަށް ކަމަށް އައިއެފްސީން ބުންޏެވެ.

ދެވަނަ ފެސިލިޓީ ބޭނުން ކުރާނީ، އައިއެފްސީގެ ބަޔާނުގައި ބުނެފައިވާ ގޮތުގައި، މި އަހަރުގެ ކުރީކޮޅު ދިރާގުން ބައިވެރިވެފައިވާ "ސީ.މީ.ވީ 6" ސަބްމެރިން ކޭބަލްގެ މަސައްކަތަށެވެ.

އެ ކޭބަލް މެދުވެރިކޮށް ދެކުނު އޭޝިއާއިން ފެށިގެން އިންޑިއާ އާއި މެދުއިރުމައްޗާއި ހުޅަނގު ޔޫރަޕާ ގުޅާލާނެ އެވެ. މި ހައިސްޕީޑް ސަބްމެރިން ކޭބަލްސިސްޓަމާ، ރާއްޖެ ހިމެނޭގޮތަށް 11 ގައުމެއް ގުޅާލުމަށް ވަނީ ނިންމައިފަ އެވެ.

އެ މަސައްކަތް 2025 ވަނަ އަހަރުގެ ފުރަތަމަ ކުއާޓަރުގެ ނިޔަލަށް ނިންމޭނެކަމަށް ދިރާގުން ވަނީ ލަފާކޮށްފަ އެވެ.

ދިރާގުގެ މެނޭޖިން ޑިރެކްޓަރު އިސްމާއިލް ރަޝީދު ވިދާޅުވީ އައިއެފްސީ އަދި އޭޑީބީގެ ފައިސާ ލިބުމަކީ ކުންފުނީގެ ވަރުގަދަކަމާއި ޑިޖިޓަލް އިންފްރާ ސްޓްރަކްޗާ ތަރައްގީ ކުރުމަށް ދިރާގުން ގެންގުޅޭ ތަސައްވަރު ހާމަކޮށްދޭ ކަމެއް ކަމަށެވެ.

"ރާއްޖޭގެ ޑިޖިޓަލް އިންފްރާސްޓްރަކްޗާ ކުރިއެރުވުމަށް އައިއެފްސީން ދިރާގަށް ކުރާ އިންވެސްޓްމަންޓަކީ ދުނިޔޭގެ އެންމެ ޖަޒީރާ އެއް ގައުމުގެ މީހުން ގުޅުވައިލުމުގެ ގޮންޖެހުމުން އަރައިގަތުމަށް އެހީތެރިވެދޭނެ އަގުހުރި އިންވެސްޓްމަންޓަކަށް ވާނެ،" އައިއެފްސީން ދެކުނު އޭޝިއާ އަށް ކަނޑައަޅާފައި ހުންނަ ކަންޓްރީ ޑިރެކްޓަރު ހެކްޓާ ގޮމެޒް އޭންގް ވިދާޅުވި އެވެ.

އޭނާ ވިދާޅުވި ގޮތުގައި އެ އިންވެސްޓްމަންޓަކީ ސަރުކާރާއި އަމިއްލަ ފަރާތްތަކުން ދޭ ގިނަ ހިދުމަތްތަކެއް ޑިޖިޓަލްކޮށް ލިބޭނެ އިންތިޒާމާއެކު ރާއްޖޭގެ އެކިކަންކޮޅުތަކުގައި ދިރިއުޅޭ މީހުންނަށް ތައުލީމާއި ސިއްހީ ހިދުމަތް ހޯދުމުގެ މަގު ފަހިކޮށްދީ އިގްތިސޯދު ފުޅާކޮށްދޭން ވެސް އެހީވެދޭނެ އިންވެސްޓްމެންޓެކެވެ.

އެއާއެކު ރާއްޖޭގައި ރިމޯޓުކޮށް މަސައްކަތް ކުރުމުގެ ފުރުސަތު ލިބި ގިނަ ވަޒީފާގެ ފުރުސަތުތައް ވެސް ހުޅުވިގެން ދާނެ ކަމަށް އޭނާ ވިދާޅުވި އެވެ.

އޭޑީބީގެ ޕްރައިވެޓް ސެކްޓާ އޮޕަރޭޝަންސް ޑިޕާޓްމަންޓްގެ ޑިރެކްޓާ ޖެނެރަލް ސުޒޭން ގަބޯރީ ވިދާޅުވި ގޮތުގައި އެއީ އޭޑީބީން ރާއްޖޭގެ އަމިއްލަ ފަރާތަކަށް ފައިނޭންޝަލް ފެސިލިޓީއެއް ދޭން ނިންމި ފުރަތަމަ ފަހަރެވެ.

ސުޒޭން ވިދާޅުވި ގޮތުގައި، ދިރާގަށް ފޯރުކޮށްދޭ އެހީއާ އެކު ހަލުވިކަމާ އެކު އިންޓަނެޓުގެ ހިދުމަތް ހެޔޮއަގުގައި ފޯރުކޮށްދީ، އަމިއްލަ ވިޔަފާރިތަކުގެ އިންވެސްޓްމެންޓުތަކާއި ސަރަހައްދީ ގުޅުންތަކަށް މަގުފަހިކޮށްދޭނެ ވަސީލަތަކަށް ވާނެ އެވެ.

މޯބައިލް އަދި އިންޓަނެޓް ކަނެކްޓިވިޓީ އަކީ އިޖްތިމާއީ އަދި އިގްތިސާދީ ކުރިއެރުމާއި ތަރައްގީއަށް މުހިންމު ކަމެއް ކަމަށް ވެސް އޭނާ ވިދާޅުވި އެވެ.

އައިއެފްސީ އަކީ ކުރިއަރަމުން އަންނަ މާކެޓުތަކުގައި އަމިއްލަ ފަރާތްތަކަށް ހާއްސަކޮށް އުފައްދާފައިވާ ދުނިޔޭގެ އެންމެ ބޮޑު ތަރައްގީގެ މުއައްސަސާ އެވެ. އެ ކޯޕަރޭޝަނުން މިދިޔަ އަހަރު އެކަނި ވެސް 31.5 ބިލިއަން ޑޮލަރު ވަނީ ތަރައްގީވަމުން އަންނަ ގައުމުތަކުގެ އަމިއްލަ ކުންފުނިތަކަށާއި މާލީ އިދާރާތަކަށް ދޫކޮށްފަ އެވެ.