ހުރަވީ ބިލްޑިންގް ބިމުގައި ހަދާ ޕާކުގައި 226 ސައިކަލުގެ ޕާކިން ޒޯނެއް

ހުރަވީ ބިލްޑިންގް ހުރި ބިމުގައި ހަދަމުން އަންނަ ޕާކުގައި 226 ސައިކަލުގެ ޕާކިން ޒޯނެއް ހަދައިފި އެވެ.

ޕްލޭނިން މިނިސްޓްރީން ހަދަމުން އަންނަ އެ ޕާކުގެ މަސައްކަތުގެ ބޮޑު ބައެއް މިހާރު ވަނީ ނިމިފަ އެވެ. އެ ޕާކު ހަދަނީ ވެހިކަލް ޕާކް ކުރެވޭނެ ބޮޑު ގާޖައަކާ އެކު ފޫހިފިލުވައިލަން ގޮސް އިށީނދެލައިގެން ތިބެވޭނެ ތަންތަން ވެސް ހުންނާނެ ގޮތަށެވެ. ހުކުރު މިސްކިތާއި ހުރަވީ ބިލްޑިންގާ ދެމެދުގައި އޮންނަ މަގަށް ވަނީ ދޮންވެލި ލައިފަ އެވެ.

އެނގިފައިވާ ގޮތުގައި އަންނަ މަހު އެ ޕާކު ހުޅުވާނެ އެވެ. އެކަމަކު ސީދާ ތާރީހެއް އަދި ނޭނގެ އެވެ.

މާލޭގެ މޭޔަރު ޑރ. މުހައްމަދު މުއިއްޒު މިއަދު ކުރެއްވި ޓުވީޓެއްގައި ވިދާޅުވީ ހުރަވީ ބިލްޑިންގް ހުރި ބިމުގައި ސައިކަލް ޕާކިން ޒޯން ކުރަހައިދިނުމުގެ މަސައްކަތް މާލޭ ސިޓީ ކައުންސިލުން މިއަދު ފަށާފައިވާ ކަމަށެވެ.

"ޖުމްލަ 226 ސައިކަލު ޕާކް ކުރެވޭނެ،" މޭޔަރު ވިދާޅުވި އެވެ.

އެ ޕާކު ހެދުމުގެ މަސައްކަތް ފެށީ މިދިޔަ އޮގަސްޓް މަހު އެވެ.

މީގެ 35 އަހަރު ކުރިން އިމާރާތްކުރި ހުރަވީ ބިލްޑިންގުގައި މި ފަހަކާ ޖެހެންދެން ވެސް ސަރުކާރުގެ ބައެއް އޮފީސްތައް ހިންގި އެވެ. އެކަމަކު އެ އިމާރާތް ވަރަށް ބޮޑަށް ބާވެފައި ވާތީ އެ ތަނުގައި މީގެ ކުރިން ހިންގި އޮފީސްތައް އެހެން ތަންތަނަށް ބަދަލުކުރުމަށް ފަހު އިމާރާތް ހުސްކުރީ އެވެ.

ހުރަވީ ބިލްޑިންގްގައި ހިންގި ސަރުކާރުގެ ބައެއް އޮފީސްތައް ހުޅުމާލޭގައި ހަދަފާއިވާ ސަރުކާރުގެ އޮފީސް އިމާރާތަށް އަންނަ ޑިސެމްބަރު މަހު ބަދަލުކުރަން ވެސް ނިންމާފައިވެ އެވެ.