އަތޮޅުތެރޭގެ ބަސްތަކުގައި ވެސް ކަރުދާސް ޓިކެޓު ވިއްކަން ފަށަނީ

އެމްޓީސީސީގެ ރާއްޖެ ޓްރާންސްޕޯޓް ލިންކު (އާރްޓީއެލް) އިން އައްޑު އާއި ފުވައްމުލައް އަދި ލ. އަތޮޅުގައި ބޭނުންކުރާ ބަސްތަކުން ކަރުދާސް ޓިކެޓު ވިއްކަން އަންނަ ހޮނިހިރު ދުވަހު ފަށަން ނިންމައިފި އެވެ.

އެމްޓީސީސީން މިއަދު ބުނީ، އެ ހިދުމަތާއެކު މާލެ އެކޭ އެއްގޮތަށް ބަހުގެ ތެރެއިން ޓިކެޓު ގަނެގެން ދަތުރުކުރެވޭނެ ކަމަށެވެ. އެކަމަކު، ޓާމިނަލްތަކުން ޓިކެޓެއް ނުވިއްކާނެ އެވެ.

ބަހުގެ ކޮންޑަކްޓަރު ޓިކެޓް ދޫކުރާނީ ހާއްސަ ފޮއްޓަކަށް ފައިސާ ލުމުންނެވެ. އަދި ދަތުރު ކުރަމުންދާއިރު، މާރު ނުކުރެވޭނެތީ ސީދާ އަދަދު ހަމަވާނެހެން ފައިސާ ގެންދިއުމަށް އެމްޓީސީސީން އެދެ އެެވެ.

އެ ކުންފުނިން ބުނިގޮތުގައި، ކަރުދާސް ޓިކެޓު ވިއްކުމުގެ އިންތިޒާމު ހަމަޖެއްސީ އިސްރަށްވެހިންނަށް ފަސޭހައަކަށެވެ.

އާރްޓީއެލްގެ ވެބްސައިޓާއި ޓްރެވެލް އެޕްލިކޭޝަން މެދުވެރިކޮށް، ކިއުއާރު ޓިކެޓު ނަގައިގެން ވެސް ދަތުރުކުރެވޭނެ އެވެ. ކިއުއާރު ޓިކެޓު ނަގާނެ ގޮތް ދައްކައިދޭ ވީޑިއޯއެއް އާރްޓީއެލްގެ ޔޫޓިބާއި ސޯޝަލް މީޑިއާ ޕޭޖުތަކުން ފެންނާނެ ކަމަށް އެމްޓީސީސީން ބުންޏެވެ.

އައްޑު އާއި ފުވައްމުލަކާއި ލ. އަތޮޅުގެ ބަސް ދަތުރުތަކުގެ އަގުތައް އުޅެނީ 5ރ. އާއި 20ރ. އާ ދެމެދުގަ އެވެ.

އައްޑޫގެ އަށް ރޫޓަކުން ބަސް ދަތުރުކުރާއިރު، އެއް ރޫޓު ފިޔަވައި ބާކީ ރޫޓުތަކުގެ ޓިކެޓެއްގެ އަގަކީ 5ރ. އެވެ. އައްޑޭ މެއިން ކަނެކްޓަ ރޫޓުގެ ދަތުރުތަކުގެ އަގުތައް އުޅެނީ 10ރ. 15ރ. އަދި 20ރ. އަށެވެ.

ފުވައްމުލަކުގެ ބަސް ދަތުރުތަކުގެ ޓިކެޓު އުޅެނީ 5ރ. އަށެވެ. އެ ސިޓީގައި ބަސް ދަތުރު ކުރަނީ ތިން ރޫޓަކަށެވެ.

ލ. އަތޮޅުގައި ޖުމްލަކޮށް ހިމެނެނީ ފަސް ރޫޓެކެވެ. އޭގެ ތެރެއިން އިސްދޫ-ކަލައިދޫ ރޫޓާއި ފޮނަދޫ އަދި ގަމުގެ އެތެރޭގެ ދަތުރުތައް ކުރާ ރޫޓުގެ އަގަކީ 5ރ. އެވެ. ގަން- ކައްދޫ އެއާޕޯޓާއި ފޮނަދު- ކައްދޫ އެއާޕޯޓުގެ ރޫޓުގެ އަގުތައް އުޅެނީ 10ރ. 15ރ. އަދި 20ރ. އަށެވެ.

އާރުޓީއެލް އަތޮޅުތެރޭގެ ބަހުގެ ހިދުމަތުގައި ވެސް އުމުރުން 65 އަހަރުން މަތީގެ މީހުންނާއި އުމުރުން ތިން އަހަރުން ދަށުގެ ކުދިންނަށް އައިޑީކާޑާއެކު ހިލޭ ދަތުރުކުރެވޭނެ އެވެ. ހާއްސަ އެހީއަށް ބޭނުންވާ މީހުން ނެޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) ގެ ކާޑު ދެއްކުމުން ހިލޭ ދަތުރުކުރެވޭނެ އެވެ. ސްކޫލު ކުދިންނަށް ހިލޭ ދަތުރުކުރެވޭނީ ޔުނިފޯމުގައި ތިބޭ ގަޑިތަކުގަ އެވެ.

އައްޑު އާއި ފުވައްމުލައް އަދި ލ. އަތޮޅުގައި ބަސް ދަތުރުކުރާ ރޫޓުތައް ފެންނަން ހުންނަ މެޕް، އާރްޓީއެލް ވެބްސައިޓު ނުވަތަ ޓްރެވެލް އެޕް މެދުވެރިކޮށް ބެލޭނެ އެވެ.

މަހެއްހާ ދުވަހުގެ ހިލޭ ދަތުރުތަކަށް ފަހު، އާރްޓީއެލްގެ މާލޭ ބަސް ތަކުން ވެސް މި މަހުގެ ތިން ވަނަ ދުވަހު ވަނީ ޓިކެޓްގެ އަގު ނަގަން ފަށައިފަ އެވެ.