ޖީއެމްއާރު އަތުން އެއާޕޯޓް އަތުލަން ގާސިމާއި އިމްރާން އަދި ނާޒިމް ވެސް ބޭނުމެއް ނުވި: ޔާމީން

އިންޑިއާގެ ޖީއެމްއާރު ކުންފުނީގެ އަތުން ވެލާނާ އިންޓަނޭޝަނަލް އެއާޕޯޓް (ވީއައިއޭ) ހިންގުން އަތުލުމަށް، ޖުމްހޫރީ ޕާޓީގެ ލީޑަރު ގާސިމް އިބްރާހިމާއި އަދާލަތު ޕާޓީގެ ރައީސް އިމްރާން އަބްދުﷲ އަދި އެމްއެންޕީގެ ރައީސް މުހައްމަދު ނާޒިމް ވެސް ބޭނުން ނުވި ކަމަށް އިދިކޮޅު ލީޑަރު އަދި ކުރީގެ ރައީސް އަބްދުﷲ ޔާމީން ރޭ ވިދާޅުވެއްޖެ އެވެ.

ޕީޕީއެމް/ޕީއެންސީ ކޯލިޝަނުން ރޭ ބޭއްވި ޖަގަހަ ޖަލްސާގައި ޔާމީން ވިދާޅުވީ، ކުރީގެ ރައީސް މުހައްމަދު ނަޝީދުގެ ސަރުކާރުން ވީއައިއޭ ފަދަ ދައުލަތުގެ ހަރުމުދާ ވިއްކަމުން ދާތީ، ރައްޔިތުންގެ މަޖިލީހުގެ ރުހުން ނެތި ހަރުމުދާ ނުވިއްކޭ ގޮތަށް ދައުލަތުގެ މާއްލިއްޔަތުގެ ގާނޫނަށް އިސްލާހު ގެނައުމުގެ ބިލެއް ފާސްކުރިއިރު، ގިނަ ސިޔާސީ ލީޑަރުން ވެސް ޖީއެމްއާރު އަތުން އެއާޕޯޓް އަތުލަން އެއްބަސްވި ކަމަށެވެ.

އެކަމަކު، ނަަޝީދުގެ ސަރުކާރުން އެ އިސްލާހު ތަސްދީގު ނުކޮށް، ޖީއެމްއާރަށް އެއާޕޯޓް ދިން ކަމަށް ވިދާޅުވި އެވެ.

"އަޅުގަނޑުމެން އެންމެ ފުރަތަމަ ހަރުމުދާ ވިއްކުން މަޖިލީހުގެ ރުހުމެއް ނެތި ނުކުރެވޭނެ ކަމަށް، އޭރު އެއްބަސްވި ލީޑަރުން ތެރޭގައި ތަސްމީނު، ގާސިމް، ހަސަން ސައީދު، ޑރ. ޖަމީލް މި ހުރިހާ ބޭފުޅުން ހިމެނޭ. އެކަމާ ގުޅިގެން އެންމެ ފުރަތަމަ އަޅުގަނޑު ހައްޔަރުކުރީ ވެސް، ދައުލަތް ވައްޓާލަން އުޅޭ ކަމަށް ބުނެ އަޅުގަނޑުގެ ބަޔާނެއް ނަގަން،" ޔާމީން ވިދާޅުވި އެވެ.

"...ޖީއެމްއާރު އެގްރީމެންޓް ނުވަތަ ހަރުމުދާ ވިއްކާލަން ގާނޫނަށް އިސްލާހު ގެނައިއިރު އަޅުގަނޑުމެން އެންމެން ތިބީ އެއް އޮޑިއެއްގައި. ގާސިމް ވެސް އަޅުގަނޑު ވެސް ހަސަން ސައީދު ވެސް ތަސްމީނު ވެސް. އެކަމަކު ރައީސް ވަހީދު އަޅުގަނޑުމެންގެ މަޝްވަރާ އަށް އެއްކުރެއްވިއިރު ހިޔާލު މުޅިން ތަފާތުވެއްޖެ."

މިހާރުގެ އިދިކޮޅު ލީޑަރު ޔާމީން ވިދާޅުވި ގޮތުގައި، ޖީއެމްއާރާ އެކު ހެދި އެއްބަސްވުން ބާތިލުކުރަން އޭރުގެ ސިޔާސީ ލީޑަރުން ދެކޮޅު ހެދީ ނަޝީދުގެ ވެރިކަން ނިމުމަށް ފަހު، ރައީސް މުހައްމަދު ވަހީދުގެ ވެރިކަމުގަ އެވެ. އެ އެއްބަސްވުން ބާތިލުކުރުމާ ގުޅޭ ގޮތުން ވަހީދުގެ ވެރިކަމުގައި ސިޔާސީ ލީޑަރުންނާ އެކު މަޝްވަރާކުރަން ސަރުކާރުން ބޭއްވި ބައްދަލުވުމެއްގައި އެ ބޭފުޅުން އެކަމާ ދެކޮޅު ހެއްދެވި ކަމަށް ޔާމީން ވިދާޅުވި އެވެ.

"ގާސިމް ހަމަ ކަނޑައެޅިގެން ވިދާޅުވި ގައުމު ހިންގަން ހުންނަ މީހަކަށޭ އެންމެ ރަނގަޅަށް އެނގޭނީ މި ކަންތައްތައް ވާނެ ގޮތް އަދި ތީގައި ބޭރު ގައުމަކާ އެކު އޮންނަ ގުޅުމަށް ވާނެ ގޮތަކާ އެއްޗެހި. އެހެންވީމާ ތިމަންނަ ރައީސް ނިންމަވާ ގޮތަކަށް ނިންމަވާނަމޭ،" ޔާމީން ވިދާޅުވި އެވެ.

"ތަސްމީނު ވިދާޅުވި ވާހަކަފުޅަކީ ރާއްޖެ އަބަދު ވެސް ތަރައްގީ ކުރެވޭނީ ބޭރުގެ އިންވެސްޓަރުން ގެނެސްގެންނޭ، ތިވަރުގެ އިންވެސްޓްމަންޓެއް ހުއްޓާލައިފި ކަމަށް ވަންޏާއި ދެން މި ތަނަށް އިންވެސްޓްމެންޓެއް ނާންނާނެއޭ. އެހެންވީމާ ތިމަންނަ ތާއީދު ކުރަނީ ޖީއެމްއާރާ އެކު ކުރިއަށް ދާށޭ. ދިވެހި ސަރުކާރުގެ ފަރާތުން މިކަން ވިސްނަދޭން އެންމެ އިސްކޮށް ހުންނެވި ބޭފުޅަކީ އޭރުގެ ޑިފެންސް މިނިސްޓަރު ނާޒިމް."

މިހާރުގެ ހޯމް މިނިސްޓަރު އިމްރާން ވެސް ބައެއް ޖަލްސާތަކުގައި ޖީއެމްއާރު އެއްބަސްވުމާ ދެކޮޅު ހެއްދެވި ކަމަށް ވިދާޅުވާ ވާހަކަ އިވިވަޑައިގަންނަވާ ކަމަށާއި އެކަމަކު އެއީ އެއްވެސް ހަގީގަތެއް ނެތް ވާހަކަތަކެއް ކަމަށް ޔާމީން ތުހުމަތުކުރެއްވި އެވެ.

"އަަޅުގަނޑުމެން ހުރިހާ މަސައްކަތެއް ނިމި ޖަލްސާ ރޫޅާލައި، ޖީއެމްއާރާ އެކު އެގްރީމެންޓް ކޮށްގެން ތިބެން ބޭނުން ނޫން ކަމަށް ދަންނަވާފައި އަޅުގަނޑު ދެންނެވިން މި ހިސާބުން ބޭނުންވަނީ ޖަލްސާ ދޫކޮށްފައި ދާށޭ. އެ ހިސާބުން އިމްރާން ވަޑައިގެން ޖަލްސާއާ ގުޅިވަޑައިގަތީ ވެސް. އޭރު ޖަލްސާ ހިނގާތާ ވިއްސަކަށް ފަންސަވީހަށް މިނެޓް ވެއްޖެ،" ޔާމީން ވިދާޅުވި އެވެ.

"އަޅުގަނޑުމެން ނެތް ތަންތާނގައި މި ބޭފުޅުންނަށް ކޮންމެ ވަހަކާއެއް ވެސް ދެއްކިދާނެ. އެކަމަކު މިއީ ކަންތައްތައް ހިނގައިދިޔަ ގޮތް. ހުރިހާ ބޭފުޅުން އޭރު ތިއްބެވީ ޖީއެމްއާރާ އެކީ ކުރިއަށް ވަޑައިގަންނަވަން. މިއަދު ވެސް މި ތިބީ ހަމަ އެހެނުންތޯ؟ މިއަދު ވެސް މި މީހުން މި ތިބީ އިންޑިއާ އެކު ކުރިއަށް ދާން."

ރޭގެ ޖަގަހަ ޖަލްސާގައި ޔާމީން އެ ވާހަކަތައް ހިއްސާކުރެއްވީ އެ މަނިކުފާނުގެ ވެރިކަމުގައި ތަރައްގީ ކުރެއްވި ވެލާނާ އިންޓަނޭޝަނަލް އެއާޕޯޓުގެ އާ ރަންވޭއާ އަދި އެއާޕޯޓް ތަރައްގީ ކުރުމުގެ ކަންކަމާ ގުޅޭގޮތުން މި ސަރުކާރުން ހަގީގަތާއި ހިލާފު ވާހަކަތައް ދައްކަވަމުން ގެންދަވާ ކަމަށް ވިދާޅުވެ އެވެ. އެ ވާހަކަ ފައްޓަވަމުން ވިދާޅުވީ "ކަމެއް ކޮށްދިނުމަށް ފަހު މެޑަލް ޖައްސަވަން ބޭނުންމެއް ނުވޭ،" ކަމަށެވެ.

ދިވެހި ސަރުކާރުން 452 މިލިއަން ޑޮލަރު ހަރަދުކުރި އާ ރަންވޭ ބޭނުންކުރަން ފެށީ އިއްޔެ އެވެ.

ޔާމީންގެ ސަރުކާރުން އެންމެ ބޮޑު ސަމާލުކަމެއް ދިން އެއް މަޝްރޫއަކީ ވެލާނާ އެއާޕޯޓް ޒަމާނީ ފެންވަރަށް ތަރައްގީ ކުރުމެވެ. އެ ޕްރޮޖެކްޓްގެ އެއްބައި ކަމަށްވާ އާ ރަންވޭގެ ކޮންޓްރެކްޓަރަކީ ޗައިނާގެ ބީޔޫސީޖީންނެވެ. އެ ސަރުކާރުގައި 2015 އަހަރު ހަވާލުކުރި އެ މަސައްކަތް ޔާމީންގެ ފަސް އަހަރުގެ ދައުރުގެ ފަހުކޮޅު ނިންމައި އެ މަނިކުފާނު އެ ތަން ރަސްމީކޮށް ހުޅުއްވައި ދެއްވި ވެސް މެ އެވެ.

އެކަމަކު، އެ ރަންވޭއާ ކައިރީގައި ހުރި ބައެއް އިމާރާތްތައް ނެގުމަށް ވަގުތު ދިއުމުން ރަސްމީކޮށް ބޭނުންކުރަން ފެށުން ދިގުލައިގެން ދިޔައީ އެވެ. އަދި ކޮވިޑްގެ ބަލިމަޑުކަން ވެސް އެ މަޝްރޫއަށް ހުރަސް އެޅި ކަމަށް މި ސަރުކާރުން ބުނެ އެވެ.