މަސައްކަތް ލަސްވާތީ، ބޯހިމެނުމުގެ މުއްދަތު އިތުރުކޮށްފި

ބޯހިމެނުމުގެ މަސައްކަތް ކުރުމަށް ލިބުނު އެނިއުމަނޭޓަރުންގެ އަދަދު މަދުވުމުގެ ސަބަބުން އެ މަސައްކަތް ކުރިއަށް ގެންދިއުމަށް ދަތި ވާތީ، ބޯހިމެނުމަށް ކަނޑައަޅާފައިވާ މުއްދަތު މިއަދު އިތުރުކޮށްފި އެވެ.

މޯލްޑިވްސް ބިއުރޯ އޮފް ސްޓެޓިސްޓިކްސް އިން ކުރި އިއުލާނެއްގައި ބުނީ މާލެ އާއި ހުޅުމާލޭގެ ލިސްޓިން ނުނިމި ހުރި ސަރަހައްދުތަކުގައި މާދަމާގެ ނިޔަލަށް ލިސްޓިން މަސައްކަތް ކުރިއަށް ދާނެ ކަމަށެވެ. އަދި ބޯހިމެނުމުގެ މައުލުމާތު ނެގުން މި މަހު 27 ގެ ނިޔަލަށް އެ ސަރަހައްދުތަކުގައި ކުރިއަށް ދާނެ ކަމަށެވެ.

ކުރިން އޮތީ މި މަހު 25 ގެ ނިޔަލަށް ބޯހިމެނުމުގެ މަސައްކަތް ނިންމާލާ ގޮތަށެވެ. ބޯހިމަނަން ފެށީ މިދިޔަ އަންގާރަ ދުވަހު އެވެ.

"މި ގޮތަށް ދިމާވީ މާލެ ސަރަހައްދުން ބޭނުންވާ އަދަދަށް އެނިއުމަރޭޓަރުން ނުލިބުމުގެ ސަބަބުންނެވެ،" އެ އިއުލާނުގައި ވެ އެވެ.

ބޯހިމެނުމުގެ މައުލޫމާތު އެއްކުރާ ޓީމުތައް ހަރަކާތްތެރިވާނީ ކޮންމެ ދުވަހަކު ހެނދުނު 9 އިން އިރުއޮއްސި 7 އަށެވެ. އަދި ހުކުރު ދުވަހު ހެނދުނު 9 އިން 11 އަށާއި މެންދުރު ފަހު 2:30 އިން އިރުއޮއްސި 7 އަށް ކަމަށް ބުންޏެވެ. އަދި ހާއްސަ ހާލަތްތަކުގައި ރޭގަނޑު ގަޑީގައި ވެސް އެ މަސައްކަތް ކުރާނެ ކަމަށް ވެސް ބުންޏެވެ.

ލިސްޓިން ނިމުމުން ގޭބިސީތަކާއި މަސައްކަތްކުރާ ތަންތަނުގެ ތަފުސީލީ މައުލޫމާތު ނެގުމަށް ދެވަނަ ފަހަރަށް ޓީމުތައް ދާނެ ކަމަށް ވެސް ބުންޏެވެ.

އޮޅުވާލައިގެން މައުލޫމާތު ނަގާނަމަ 30،000ރ.ގެ ޖޫރިމަނާއެއް

އެ އިއުލާނުގައި އިތުރަށް ބުނީ ތަފާސްހިސާބުގެ ގާނޫނުގެ ދަށުން، ތަފާސްހިސާބު އެއްކުރުމަށް ހުއްދަ ދީފައިވާ އޮފިސަރަކު ފިޔަވައި އެހެން އެއްވެސް މީހަކު، ތަފާސްހިސާބު އެއްކުރުމުގެ ހުއްދަ އޮތް މީހެއް ކަމަށް ދައްކައި، މައުލޫމާތު އެއްކުރުމުގެ މަސައްކަތްކޮށްފި ނަމަ 30،000ރ. އިން ޖޫރިމަނާކުރެވޭނެ ކަމަށެވެ. އަދި ގާނޫނުތަކާ އެއްގޮތަށް އެ މީހަކާ މެދު ޖިނާއީ ދައުވާ ވެސް ކުރެވޭނެ ކަމަށެވެ.

ބޯހިމެނުމަށް މައުލޫމާތު ނަގަން ދާ، އެކަމުގެ ހުއްދަ އޮތް އޮފިސަރަކަށް ހުރަސްއެޅުމުގެ ގޮތުން ބޭއަދަބީ ގޮތުން މުހާތަބުކުރުމާއި އިންޒާރުދިނުމާއި ބިރުދެއްކުމާއި ނުވަތަ އަނިޔާއެއް ލިބޭ ފަދަ ކަމެއް ކޮށްފި ނަމަ އެ މީހަކު 5،000ރ. އިން ޖޫރިމަނާކުރެވޭނެ ކަމަށެވެ.

ބޯހިމެނުމުގެ މައުލޫމާތު ނަގަން ދަނީ އެކަމުގެ ހުއްދަ އޮތް ފަރާތެއްކަން އާންމުންނަށް ކަށަވަރުކުރެވޭ އިންތިޒާމު ސްޓެޓިސްޓިކްސް ބިއުރޯ އިން ވަނީ ހަމަޖައްސައިދީފަ އެވެ.

ރާއްޖޭގައި 8 އަހަރު ފަހުން ބޯހިމަނަން ފެށިއިރު، ގައުމުގެ އާބާދީ އަށް އައިސްފައިވާ ބަދަލުތަކާއި އިޖުތިމާއީ އަދި އިގުތިސާދީ ހާލަތު އެ މަސައްކަތުން ދެނެގަނެވޭނެ އެވެ. ގޭބިސީތަކާއި އިގުތިސާދީ މަސައްކަތްކުރާ ތަންތަނުން މައުލޫމާތު އެއްކުރާ ގޮތަށް ވަނީ ނިންމައިފަ އެވެ.

އަންނަ މަހު ހައެއްގައި ބޯހިމެނުމުގެ ވަގުތީ ނަތީޖާ އިއުލާނުކޮށް، ދާއިމީ ނަތީޖާ އެ މަހުގެ 20 ގައި އިއުލާނުކުރަން ވަނީ ނިންމައިފަ އެވެ.