ދިރާގުގެ ބާކީވާ ޑޭޓާ، ކުރިއަށް އޮތް މަހަށް ބެހެއްޓޭނެ!

ދިރާގުގެ ޕޯސްޓްޕެއިޑް އަދި އަމިއްލަ މަންތުލީ ޕްލޭންތަކަށް މި މަހުން ފެށިގެން ޑޭޓާ ރޯލްއޯވާ ތައާރަފުކޮށްފި އެވެ.

އެ ބަދަލާއެކު، މިދިޔަ އޮގަސްޓް މަސް ނިމުނުއިރު ޕޯސްޓްޕެއިޑް އަދި އަމިއްލަ މަންތުލީ ޕްލޭންތަކަށް ސަބްސްކްރައިބް ކޮށްފައިވާ މީހުންގެ ޕެކޭޖުގައި ބޭނުންނުކޮށް ހުރި ކޯ-ޑޭޓާ އެލަވަންސެއް މަހުގެ އެލަވަންސާއެކު ހިމެނޭނެ ކަމަށް ދިރާގުން ބުންޏެވެ.

އެ ކުންފުނިން ބުނީ، އެ މަހެއްގައި ބޭނުން ނުކުރެވި ހުންނަ އިތުރު އެލަވަންސް ޖެހިގެން އަންނަ މަހުގެ އެލަވެންސްގެ ތެރޭގައި ކުރިމަގުގައި ހިމެނޭނެ ކަމަށެވެ.

ރޯލްއޯވާ ކުރެވޭ ޑޭޓާ ބޭނުން ކުރެވޭނީ އެއް މަސް ދުވަހުގެ މުއްދަތަކަށެވެ. އެއީ ޕޯސްޓްޕެއިޑް އަދި އަމިއްލަ މަންތުލީ ޕްލޭންތަކަށް ސަބްސްކްރައިބް ކޮށްފައިވާ މީހުންނަށް އިތުރު ހަރަދަކާ ނުލައި އިތުރު ޑޭޓާ ބޭނުން ކުރުމަށް ލިބޭ ފުރުސަތެއް ކަމަށް ދިރާގުން ބުނެ އެވެ.

ދިރާގުގެ ޕޯސްޓްޕެއިޑް ކަސްޓަމަރުންނަށް އިތުރު ޕްރޮމޯޝަނެއް ވެސް މިހާރު ވަނީ ފަށައިފަ އެވެ. އެ ޕްރޮމޯޝަންގެ ދަށުން ޕޯސްޓްޕެއިޑް ނުވަތަ އަމިއްލަ ޕޯސްޓްޕެއިޑް ހިދުމަތަށް އެދުމުން ހިލޭ ދަތުރެއް ލިބުމުގެ ފުރުސަތު ވަނީ ހުޅުވާލައިފަ އެވެ.

ޕްރޮމޯޝަންގެ ނަސީބުވެރިޔާގެ އިނާމަކީ އަބޫދާބީ އާއި ދުބާއީ އަދި އިސްތަންބޫލަށް ދެ މީހެއްގެ ދަތުރެކެވެ. އެ ދަތުރުގެ ހިލޭ ދެކޮޅު ޓިކެޓާއި އެކޮމޮޑޭޝަންގެ އިތުރުން ދުބާއި އާއި އިސްތަންބޫލްގެ ދެ ޓުއާއެއް ވެސް ޕެކޭޖްގައި ހިމެނެ އެވެ. މި މަހުގެ ނިޔަލަށް ކުރިއަށް ގެންދާ އެ ޕްރޮމޯޝަންގައި 1،000 ޑޮލަރުގެ ޝޮޕިން އެލަވަންސެއް ވެސް ދޭނެ އެވެ.