ތިމާވެށީގެ ހުރިހާ މައްސަލައެއްވެސް 2021 ގައި ގޯހުން ގޯހަށް

ދުނިޔެ ހޫނުވުމާ ގުޅިގެން މެދުވެރިވާ ތިމާވެށީގެ ހުރިހާ މައްސަލަތަކެއް ވެސް، މިދިޔަ 2021 ވަނަ އަހަރުގެ ތެރޭގައި ގޯހުން ގޯހަށް ގޮސްފައިވާ ކަމަށް، އެމެރިކާގެ ނޭޝަނަލް އޯޝޭނިކް އެންޑް އެޓްމޮސްފެރިކް އެޑްމިނިސްޓްރޭޝަން (އެންއޯއޭއޭ) އިން ބުނެފި އެވެ.

ކަނޑުތަކާއި ދުނިޔޭގެ ވައިގެ ފަށަލައިގެ ކަންތައް ދިރާސާކުރާ އެ އިދާރާ އިން އިއްޔެ އާންމުކުރި ރިޕޯޓެއްގައި ބުނެފައިވާ ގޮތުން، މި ބިމުގެ ވައިގެ ފަށަލައިގެ ތެރޭގައި ގްރީހައުސް ގޭސް އެކުލެވިފައިވާ މިންވަރާއި، ދުނިޔޭގެ ކަނޑުތަކުގެ ލޮނުގަނޑު އުފުލޭ މިންވަރާއި ކަނޑުތަކުގެ ހޫނުމިން ވެސް 2021 ވަނަ އަހަރު ވަނީ ރެކޯޑް މިންވަރަކަށް މައްޗަށް ގޮސްފަ އެވެ.

ދުނިޔޭގެ އެކި ގައުމުތަކުގެ ސައެންސްވެރިންނާއި ޕްރޮފެސަރުން ހިމެނޭ އެ އިދާރާ އިން ނެރުނު ރިޕޯޓްގައި ބުނެފައިވާ ގޮތުން، ދުނިޔޭގެ ވަށައިގެންވާ ކަނޑުތަކުގެ ލޮނުގަނޑު 2020 ވަނަ އަހަރު ހުރި މިންވަރަށް ވުރެ، 2021 ވަނަ އަހަރުވަނީ 4.9 މިލިމީޓަރު އުފުލިފަ އެވެ. މިއީ ކަނޑުގެ ލޮނުގަނޑު ޖެހިޖެހިގެން އުފުލެމުން އަންނަތާ 10 ވަނަ އަހަރެވެ.

އަދި ކަނޑުގެ ލޮނުގަނޑު އުފުލޭ މިންވަރު 1993 ވަނަ އަހަރު ރެކޯޑްކޮށް ބަލަހައްޓަން ފެށި ފަހުން، މިދިޔަ އަހަރުގެ ނިޔަލަށް 97 މިލިމީޓަރު އުފުލިފައިވާ ކަމަށް ވެސް އެ ރިޕޯޓްގައިވެ އެވެ.

އެންއޯއޭއޭގެ ރިޕޯޓް މި ޝާއިއުކުރީ، ގްރީންލޭންޑްގައި ހުރި ގަނޑުފެންތައް މިހާރު ވިރެމުންދާ ހަލުވިމިނުގެ ސަބަބުން، މިހާރު ހުރި މިންވަރަށް ވުރެ ގާތްގަނޑަކަށް 10 އިންޗި އަށް ކަނޑުގެ ލޮނުގަނޑު ވަރަށް އަވަހަށް އުފުލޭނެ ކަމަށް، ނޭޗާ ކްލައިމެޓް ޗޭންޖް ކިޔާ މަޖައްލާގައި، މިދިޔަ އޮގަސްޓް 29 ގައި ޝާއިއުކުރި ރިޕޯޓެއްގައި ބުނެފައިވަނިކޮށެވެ.

އެ ދިރާސާގައި ބުނެފައިވާ ގޮތުން ގްރީންލޭންޑްގެ ގަނޑުފެންތައް މިހާރު ވިރެމުންދާ ހަލުވިމިނުގައި ވިރެމުން ދިއުން ހުއްޓުވުމަކީ މިހާރުން މިހާރަށް ކުރެވޭނެ ކަމެއް ނޫނެވެ. އަދި އެ ގަނޑުފެންތައް ވިރިގެން ދިއުމުން ކަނޑުގެ ލޮނުގަނޑު އުފުލުން ހުއްޓުވުމަކީ ވެސް މިހާރުގެ ހާލަތުގައި ކުރެވޭނެ ކަމެއް ނޫނެވެ.

އެންއޯއޭއޭގެ ރިޕޯޓްގައި ބުނެފައިވާ ގޮތުން، އެ ރިޕޯޓްގައި ހުރި މައުލޫމާތުތައް ވަރަށް ސާފެވެ. މޫސުމީ ބަދަލުތަކުގެ ސަބަބުން ބައިނަލްއަގުވާމީ ފެންވަރުގައި ގެއްލުންތައް ކުރިމަތިވަމުންދާ ކަމަށާއި، އެ ގެއްލުންތައް ލިބުން ލަސްކުރުމަކީ ވެސް ކުރެވެން ނެތް ކަމެއްކަން، މި ދިރާސާގެ މައުލޫމާތުތަކުން ސާބިތުވާ ކަމަށް ވެސް އެ ރިޕޯޓްގައިވެ އެވެ.

ކަނޑުގެ ލޮނުގަނޑުގެ ހޫނުމިން މަތިވަމުން އަންނަނީ ކުރިން ލަފާކުރި މިންވަރަށް ވުރެ މާ ނުރައްކާތެރި ގޮތެއްގަ އެވެ. ކަނޑުގެ 1800 ފޫޓު ފުނުން ފެށިގެން ކަނޑުގެ އެންމެ މަތީ ފަށަލައާ ހަމައަށް ލޮނުގަނޑުގެ ހޫނުމިން ދިރާސާކޮށް ބެލިއިރު ވެސް، މިދިޔަ އަހަރުތަކުގައި ލޮނުގަނޑުގެ ހޫނުމިން އައީ މަތިވަމުންކަން ސާބިތުވެ އެވެ. އަދި 2021 ވަނަ އަހަރު ކަނޑުގެ ލޮނުގަނޑުގެ ހޫނުމިން ވަނީ ރެކޯޑް މިންވަރަކަށް އުފުލިފައި ކަމަށް ވެސް އެންއޯއޭއޭގެ ރިޕޯޓްގައިވެ އެވެ.