އަށް އަހަރަށްފަހު ކޮމަންވެލްތު ގޭމްސްގައި ރާއްޖޭގެ ދިދަ ރަމްޒުކޮށްފި

އަށް އަހަރުގެ މެދުކެނޑުމަކަށް ފަހު ކޮމަންވެލްތު ގޭމްސްގައި ދިވެހިރާއްޖޭގެ ދިދަ އަލުން ވިހުރުވާލައިފި އެވެ.

އިނގިރޭސި ވިލާތުގައި ފެށި، ކޮމަންވެލްތު ގޭމްސް، ރަސްމީކޮށް ހުޅުވުމަށް، ބާމިންހަމްގެ އޮލިމްޕިކްސް ސްޓޭޑިއަމް، "ދަ އެލެގްޒެންޑާ" ގައި ކުރިއަށް ގެންދިޔަ ހުޅުވުމުގެ ރަސްމިއްޔާތުގައި ރާއްޖޭގެ ދިދަ ރަސްމީކޮށް ތަމްސީލު ކުރީ ބެޑްމިންޓަން ކުޅުންތެރިޔާ ހުސައިން ޒަޔާން ޝަހީދު ޒަކީ އާއި ޓޭބަލް ޓެނިސް ކުޅުންތެރިޔާ ފަތިމަތު ޖުމާނާ ނިމާލް އެވެ.

ކުރީގެ ރައީސް އަބްދުﷲ ޔާމީންގެ ވެރިކަމުގައި ކޮމަންވެލްތުން ރާއްޖެ ވަކިވީ 2016 ގަ އެވެ. އޭގެ ފަހުން 2018 ގައި އޮސްޓްރޭލިއާގެ ގޯލްޑް ކޯސްޓްގައި ބޭއްވި ގޭމްސްގައި ބައިވެރިވުމުގެ ހައިސިއްޔަތު ރާއްޖެ އަށް ގެއްލުނެވެ. މީގެ ކުރިން ރާއްޖެއިން ކޮމަންވެލްތު ގޭމްސްގައި ވާދަކުރީ ސްކޮޓްލެންޑްގައި 2014 ގައި ބޭއްވި ގޭމްސްގަ އެވެ.

ކޮމަންވެލްތުގެ މެންބަރުކަން އަލުން ރާއްޖެއިން ހޯދީ 2019 ގަ އެވެ. ހަމަ އެ އަހަރު ކޮމްނަވެލްތު ގޭމްސް ފެޑެރޭޝަންގެ މެންބަރުކަން ވެސް ރާއްޖެ އަށް ދިނެވެ.

ކޮމަންވެލްތުގެ ގައުމތަކާއި ޓްރިޓަރީތަކާއެކު ޖުމުލަ 72 ގައުމު ގޭމްސްގައި ވާދަކުރެ އެވެ.

އަޅުގަނޑުމެންގެ 72 ޤައުމާއި ސަރަޙައްދު ހުރިހާ ޓެރިޓަރީ އެއް މިތަނުގައި ރަމްޒުކުރާއިރު ބާމިންހަމް އަށް މިއީ ޝަރަފުވެރި ވަގުތެއް. ސަރަހައްދުން އަޅުގަނޑުމެންގެ އެތުލީޓުންނަށް ވާދަކުރެވޭނެ ފުރިހަމަ މާހައުލެއް ލިބިގެންދާނެ،” ކޮމަންވެލްތު ގޭމްސްގެ ލީޑާޝިޕާ ހަލާވުވެވަޑައިގެންނެވި ފުރަތަމަ އަންހެން ރައީސް ޑޭމް ލޫއީސް މާޓިން ވިދާޅުވި އެވެ.

ގޭމްސްގެ ކުޅިވަރު އިވެންޓްތައް މިއަދު ފަށާނެ އެވެ. ރާއްޖެއިން ވާދަކުރާ އިވެންްޓްތަކުގެ ތެރެއިން ޓީޓީ އަދި ބެޑްމިންޓަން ޓީމު އިވެންޓާއި ފެތުމުގެ އިވެންޓްތައް ހިމެނެ އެވެ.

ރާއްޖެއިން ވާދަކުރާ ކުޅިވަރުތަކަކީ ޓޭބަލް ޓެނިސް، ބެޑްމިންޓަން، އެތުލެޓިކްސް، ސްވިމިން އަދި ބީޗް ވޮލީބޯޅަ އެވެ.

ގޭމްސް ކުރިއަށް ދާނީ މި އަންނަ މަހު 8 ދުވަހުގެ ނިލޔަލަށެވެ. ކޮމަންވެލްތު ގޭމްސް އަށް ފަހު އެނބުރި ރާއްޖެ ނައިސް ދިވެހި ބައެއް ޓީމުތައް އިސްލާމިކް ސޮލިޑާރިޓީ ގޭމްސްގައި ވާދަކުރަން ތުރުކީ އަށް ދާނެ އެވެ. އިސްލާމިކް ސޮލިޑާރިޓީ ގޭމްސް އޮންނާނީ ތުރުކީގެ ކޮންޔާގައި އަންނަ މަހު 9-18 އަށެވެ.