އެއްޖިންސުން ގުޅުން ހިންގި މީހުންނަށް ފިޔަވަޅު އަޅާނެ ކަމަށް އިމްރާންގެ ނުސީދާ އިންޒާރެއް!

ބަންގްލަދޭޝްގެ ފިރިހެނަކާއެކު އެއްޖިންސުން ގުޅުން ހިންގަނިކޮށް، އާންމުވި ވީޑިއޯތަކުގެ މައްސަލަ ދޫކޮށް ނުލައްވާނެ ކަމަށާއި އެ މައްސަލައާ ގުޅިގެން ގާނޫނުގެ ތެރެެއިން އެޅެން އޮތް ފިޔަވަޅެއް އަޅާނެ ކަމަށް ހޯމް މިނިސްޓަރު އިމްރާން އަބްދުﷲ ނުސީދާ ގޮތެއްގައި މިއަދު ވިދާޅުވެއްޖެ އެވެ.

މީގެ ގާތްގަނޑަކަށް މަސް ދުވަސް ކުރިން އާންމުވި، އެއްޖިންސުން ގުުޅުން ހިންގާ ވީޑިއޯތަކުގައި ތުހުމަތުވާ މީހުންނާ މެދު މާބޮޑު ފިޔަވަޅެއް ނާޅައި ދޫކޮށްލާފައި ތިބި މައްސަލައާ ގުޅިގެން ގިނަ ބައެއްގެ ފާޑުކިޔުން އިމްރާނަށް ވަނީ އަމާޒުވެފަ އެވެ.

ގިނަ ދުވަސްތަކެއް ވަންދެން އެ މައްސަލައާ ގުޅިގެން ހަނު ހުންނެވުމަށް ފަހު، އިމްރާން ކުރެއްވި ޓްވީޓެއްގައި ވިދާޅުވީ މާތްﷲ ގެ ކޯފާއަކަށް ގައުމު ހުށަހެޅޭ ފަދަ ހަޑިހުތުރު، ހަޑިމުޑުދާރު ފާހިޝް އަމަލުތައް ލޯކުރިމައްޗަށް ތަކުރާރުވާން ފެށުމުން ގާނޫނީ ހަމަތަކުގެ މަތިން އަޅަންވާ ފިޔަވަޅެއް އެޅުމަކީ ނުކޮށް ދޫކޮށްލައްވާނެ ކަމެއް ނޫން ކަމަށެވެ.

"ދީނީ ހުދޫދު ނެތިކޮށް ގައުމުގެ އިޖުތިމާއީ ފޭރާން ވީދާއި ﷲ ގެ ކޯފާއަށް ގައުމު ހުށަހެޅޭ ފަދަ ހަޑިހުތުރު މުޑުދާރު ފާހިޝް އަމަލުތައް ލޯމައްޗަށް ތަކުރާރުވާން ފެށީމަ ގާނޫނީ ހަމަތަކުގެ މަތިން އަޅަންވާ ފިޔަވަޅެއް އެޅުމަކީ އަޅުގަނޑު ނުކޮށް ދޫކޮށްލާނެ ކަމެއް ނޫން،" މި ސަރުކާރު ހިންގާ ކޯލިޝާންގެ އެއް ބައިވެރިޔާ އަދާލަތު ޕާޓީގެ ރައީސްގެ މަގާމު ވެސް ފުރުއްވާ އިމްރާންގެ ޓްވީޓުގައިވެ އެވެ.

އެއްޖިންސުން ގުޅުން ހިންގި މައްސަލަ އެ ޓުވީޓްގައި އޭނާ ފާހަގަނުކުރެއްވިޔަސް ބެލެވޭ ގޮތުގައި އެ ޓްވީޓުގައި އިޝާރާތް ކުރެއްވީ އެ މައްސަލަ އަށެވެ.

ބައެއް ސިޔާސީ މީހުންނާއި މުޖުތަމައުގައި ނަން ހިނގާ ގިންތީގައި ތިބި ބައެއް މީހުންނާއެކު އެއްޖިންސުން ގުޅުން ހިންގި ކަމަށް ވީޑިއޯތަކުން ފެންނަ ބަންގްލަދޭޝްގެ އަލަމްގީރު ހައްޔަރުކޮށް، ފުލުހުން ތަހުގީގު ކުރިޔަސް އެ ވީޑިއޯތަކުން ފެންނަ ދިވެހިން މިހާތަނަށް ހައްޔެއް ނުކުރެ އެވެ. އެހެންވެ، އަދުލު އިންސާފު ހިންގަނީ ވަކި ބައެއްގެ މައްޗަށްތޯ ބުނެ ގިނަ ބަޔަކު ދަނީ ސުވާލު އުފައްދަމުންނެވެ.

އެއްޖިންސުން ގުޅުން ހިންގި ކަމަށް ތުހުމަތު ކުރާ މައްސަލަ އާއި މި އަހަރުގެ ޔޯގާ ހަރަކާތަށް ހުރަސްއެޅި ދީނީ އިލްމުވެރިންތަކެއް ހައްޔަރުކޮށް، އެ މީހުންގެ ބަންދުގެ އިތުރުކުރުމާ ގުޅިގެން ވެސް އިމްރާން ހަނު ހުންނެވުމުން ގިނަ ބަޔަކު އަންނަނީ އިމްރާނަށް ފާޑު ކިޔަމުންނެވެ.

ދީނީ ޕާޓީއެއްގެ ގޮތުގައި އަދާލަތު ޕާޓީ ވަކާލަތުކުރަމުން އަންނައިރު ސަރުކާރު ކޯލިޝަންގައި އޮވެ، ސަރުކާރުން ހިންގާ ކަމަށް ތުހުމަތުކުރާ ދީނީ ހިލާފު ކަންކަމަށް ހިމޭނުން އޮންނަ ކަމުގެ ތުހުމަތު ކުރިޔަސް މީގެ ދެތިން ދުވަހެއް ކުރިން އެ މައްސަލައާ ގުޅިގެން ވެސް އިމްރާން ވާހަކަ ދެއްކެވި އެވެ. އޭނާ ވިދާޅުވަނީ އިލްމުވެރިންނަށް އަނިޔާ ނުކުރައްވާނެ ކަމަށެވެ.

ބިދޭސީ ފިރިހެނަކާ އެކީ އެކި މީހުން އެއްޖިންސުން ގުޅުން ހިންގާ ވީޑިއޯތަކެއް ދައުރުވަމުންދާއިރު އަދި އާންމު ނުވާ އެތައް ބައެއްގެ ވީޑިއޯ ހުރި ކަމަށް ވަނީ އެނގިފަ އެވެ. އޭގެ ތެރޭގައި ސިޔާސީ މީހުންނާއި ވިޔަފާރިވެރިންނާއި ޖިންމާދާރު އެކި މަގާމުތަކުގައި އުޅޭ މީހުން ހިމެނޭ ކަމަށް ވެ އެވެ.

ފުޅާ ދާއިރާއެއްގައި އެއްޖިންސުން ގުޅުން ހިންގުމާއި ބްްލެކްމެއިލް ކުރުމުގެ މައްސަލައިގެ ވީޑިއޯތައް މި ފަހުން އާންމުވިޔަސް ފުލުހުން ބުނީ މިދިޔަ މާޗު މަހުން ފެށިގެން އޭގެ ރިޕޯޓް ލިބިގެން، އެ މައްސަލަ ބަލަމުން އަންނަ ކަމަށެވެ. އެއްޖިންސުން ގުޅުން ހިންގުމަކީ ބޮޑު އަދަބެއް ކަނޑައަޅާފައިވާ ކުށެއް ކަމަށާއި ތަހުގީގީ އިޖުރާއަތްތަކާ އެއްގޮތަށް މައްސަލަ ބަލަމުން އަންނަ ކަމަށް ވެސް ފުލުހުން ބުނެ އެވެ.

ކުރިން ފުލުހުން ބުނެފައިވާ ގޮތުގައި އެ ވީޑިއޯތައް ސޯޝަލް މީޑިއާގައި ލީކުކުރަމުންދާ މީހުން ވެސް ވަނީ ދެނެގަނެވިފަ އެވެ.