Roadha Mihaaru
ހއ. އަށް އާރުޓީއެލް ފެރީތައް މާދަމާ ފަށަނީ

އާރުޓީއެލް ފެރީގެ ހިދުމަތް ހއ. އަށް މާދަމާ ރަސްމީކޮށް ފަށަނީ

02 ޖުލައި 2022

"ރާއްޖެ ޓްރާންސްޕޯޓް ލިންކް" (އާރުޓީއެލް)ގެ ފެރީގެ ހިދުމަތް ހއ. އަތޮޅުގައި ރަސްމީކޮށް މާދަމާ ފަށަން ނިންމައިފި އެވެ. އެ އަތޮޅުގައި ދަތުރުތައް ފެށުމަށް މިދިޔަ މަހުގެ 24 ވަނަ ދުވަހު ފަސް ލޯންޗެއް އެމްޓީސީސީއިން ވަނީ ފޮނުވައިފަ އެވެ. އޭގެ ފަހުން މިދިޔަ ހަފުތާއެއްހާ ދުވަހު ވަނީ ހއ. އަށް ހިލޭ ދަތުރުތައް ކޮށްފަ އެވެ.

ފާތިމަތު ޝަނާ މުހައްމަދު ފާތިމަތު ޝަނާ މުހައްމަދު

"ރާއްޖެ ޓްރާންސްޕޯޓް ލިންކް" (އާރުޓީއެލް)ގެ ފެރީގެ ހިދުމަތް ހއ. އަތޮޅުގައި ރަސްމީކޮށް މާދަމާ ފަށަން ނިންމައިފި އެވެ. އެ އަތޮޅުގައި ދަތުރުތައް ފެށުމަށް މިދިޔަ މަހުގެ 24 ވަނަ ދުވަހު ފަސް ލޯންޗެއް އެމްޓީސީސީއިން ވަނީ ފޮނުވައިފަ އެވެ. އޭގެ ފަހުން މިދިޔަ ހަފުތާއެއްހާ ދުވަހު ވަނީ ހއ. އަށް ހިލޭ ދަތުރުތައް ކޮށްފަ އެވެ.

ނަމަވެސް މާދަމާ އިން ފެށިގެން އެ އަތޮޅަށް އެމްޓީސީސީން ފެރީ ދަތުރުތައް ކުރާނީ ޓިކެޓް ވިއްކައިގެންނެވެ.

އާރްޓީއެލްގެ އަތޮޅުތެރޭގެ ދަތުރުތަކުގެ އަގުތައް އުޅެނީ ކޮޅަކަށް 35ރ. އާއި 100ރ. އާ ދެމެދުގަ އެވެ. ދެކޮޅުގެ ދަތުރުތައް އުޅެނީ 65ރ. އާއި 225ރ. އާ ދެމެދުގެ އަގުތަކެއްގަ އެވެ. ދަތުރުގެ އަގު ކަނޑައަޅާފައިވަނީ ދަތުރުގެ ދުރުމިނަށް ބެލުމަށް ފަހު އެވެ.

އެންމެ އަގުބޮޑުކޮށް ދަތުރުކުރަނީ އުލިގަމުން ފިއްލަދު އަށް، އުލިގަމުން ބާރަށަށް، ތުރާކުރުން މުރައިދު އަށެވެ. އެ ހަތަރު ދަތުރަށް ދެ ކޮޅަށް 225ރ. ނަގަ އެވެ.

ޕްލޭނިން މިނިސްޓްރީ ޓްވީޓް

ހއ. އަތޮޅުގެ ސްޕީޑް ފެރީގެ ދަތުރުތަކާ އެކު ޒޯން 1 ގެ ދެ އަތޮޅުގައި އާރުޓީއެލްގެ ދަތުރުތައް ފެށުނީ އެވެ. ޒޯން 1 ގައި ހިމެނޭ ށ. އަތޮޅުގެ ދަތުރުތައް ވެސް ވަރަށް އަވަހަށް އެމްޓީސީސީން ފަށާނެ އެވެ.

ހއ. ގައި ދަތުރުތައް ކުރަނީ މައިގަނޑު އަށް ރޫޓަކަށް ބަހާލައިގެންނެވެ. އޭގެ ތެރެއިން އިހަވަންދޫ އަދި ދިއްދޫން ސީދާ ދަތުރުތައް އުތުރު ވިޔަފާރީގެ ހަބު ކަމަށްވާ ހދ. ކުޅުދުއްފުށްޓަށް ކުރާނެ އެވެ. އަދި ދިއްދޫން ހދ. ހަނިމާދު އަށް ވެސް ސީދާ ދަތުރުތައް ކުރާނެ އެވެ.

ހއ. ގެ އާރްޓީއެލް ހަބް ދިއްދު އަށް، އެ އަތޮޅުގެ ފަސް ރޫޓަކުން ދަތުރުތައް ކުރާނެ އެވެ.

ސަރުކާރުގެ ވައުދުތަކުގެ ތެރޭގައި ހިމެނޭ މި ޕްރޮޖެކްޓަށް 800 މިލިއަން ރުފިޔާ ހޭދަކުރާ އިރު އެ ހިދުމަތް ދެނީ އެކި ޒޯނުތަކަށް ބަހާލައިގެންނެވެ. ޖުމުލަ ހަ ޒޯނަކަށް ބަހާލައިގެން ކުރިއަށް ގެންދާ މި މަޝްރޫއުގެ ބާކީ ފަސް ޒޯނުގައި ހިމެނެނީ 17 އަތޮޅެކެވެ. އެއީ ނ. އަތޮޅުން ފެށިގެން އައްޑު އަތޮޅާ ދެމެދެވެ. އެ އަތޮޅުގެ ފެރީގެ ހިދުމަތަކަށް ބޭނުންވާ ލޯންޗުތައް އަންނަނީ ބަންނަމުންނެވެ. އެ މަސައްކަތް ކުރަނީ ގަލްފް ކްރާފްޓާ ގުޅިގެންނެވެ.