ޔޯގާ ހަރަކާތައް ހުރަސް އަޅައި ހަމަނުޖެހުން ހިންގި މައްސަލަ ބަލާނަން: ރައީސް

ބައިނަލްއަގްވާމީ ޔޯގާ ދުވަހާ ގުޅުވައިގެން ގަލޮޅު ދަނޑުގައި މިއަދު ބޭއްވި ހަރަކާތަށް ބަޔަކު ހުރަސް އެޅި މައްސަލަ ބަލައި، ފިޔަވަޅު އަޅާނެ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.

ޔޫތު މިނިސްޓްރީ އާއި ރާއްޖޭގައި ހުންނަ އިންޑިއަން ކަލްޗަރަލް ސެންޓަރު ގުޅިގެން ހެނދުނު 6:30 ގައި ޔޯގާ ހަރަކާތް ކުރިއަށް ގެންދަނިކޮށް، "ﷲ އަކްބަރު" އޭ ގޮވަމުން ބަޔަކު އެ ތަނަށް ވަދެގަނެ، އަޑުގަދަކުރަން ފެށުމުން ޔޯގާ ހަދަން ތިބި މީހުން ބިރުން ދުއްވައިގަތީ އެވެ.

ޝަހާދަތުގެ ދެ ކަލިމަ ލިޔެފައިވާ ދިދަ ހިފައިގެން އެ މީހުން ދަނޑަށް ވަދެ، ޔޯގާ ހަދަން ތިބި މީހުންނަށް އިންޒާރު ދިން މައްސަލަ ހޫނުވެފައިވަނިކޮށް، ރައީސް ކުރެއްވި ޓްވީޓެއްގައި ވިދާޅުވީ، ގަލޮޅު ދަނޑުގައި ހިނގައިދިޔަ ހަމަނުޖެހުންތައް ފުލުހުން ތަހުގީގުކުރަން ފަށާފައިވާ ކަމަށާއި އެއީ ވަރަށް ސީރިއަސް މައްސަލައެއް ކަމަށެވެ.

"އެ މައްސަލަ ތަހުގީގު ކުރަމުން ދަނީ ވަރަށް ސީރިއަސް މައްސަލައެއްގެ ގޮތުގައި. އެކަމުގައި ޝާމިލުވާ މީހުން ގާނޫނުގެ ކުރިމައްޗަށް ގެންނާނަން،" ވަރަށް ޔަގީންކަމާއެކު ރައީސް ވިދާޅުވި އެވެ.

ދަނޑަށް ވަދެ، ޔޯގާ ހަދަން ތިބި މީހުންނަށް އިންޒާރު ދިން ވަގުތު އެ ސަރަހައްދުގައި ތިބީ ހައެއްކަ ފުލުހުންނެވެ. އެ ފުލުހުންނަށް އެ މީހުން މައިތިރި ނުކުރެވިގެން އެންމެ ފަހުން ފުލުހުންގެ ބޮޑު ފައުޖެއް އެ ސަރަހައްދަށް ގޮސް ޓިއާ ގޭސް ޖަހައިގެން އެމީހުން މައިތިރިކުރި އެވެ.

ޔޯގާ ހަރަކާތް އިންތިޒާމުކުރިކަން އިއުލާނުކުރުމާ އެކު ދީނީ އިލްމުވެރިން ވަނީ އެކަން ނުކުރުމަށް ގޮވާލަމުންނެވެ. ސަބަބެއްގެ ގޮތުގައި ބުނެފައި ވަނީ ޔޯގާއަކީ އިންޑިއާ މީހުން އަޅުކަން ކުރުމަށް ހިންގާ ހަރަކާތެއް ކަމަށެވެ.

އދ. އިން ވަނީ 2014 ވަނަ އަހަރުން ފެށިގެން ކޮންމެ އަހަރެއްގެ ޖޫން 21 ވަނަ ދުވަހަކީ ބައިނަލްއަގްވާމީ ޔޯގާ ދުވަހުގެ ގޮތުގައި ފާހަގަކުރަން ނިންމައިފަ އެވެ. ޔޯގާ ދުވަސް ފާހަގަކުރަން އޭރު އދ. އަށް ހުށަހެޅި ގަރާރު ކޯ-ސްޕޮންސާ ކުރަން ވޯޓު ދިން 177 ގައުމުގެ ތެރޭގައި ރާއްޖެ ވެސް ހިމެނެ އެވެ. އޭގެ ފަހުން ރާއްޖޭގައި ވެސް ކޮންމެ އަހަރަކު ކަހަލަ ގޮތަކަށް ޔޯގާ ހަރަކާތެއް ބޭއްވި އެވެ.