ބީޓީއެސްގެ އާ އަލްބަމަށް ދުނިޔޭގެ ރެކޯޑުތައް

ކޭ-ޕޮޕްގެ އެންމެ މަޝްހޫރު އެއް ގްރޫޕް ކަމަށްވާ ބީޓީއެސް އިން ނެރުނު އާ އަލްބަމާ އެކު ދުނިޔޭގެ މިއުޒިކް ޗާޓުތަކުގައި ރެކޯޑުތައް މުގުރަން ފަށައިފި އެވެ.

ބީޓީއެސް އިން ވަނީ މިދިޔަ ހަފުތާ ބަންދުގައި އެ ގްރޫޕުގެ މިނީ އަލްބަމް "ޔެޓް ޓު ކަމް (ދަ މޯސްޓް ބިއުޓިފުލް މޯމެންޓް)" ނެރެފަ އެވެ.

އެ އަލްބަމް އަކީ ބީޓީއެސްގެ ކުރީގެ ހިޓްތައް ވެސް ހިމެނޭ އަލްބަމެކެވެ. އޭގެ އިތުރުން، މުޅިން އާ ތިން އޮރިޖިނަލް ވެސް އެ އަލްބަމްގައި ހިމެނެ އެވެ.

އަލްބަމް ރިލީޒްކޮށް މާ ގިނަ އިރުތަކެއް ނުވަނީސް އެ އަލްބަމް އާއި އަލްބަމްގެ އޮރިޖިނަލް ލަވަތައް ވަނީ ރެކޯޑުތައް މުގުރަން ފަށައިފަ އެވެ. އަލްބަމްގެ ތިން ލަވަ ވަނީ ސްޕޮޓިފައިގެ "ޓޮޕް 200"ގެ ގަދަ 10ގައި ހިމެނިފަ އެވެ.

ކުރީގެ ބައެއް ލަވަތައް ވެސް ވަނީ ޗާޓަށް އަރައިފަ އެވެ. އަލްބަމްގައި ހިމެނޭ އާ ލަވަ "ޔެޓް ޓު ކަމް" ވަނީ އެއް ދުވަސްތެރޭގައި ހަތް މިލިއަން ސްޓްރީމް ހޯދައި، ޗާޓުގެ ތިންވަނައިގައި ހިމެނިފަ އެވެ.

އަލަށް ނެރުނު އަލްބަމަކީ ތިން ޓްރެކްލިސްޓަށް ދެމިގެންދާ 48 ލަވައިގެ އަލްބަމެކެވެ. އެ އަލްބަމްގައި ބީޓީއެސްގެ އެންމެ ކުރީގެ އަލްބަމްތަކުން ލަވަތައް ވެސް ހިމަނާފައިވެ އެވެ.