ޓީއެމްއޭގެ އެމްޕްލޯއީ ރިކޮގްނިޝަން ޕްރޮގްރާމް ބާއްވައިފި

ޓްރާންސް މޯލްޑިވިއަން އެއާވޭޒް (ޓީއެމްއޭ) އިން އެ ކުންފުނީގެ މުވައްޒަފުންގެ މަސައްކަތްތައް ފާހަގަކުރުމަށް ކޮންމެ އަހަރަކު ވެސް ކުރިއަށް ގެންދާ އެމްޕްލޯއީ ރޮކޮގްނިޝަން ޕްރޮގްރާމް ބާއްވައިފި އެވެ.

މި ޕްރޮގްރާމު މި އަހަރު ބާއްވާފައި ވަނީ ކޮވިޑުގެ ބަލިމަޑުކަމާއި ގުޅިގެން އައި މެދު ކެނޑުމަކަށް ފަހު އެވެ. މި ޕްރޮގްރާމު ކުރިއަށް ގެންދިއުމަށް ބޭއްވި ރަސްމިއްޔާތުގައި ޓީއެމްއޭގެ ސީއީއޯ އޭޔޫއެމް ފައުޒީ އާއި ކުންފުނީގެ ސީނިއާ މެނޭޖްމެންޓުގެ ބޭފުޅުން ބައިވެރިވެވަޑައިގެންނެވި އެވެ. މި ރަސްމިއްޔާތުގައި ކޮވިޑުގެ ތެރޭގައި ފާހަގަކުރެވޭ ހިދުމަތްތަކެއް ކޮށްފައިވާ ޓީއެމްއޭގެ 13 ޑިޕާޓްމަންޓެއްގެ 99 މުވައްޒަފަކަށް ވަނީ އެވޯޑު ދީފަ އެވެ.

ޓީއެމްއޭ އަކީ އެ ކުންފުނީގެ މުވައްޒަފުންގެ މަސައްކަތްތައް އަބަދުވެސް ފާހަގަކުރާ ކުންފުންޏެކެވެ. އެ ކުންފުނިން ބުނީ ކުންފުނީ އެންމެ އަގުހުރި ރިސޯސް އަކީ ކުންފުނީގެ މުވައްޒަފުން ކަމަށާއި މި ފަދަ ޕްރޮގްރާމުތައް ބާއްވަނީ އެ މުވައްޒަފުންގެ މަސައްކަތްތަކަށް އިތުރު ހިތްވަރެއް ދިނުމަށް ކަމަށެވެ.

ޓީއެމްއޭ އަކީ ރާއްޖޭގައި އެންމެ ގިނަ ސީޕްލޭން ދަތުރުތައް ކުރާ ކުންފުންޏެވެ. އެގޮތުން މިހާރު ވެސް ރާއްޖޭގެ 80 އަށް ވުރެ ގިނަ ރިސޯޓުތަކަށް ޓީއެމްއޭ އިން ދަތުރު ކުރެއެވެ.