ފައިނަލުގެ ފުރަތަމަ ޖާގަ ހުޅުމާލެ ވެޓެރަންސް ކްލަބަށް

މޯލްޑިވްސް ސޮކަ މޭޓްސް އާ ދެކޮޅަށް ކުޅުނު މެޗު 1-1 ން އެއްވަރުކޮށް، ކުރީގެ ފުޓްބޯޅަ ކުޅުންތެރިންނަށް ހާއްސަކޮށް ބާއްވާ ރަމަޒާން ވެޓެރަންސް ކަޕްގެ ފައިނަލުގެ ފުރަތަމަ ޖާގަ ހުޅުމާލެ ވެޓެރަންސް ކްލަބުން ހޯދައިފި އެވެ.

މިއަދުގެ މެޗާ ހަމައަށް އައިރު، ހުޅުމާލޭ ވެޓެރަންސް ކުރިއަށް ދިޔައީ ކުޅުނު ހުރިހާ މެޗަކުން މޮޅުވަމުންނެވެ. މިއަދު ސޮކާ މޭޓްސް އާ ދެކޮޅަށް ކުޅުނު މެޗު އެއްވަރު ވިއަސް އެޓީމަށް ފައިނަލުގެ ޖާގަ ލިބުނީ ގަދަ ދޭކުން އެޓީމު ކައްސާނުލާނެކަން ޔަގީންވުމުންނެވެ.

މާފަންނު ސްޓޭޑިއަމްގައި އޮންނަ އެފްއޭއެމް ޓާފް 1 ގައި ކުޅުނު މެޗުގެ ފުރަތަމަ ލީޑް ނެގީ ސޮކަ މޭޓްސްއިންނެވެ. އެލަނޑު މެޗުގެ 20 ވަނަ މިނެޓްގައި ޖެހީ އަހްމަދު މަމްދޫހް އެވެ. ހުޅުމާލެ ޓީމަށް ނަތީޖާ ހަމަހަމަކޮށްދިން ލަނޑު ޖެހީ ގައުމީ ޓީމުގެ ކުރީގެ ވިންގް ފޯވާޑް އިސްމާއީލް މުހައްމަދު (އިއްސޭ) އެވެ.

ކުޅުނު ފަސް މެޗުގައި ހުޅުމާލެ ވެޓެރަންސް އަށް ލިބުނީ 13 ޕޮއިންޓެވެ. ފައިނަލުގެ ދެވަނަ ޖާގަ އަށް ވާދަ ކުރާނީ ސޮކަ މޭޓްސް އާއި ދަ ގްރާންޑޭ އެވެ. ސޮކަ މޭޓްސް ތިންވަނައިގައި އޮތީ އަށް ޕޮއިންޓާ އެކު އެވެ. ދެވަނައިގައި އޮތް ދަ ގްރާންޑޭ އަށް ނުވަ ޕޮއިންޓެވެ.

މާދަމާ ދަ ގްރާންޑޭ ނުކުންނާނީ ކްލަބް އީގަލްސްއާ ދެކޮޅަށެވެ. މުބާރާތުގެ ފައިނަލު މެޗު އޮންނާނީ މިމަހުގެ 30 ގަ އެވެ.

ވެޓެރަންސް ކަޕް މިފަހަރު މިބާއްވަނީ ބާއްވަނީ ދެ އަހަރުގެ މެދުކެނޑުމަކަށްފަހު އެވެ. ކޮވިޑް-19 އާ ގުޅިގެން 2020 އަދި 2021 ގައި މުބާރާތް ބާއްވާފައެއް ނުވެ އެވެ. މުބާރާތުގެ އެންމެ ފަހުގެ ޗެމްޕިއަނަކީ 2019 ގެ މުބާރާތް ކާމިޔާބު ކުރި މާޒިޔާ އެވެ. މިފަހަރުގެ މުބާރާތުގައި އެޓީމުން ވާދައެއް ނުކުރެ އެވެ.