ލޭންޑިން ގިއަރު ތާށިވެ، މޯލްޑިވިއަންގެ ފްލައިޓެއް އިމަޖެންސީގައި ވެލާނާ އެއާޕޯޓަށް ޖައްސައިފި

މޯލްޑިވިއަންގެ ފްލައިޓެއް ލ. ކައްދޫ އެއާޕޯޓަށް މިރޭ ޖައްސަން އުޅެނިކޮށް، އެ ފްލައިޓްގެ ލޭންޑިން ގިއަރު ތާށިވެ، އެނބުރި އައިސް ކުއްލި ހާލަތުގައި ވެނާލާ އިންޓަނޭޝަނަލް އެއާޕޯޓް (ވީއައިއޭ) އަށް ޖައްސައިފި އެވެ.

އެ ހާދިސާގައި އެއްވެސް މީހަކަށް އަނިޔާއެއް ނުވެ އެވެ.

އެމްއޭސީއެލްގެ މީޑިއާ އޮފިޝަލް ޝަމްއާން ޝާކިރު "މިހާރު" އަށް ވިދާޅުވީ ވީއައިއޭ އިން ފުރައިގެން ކައްދު އަށް ދަތުރުކުރި އެ މަތިންދާބޯޓް، ކައްދޫ އެއާޕޯޓުގައި ޖެއްސުމަށް ލޭންޑިން ގިއަރު ހުޅުވަން އުޅުނު ނަމަވެސް، އެ ނުހުޅުވުމުން މިރޭ އަށެއް ޖާހަކަންހާއިރު ކުއްލި ހާލަތުގައި ވެލާނާ ވީއައިއޭ އަށް ޖެއްސީ ކަމަށެެވެ.

"އިމަޖެންސީގައި އައިސް، އެއްވެސް އިތުރު ނުރައްކާތެރި ކަމެއް ދިމާނުވެ ޖެއްސީ،" އޭނާ ވިދާޅުވި އެވެ.

ޝަމްއާން ވިދާޅުވީ ލޭންޑިން ގިއަރު ތާށިވުން ފިޔަވައިއި، އިތުރު މައްސަލައެއް ޖެހުނުކަން އަދި ކަށަވަރުނުވާ ކަމަށެވެ.

މޯލްޑިވިއަން ހިންގާ އައިލެންޑް އޭވިއޭޝަން ކުންފުނީގެ އިސްވެރިން ފޯނަށް ޖަވާބު ނުދެއްވާތީ އެ ބޭފުޅުންގެ ބަހެއް އަދި ނުލިބެ އެވެ.