ރަޝިއާއާ ދެކޮޅު ވޯޓުގައި ރާއްޖޭން މިފަހަރު ވޯޓެއް ނުދިން

ރަޝިއާގެ ސިފައިން ޔުކްރެއިނަށް އަރައި ދެމުން ގެންދާ ހަމަލާތަކާ ގުޅިގެން އދ. ގެ އިންސާނީ ހައްގުތަކާ ބެހޭ ކައުންސިލުން ރަޝިއާ ސަސްޕެންޑްކުރަން ނެގި ވޯޓުގައި ރާއްޖޭން މިފަހަރު ވަކި ކޮޅަކަށް ވޯޓެއް ނުދިނެވެ.

ނަމަވެސް ޔުކްރެއިނަށް ދެމުންދާ ހަމަލާތައް ކުށްވެރިކޮށް ރަޝިއާގެ ސިފައިން ވަގުތުން ފޭބުމަށް ގޮވާލައި އދ. ގެ އާންމު މަޖިލީހުގައި މިދިޔަ މަހު ނެގި ވޯޓުގައި ރަޝިއާއާ ދެކޮޅަށް ރާއްޖޭން ވޯޓު ދިނެވެ.

އދ. ގެ ހިއުމަން ރައިޓްސް ކައުންސިލުން ރަޝިއާ ސަސްޕެންޑްކުރުމަށް 193 ގައުމުގެ ތެރެއިން 93 ގައުމަކުން ތާއީދުކުރިއިރު 58 ގައުމަކުން މި ވޯޓުގައި ވަކި ކޮޅަކަށް ވޯޓެއް ނުދެ އެވެ. ރާއްޖެ ހިމެނޭ ގޮތަށް މި ސަރަހައްދުގެ އެހެން ގައުމުތައް ހިމެނެނީ މި ލިސްޓުގަ އެވެ. ވޯޓުގައި ބައިވެރިނުވާ 18 ގައުމެއް އޮތެވެ.

ހިއުމަން ރައިޓްސް ކައުންސިލުން ރަޝިއާ ސަސްޕެންޑްކުރުމަށް ފާސްކުރަން ނިންމި ނިންމުމާ އެކު ރަޝިއާގެ އދ. ގެ ޑެޕިއުޓީ އެމްބެސަޑަރު ޖެނަންޑީ ކުޒްމިން ވިދާޅުވީ އެއީ ގަވާއިދުތަކާ ހިލާފު އަދި ސިޔާސީ މަންފާއަކަށް ފާސްކުރި ނިންމުމެއް ކަމަށެވެ.

ވޯޓަށް ފަހު އޭނާ ވިދާޅުވީ ރަޝިއާ އޮތީ އެ ކައުންސިލުން ވަކިވާން އަމިއްލައަށް ނިންމައިގެން ކަމަށެވެ.

ރަޝިއާއާ ދެކޮޅަށް ބޮޑެތި ބައެއް ގައުމުތަކުން ވޯޓު ދިނަސް ޗައިނާއިން ވަނީ އެގައުމު ސަސްޕެންޑް ކުރަން ނުފެންނަ ކަމަށް ވޯޓު ދީފަ އެވެ.

ވޯޓުގެ ކުރިން، ޗައިނާ އިން އދ. އަށް ކަނޑައަޅުއްވާފައި ހުންނަވާ އެމްބެސެޑަރު ޒަންގް ޖުން ވަނީ އާންމު މަޖިލީހުން މާ އަވަސް އަރުވާލައިގެން ގޮތް ނިންމަން އުޅޭތީ ގައުމުތަކަށް ވަކި ކޮޅެއް ނަގަން މަޖުބޫރުވާ ކަމަށް ވިދަޅުވެ އެކަމުގެ ކަންބޮޑުވުން ފާޅުކުރައްވައިފަ އެވެ. އޭނާ ސިފަ ކުރެއްވި ގޮތުގައި އެކަމަކީ "އަނދައަނދައި ހުރި އަލިފާނަށް ތެޔޮ އެޅުން" ފަދަ ކަމެކެވެ.

އދ. ގެ ހިއުމަން ރައިޓްސް ކައުންސިލަށް ތިން އަހަރުގެ މުއްދަތަކަށް ރަޝިއާ އިންތިހާބުކޮށްފައި އޮއްވައި މި ސަސްޕެންޑްކުރީ ދެވަނަ އަހަރުގަ އެވެ. އާންމު މަޖިލީހުން ނިންމައިގެން ރަޝިއާގެ ސަސްޕެންޝަން ފަހުން އުވާލެވެން އޮތް ނަމަވެސް ރަޝިއާ އިން އަމިއްލައަށް ކައުންސިލުން ވަކިވާން ނިންމުމުން ދެން އެގޮތަށް އަމަލެއް ނުކުރާނެ އެވެ.

ހިއުމަން ރައިޓްސް ކައުންސިލުން މީގެ ކުރިން ވެސް އެކި މައްސަލަތަކުގައި ގައުމުތައް ސަސްޕެންޑްކުރަން ނިންމުމުން އަމިއްލައަށް ވަކިވެފައިވެ އެވެ. އެމެރިކާ ވަނީ 2018 ވަނަ އަހަރު އިޒްރޭލާ އެއްކޮޅަށް އޮތްކަން ދެއްކުމުގެ ގޮތުން ކައުންސިލުން ވަކިވެފަ އެވެ.

އެ ކައުންސިލަކީ ގާނޫނީ ނިންމުންތައް ނިންމޭ ކައުންސިލަކަށް ނުވިޔަސް މިއީ ސިޔާސީ ގޮތުން މުހިއްމު މެސެޖްތަކެއް ދޭ ކައުންސިލެކެވެ. އަދި ތަހުގީގުތައް ހިންގުމުގެ ބާރު ވެސް ލިބިފައިވާ މި ކައުންސިލުން ވަނީ ޔުކްރެއިންގެ ހައްގުތައް ނިގުޅައިގަތުމުގެ ތުހުމަތުކުރާތީ އެ މައްސަލަ ތަހުގީގުކުރަން ފަށައިފަ އެވެ.