މިރޭ ރޯދައަށް ހަނދު ފެނިދާނެ؟

ދިވެހިރާއްޖެ އާއި އިސްލާމީ ގިނަ ގައުމުތަކަށް މިއަދަކީ (އެޕްރީލް 1، 2022، ހުކުރު)، މި އަހަރުގެ ޝައުބާން މަހުގެ 29 ވަނަ ދުވަހެވެ. އެހެންކަމުން، ޒަމާނުއްސުރެ އަމަލުކުރަމުން އަންނަ ދީނީ އަދި ސަގާފީ އާދަކާދައިގެ މަތިން، މިއަހަރުގެ ރަމަޟާން މަހަށް ހަނދު ބެލުން، އެ ގައުމުތަކުގައި މިއަދު އޮންނާނެ އެވެ.

އެ ދުވަސްވަރެއްގައި ހަނދާއި މި ބިމާ ދެމެދު ހުންނަ ދުރުމިނުގެ ތަފާތާއި މި ބިމުގެ ވަށައިގެން ހަނދު ދައުރުކުރާ ބާރުމިނަށް ބަލާއިރު، ހިޖްރީ މައްސަރުގެ ދުވަހުގެ އަދަދު އެކި މައްސަރުގައި ތަފާތުވެ އެވެ. ކީރިތި މާތް ނަބިއްޔާގެ ސުންނަތުން ސާބިތުވާ ގޮތުގައި، ކޮންމެ ހަނދު މަހެއްގައި ވެސް މަދުވެގެން 29 ދުވަސް އޮންނާނެ އެވެ. އަދި ބައެއް މައްސަރު އެ އަށް ވުރެ ދިގުވެ 30 ދުވަސް އަތުވެދާނެ އެވެ. ޢިލްމީ ހޯދުންތަކުން ވެސް ކަށަވަރުވަނީ، ހަނދު މަހެއްގެ އެންމެ ކުރު މުއްދަތަކީ 29 ދުވަސް ކަމެވެ. އަދި އެންމެ ދިގު މުއްދަތަކީ 30 ދުވަސް ކަމެވެ.

މަހެއްގެ 29 ވަނަ ދުވަހުގެ އިރު އޮއްސުމަށް ފަހުގައި، ހުޅަނގު ފަރާތު އުދަރެހުގައި ހަނދު ހުންނަނީ، އެ މައްސަރެއްގެ 29 ވަނަ ދުވަހުގެ އިރު އޮއްސުމުގެ ކުރިން، ހަނދުގެ އުމުރުން 29 ދުވަސް ފުރިހަމަވެފައި، މި ބިމުގެ ވަށައިގެން ހަނދު ޖަހަމުން ދިޔަ ބުރު ވެސް ފުރިހަމަވުމުންނެވެ. އެއީ 29 ދުވަހުގެ މައްސަރެކެވެ.

މަހުގެ 29 ވަނަ ދުވަހުގެ އިރު އޮއްސުމަށް ފަހުގައި، ހުޅަނގު ފަރާތު އުދަރެހުގައި ހަނދު ނުހުންނަނީ، އެ މައްސަރެއްގެ 29 ވަނަ ދުވަހުގެ އިރު އޮއްސުމުގެ ކުރިން، ހަނދުގެ އުމުރުން 29 ދުވަސް ފުރިހަމަވެފައި ވިޔަސް، މި ބިމުގެ ވަށައިގެން ހަނދު ޖަހަމުން ދިޔަ ބުރު ފުރިހަމަ ނުވާތީއެވެ. އެހެންކަމުން އެއީ 30 ދުވަހުގެ މައްސަރެކެވެ.

މިގޮތަށް ހަނދު މަހުގެ ދުވަސްތައް ގުނަނީ، އިރާއި ބިމާއި ހަނދު އެއްއުއި (ކޮންޖަންކްޝަން ނުވަތަ އިޤްތިރާން) ވާ ވަގުތުން ފެށިގެން، ހަނދު، މި ބިމުގެ ވަށައިގެން ބުރެއް ފުރިހަމަ ކުރާ ވަގުތަށެވެ. ހިނގަމުން މިދާ ޝަޢުބާން މަސް ފެށުމަށްޓަކައި، ބިމުގެ ވަށައިގެން ހަނދު ޖަހާ ބުރު ފެށިފައިވަނީ މިދިޔަ މާރިޗް މަހުގެ 2 ވަނަ ދުވަހު ރާއްޖޭ ގަޑިން 22:34 (ޖީއެމްޓީން އެ ދުވަހުގެ 17:34)ގަ އެވެ.

އެހެންކަމުން، މިއަދު (އެޕްރީލް 1، 2022) ރާއްޖެ އަށް އިރު އެރި އިރު، ހިނގަމުން މިދާ ޝަޢުބާން މަހުގެ ހަނދުގެ ޢުމުރުން 29 ދުވަހާއި، 7 ގަޑިއިރާއި 31 މިނެޓް ހޭދަވެއްޖެ އެވެ. އަދި ކުރިން ދެންނެވި ފަދައިން، މާރިޗް މަހުގެ 2 ވަނަ ދުވަހު ރާއްޖޭ ގަޑިން 22:34 (ޖީއެމްޓީން އެ ދުވަހުގެ 17:34)ގައި، މި ބިމުގެ ވަށައިގެން، (ޝައުބާން މަހުގެ) ހަނދު ޖަހަން ފެށި ބުރު، މިއަދުގެ 11:24 ގައި ހަމަވެ އެވެ.

މީގެ މާނައަކީ، އިރު ހަނދުގެ ދައުރާނާގައި މާތް ﷲ ލައްވަވާފައިވާ ފުރިހަމަ ނިޒާމުގެ މަތިން، މިއަދުގެ 11:24 ގައި އިރާއި ހަނދާއި ބިން އެއްއުއި (އިޤްތިރާން ނުވަތަ ކޮންޖަންކްޝަން) ވުމާއެކު، ހިނގަމުން މިދާ ޝަޢުބާން މަސް ފުރިހަމަވެ، ޤުދުރަތީ ނިޒާމުގެ ތެރެއިން، ނުވަތަ ފަލަކީ ގޮތުން މިއަހަރުގެ ރަމަޟާން މަހުގެ ހަނދު އުފަންވީ އެވެ.

އެހެންކަމުން، މިއަދަކީ ޝަޢުބާން މަހުގެ 29 ވަނަ ދުވަސް ކަމަށްވުމާއެކު، ހަނދު މަހެއްގެ ފެށުމާއި ނިމުން ދެނެގަތުމުގައި ޝަރުޢީ ހަމަތަކުގެ މަތިން ކަނޑައެޅިފައިވާ ދެ ޝަރުތު ވެސް މިއަދުގެ އިރު އޮއްސުމާއެކު ފުރިހަމަވާނެ އެވެ. ދެން އޮތީ މިއަދުގެ އިރު އޮއްސުމަށް ފަހުގައި، އުދަރެހުން މަތީގައި ހަނދު ހުންނާނެތޯ ބެލުމެވެ.

ފަލަކީ ހިސާބުން ކަށަވަރުވާ ގޮތުގައި، ދުނިޔޭގެ އެންމެ އިރުމަތީގައި އޮތް އިސްލާމީ ޤައުމު ކަމަށްވާ ބުރޫނާއީ ދާރުއްސަލާމުން ފެށިގެން، އެންމެ ހުޅަނގުގައިވާ އިސްލާމީ ދެ ޤައުމު ކަމަށްވާ ޓެންޒޭނިޔާ އާއި މޮރޮކޯ އަށް ވެސް، އަދި މި ދެމެދުގައިވާ އެއްވެސް ގައުމަކަށް، މިއަދުގެ އިރު އޮއްސޭއިރު ހަނދެއް ނުއޮއްސޭނެ އެވެ.

ބުރޫނާއީ ދާރުއްސަލާމަށް މިއަދުގެ އިރު އޮއްސުމަށް ފަހު، 8 މިނެޓް ވަންދެން އުދަރެހުން މަތީގައި ހަނދު ހުންނާނެ އެވެ. އިންޑޮނީޝިޔާގެ ޖަކާޓާ އަށް ވެސް މިއަދުގެ އިރު އޮއްސުމަށް ފަހު، 11 މިނެޓް ވަންދެން އުދަރެހުން މަތީގައި ހަނދު ހުންނާނެ އެވެ.

މެދުއިރުމަތިން ސައޫދީ އަރަބިއްޔާގެ މައްކާ އާއި މަދީނާ އަށް މިއަދުގެ އިރު އޮއްސުމަށް ފަހު، 17 މިނެޓް ވަންދެން އުދަރެހުން މަތީގައި ހަނދު ހުންނާނެ އެވެ. މިސްރުގެ އިސްކަންދަރިއްޔާ އަށް މިއަދުގެ އިރު އޮއްސުމަށް ފަހު، 18 މިނެޓް ވަންދެން އުދަރެހުން މަތީގައި ހަނދު ހުންނާނެ އެވެ. އަދި ގާހިރާ އަށް 17 މިނެޓް ވަންދެން އުދަރެހުން މަތީގައި ހަނދު ހުންނާނެ އެވެ.

ތުރުކީ ވިލާތުގެ ވެރިރަށް އިސްތަންބޯލަށް މިއަދުގެ އިރު އޮއްސުމަށް ފަހު، 16 މިނެޓް ވަންދެން އުދަރެހުން މަތީގައި ހަނދު ހުންނާނެ އެވެ. އަދި އެންމެ ހުޅަނގުން މޮރޮކޯގެ ވެރިރަށް ރަބާތަށް މިއަދުގެ އިރު އޮއްސުމަށް ފަހު، 23 މިނެޓް ވަންދެން، އަދި ސެނެގޯލްގެ ވެރިރަށް ޑަކާރް އަށް، އިރު އޮއްސުމަށް ފަހު 26 މިނެޓް ވަންދެން އުދަރެހުން މަތީގައި ހަނދު ހުންނާނެ އެވެ.

ރާއްޖޭގެ އެންމެ އުތުރުގައި އޮތް ތުރާކުނަށް މިއަދުގެ އިރު އޮއްސުމަށް ފަހު، 13 މިނެޓް ވަންދެން އުދަރެހުން މަތީގައި ހަނދު ހުންނާނެ އެވެ. އަދި ރާއްޖޭގެ އެންމެ ހުޅަނގުގައި އޮތް ހދ. މަކުނުދު އަށް ވެސް މިއަދުގެ އިރު އޮއްސުމަށް ފަހު، 13 މިނެޓް ވަންދެން އުދަރެހުން މަތީގައި ހަނދު ހުންނާނެ އެވެ. ރާއްޖޭގެ އެންމެ އިރުމަތީގައި އޮތް، މީހުން ދިރިއުޅޭ ރަށް ކަމަށްވާ ކ. ދިއްފުއްޓަށް ވެސް، މިއަދުގެ އިރު އޮއްސުމަށް ފަހު، 13 މިނެޓް ވަންދެން އުދަރެހުން މަތީގައި ހަނދު ހުންނާނެ އެވެ.

ރާއްޖޭގެ ވެރިރަށް މާލެއަށް މިއަދުގެ އިރު އޮއްސުމަށް ފަހު، 14 މިނެޓް ވަންދެން އުދަރެހުން މަތީގައި ހަނދު ހުންނާނެ އެވެ. އަދި ރާއްޖޭގެ އެންމެ ދެކުނުން އައްޑޫ ހިތަދު އަށް ވެސް މިއަދުގެ އިރު އޮއްސުމަށް ފަހު، 14 މިނެޓް ވަންދެން އުދަރެހުން މަތީގައި ހަނދު ހުންނާނެ އެވެ.

ކުރިން މިދެންނެވި ހިސާބުތަކުން ކަށަވަރުވަނީ، އެންމެ އިރުމަތީގައިވާ ބުރޫނާއީން ފެށިގެން އެންމެ ހުޅަނގުގައިވާ މޮރޮކޯ އާއި ސެނެގޯލްއާ ދެމެދު ހުރި ހުރިހާ ގައުމަކަށް ވެސް، މިއަދުގެ އިރު އޮއްސުމަށް ފަހު 8 މިނެޓާއި 26 މިނެޓާ ދެމެދުގެ މުއްދަތެއް ވަންދެން، އުދަރެހުން މަތީގައި ހަނދު ހުންނާނެ ކަމެވެ.

މިހެންވުމުން، މިއަދުގެ އިރު އޮއްސުމަށް ފަހުގައި، ހުޅަނގު ފަރާތު އުދަރެހުގައި ހަނދު ހުންނާނެކަން އެއްވެސް ޝައްކެއް ނެތް މިންވަރަށް ސާބިތުވެ އެވެ. ނަމަވެސް ލޮލަށް ހަނދު ފެނުމާއި ނުފެނުމަކީ އެތައް ކަމެއްގެ މައްޗަށް ބިނާވެފައި އޮންނަ ކަމެކެވެ.

އޭގެ ތެރޭގައި، އިރު އޮއްސޭ ވަގުތު، މި ބިމުގެ ނިސްބަތުން އިރާއި ހަނދާ ދެމެދުގައި ހުންނަ ދަރަޖައިގެ ތަފާތު، އަދި އިރު އޮއްސޭ ވަގުތު އުދަރެހުން ފެށިގެން ހަނދު ހުންނަ އުސްމިނުގެ ތަފާތު ހިމެނެ އެވެ. މި ދެ ކަންތަކުގެ އިތުރުން، އިރު އޮއްސޭ ވަގުތު، ހަނދު ހުރި މިސްރާބުން ހުޅަނގު ފަރާތު އުދަރެހަށް އިރުގެ ދަޅަ އެޅިފައި ހުންނަ މިންވަރު ވެސް، ލޮލަށް ހަނދު ފެނުމާއި ނުފެނުމުގައި މުހިންމު ދައުރެއް އަދާކުރެ އެވެ.

މީގެ އިތުރުން، އިރު އޮއްސޭ ވަގުތު ހުޅަނގު ފަރާތު ޖައްވުގެ ހާލަތު ހުންނަ ގޮތް ވެސް ލޮލަށް ހަނދު ފެނުމާއި ނުފެނުމުގައި މުހިންމު ދައުރެއް އަދާކުރެ އެވެ. ބޮކިތަކުގެ އަލި ފަދަ ސިނާއީ އަލިތައް ޖައްވުގެ ތެރެއަށް އެޅިފައި ހުރުމާއި، ޖައްވުގެ ތެރޭގައި ވިލަޔާއި ހިރަފުހާއި ފުސްކަން ހުންނަ މިންވަރު ވެސް، އެކަމުގައި ވަރަށް މުހިންމު ދައުރެއް އަދާކުރެ އެވެ.

އިސްވެ ދިޔަ ހިސާބުތަކަށް ރިއާޔަތްކުރާ އިރު، 2022 އެޕްރީލް 1 ވާ ހުކުރު ދުވަހަކީ، 1443 ވަނަ އަހަރުގެ ޝަޢުބާން މަހުގެ 29 ވަނަ ދުވަހެވެ. އަދި 1443 ވަނަ އަހަރުގެ މުލަ ރޯދަ ދުވަހަކީ، 2022 އެޕްރީލް 2 ވާ ހޮނިހިރު ދުވަހެވެ.