ސީސީޓީވީ ކެމެރާއިން ފަނޑިޔާރުންނަށް ފާރަލީކަމުގެ ތުހުމަތުގައި ސުޕްރީމް ކޯޓުގެ އެސްޖީ ސަސްޕެންޑްކޮށްފި

ސީސީޓީވީ ކެމެރާ ބޭނުންކޮށްގެން ސުޕްރީމް ކޯޓުގެ ފަނޑިޔާރުންނަށް ފާރަލީކަމުގެ ތުހުމަތުގައި އެ ކޯޓުގެ ސެކްރެޓަރީ ޖެނެރަލް ޑރ. ހުސައިން ފާއިޒް މިއަދު ސަސްޕެންޑްކޮށްފި އެވެ.

ޗީފް ޖުޑީޝަލް އެޑްމިނިސްޓްރޭޓަރު އައިޝަތު ރިޒްނާ "މިހާރު" އަށް މިރޭ ވިދާޅުވީ ފާއިޒް ސަސްޕެންޑްކުރީ ސުޕްރީމް ކޯޓުން ހެދި ސެކިއުރިޓީ އޮޑިޓަކަށް ފަހު ކަމަށެވެ. އޭނާގެ މައްޗަށް ކުރާ ތުހުމަތުގެ ތަހުގީގު ފަށަންދެން ނުވަތަ ކަނޑައަޅާ މުއްދަތަކަށް އޭނާ މަގާމުން ދުރުކޮށްފައިވާ ކަމަށް ރިޒްނާ ވިދާޅުވި އެވެ.

"ފާއިޒްގެ މައްޗަށް ތުހުމަތުކުރެވެނީ ސީސީޓީވީ ކެމެރާތައް ބޭނުންކޮށްގެން ފަނޑިޔާރުންނަށް ފާރަލުމާއި އަދި ސުޕްރީމް ކޯޓުގެ މައުލޫމާތު ބޭރުކުރުމުގެ ތުހުމަތު،" ރިޒްނާ ވިދާޅުވި އެވެ.

ސުޕްރީމް ކޯޓުގެ އެސްޖީގެ މަގާމަށް ފާއިޒް އައްޔަންކުރީ ޖެނުއަރީ 7، 2019 ގަ އެވެ. އޭނާ އެ މަގާމަށް އައްޔަންކުރެއްވީ ފަސް އަހަރުގެ މުއްދަތަކަށެވެ.

ސުޕްރީމް ކޯޓުގެ އެސްޖީގެ މަސްއޫލިއްޔަތުގެ ތެރޭގައި، އެ ކޯޓުގެ އިދާރީ ކަންތައްތައް ހިނގަމުންދަނީ އެ ކޯޓުގެ ފަނޑިޔާރުންގެ މަޖިލީހުން ކަނޑައަޅާ އުސޫލުތަކާ އެއްގޮތަށްތޯ ކަށަވަރުކުރުމާއި އެސްޖީއާ ހަވާލުކޮށްފައިވާ ދާއިރާއާ ގުޅޭ ސިޔާސަތުތައް އެކުލަވާލައި މަޝްރޫއުތައް ރޭވުމަށް ބޭނުންވާ މައުލޫމާތު ފަނޑިޔާރުންގެ މަޖިލީހަށް ފޯރުކޮށްދިނުން ހިމެނެ އެވެ.

ސުޕްރީމް ކޯޓުގެ ކުރިއެރުމާއި ތަރައްގީގެ މަޝްރޫއުތަކާއި އަދި ބޭނުންވާ ސްޓްރެޓިޖިކް ޕްލޭން އަދި އެކިއެކި ހަރަކާތްތަކުގެ މަސައްކަތު ތާވަލު އެކުލަވައި، ތަންފީޒުކޮށް ހިންގައި މޮނިޓަރުކޮށް، ބެލެހެއްޓުން ފަދަ މަސައްކަތްތަކަކީ ވެސް އެ މަގާމުގެ މަސްއޫލިއްޔަތުތަކެވެ.