މިދިޔަ އަހަރު ދުނިޔޭގައި ކަރަންޓް އުފައްދަން ބޭނުންކުރި އެއްޗެހީގެ 10 ޕަސެންޓަކީ ވަޔާއި އަވި!

މިދިޔަ އަހަރު ދުނިޔޭގައި ކަރަންޓް އުފައްދަން ބޭނުންކުރި އެއްޗެހީގެ 10 ޕަސެންޓަކީ ވަޔާއި އަވި ކަމަށް ދިރާސާއެއްގައި ބުނެފި އެވެ.

ކްލައިމެޓް ތިން ޓޭކް، އެމްބާ އިން ކުރި އެ ދިރާސާގެ ރިޕޯޓްގައި ބުނީ، އިޔާދަކުރަނިވި ހަކަތަ އުފެއްދާ އެހެން އެއްޗެހި ބޭނުންކޮށްގެން ޖުމްލަ 38 ޕަސެންޓްގެ ކަރަންޓް މިދިޔަ އަހަރު ދުނިޔޭގައި އުފައްދާފައިވާ ކަމަށެވެ. އެއީ މިދިޔަ އަހަރު ކަރަންޓް އުފައްދަން ކޯލް ބޭނުންކުރި މިންވަރަށް ވުރެ ވެސް އިތުރު އަދަދެކެވެ.

އެމްބާ އިން ބުނީ ދުނިޔޭގެ 50 އަށް ވުރެ ގިނަ ގައުމުތަކުގައި 10 ޕަސެންޓްގެ ކަރަންޓް މިދިޔަ އަހަރު އުފެއްދީ ވަޔާއި އަވިން ކަމަށެވެ. އެ ގައުމުތަކުގެ ތެރޭގައި ނެދަލޭންޑްސް އާއި އޮސްޓްރޭލިއާ އަދި ވިއެޓްނާމް ވެސް ހިމެނެ އެވެ.

ދުނިޔޭގެ 10 ގައުމެއްގައި 25 ޕަސެންޓްގެ ކަރަންޓް އުފައްދަނީ ވެސް ވަޔާއި އަވިން ކަމަށް އެ ދިރާސާގައި ބުންޏެވެ. އެކަމުގައި އެންމެ ކުރީގައި މިހާރު އުޅެނީ ޑެންމާކެވެ. ޑެންމާކުގައި މިހާރު 52 ޕަސެންޓްގެ ކަރަންޓް އުފައްދަނީ ވަޔާއިން އަވިންނެވެ.

އެ ދިރާސާގައި އިތުރަށް ބުނީ ކުރިއަށް އޮތް އަހަރުތަކުގައި ވަޔާއި އަވިން ކަރަންޓް އުފައްދާ މިންވަރު އިތުރުވާނެ ކަމަށް ލަފާކުރެވޭތީ، ދުނިޔެ ހޫނުވާ މިންވަރު ވެސް ކުޑަވާނެ ކަމަށް ބެލެވެ އެވެ.

ދުނިޔޭގެ ހޫނުމިން 1.5 ސެލްސިއަސްގައި ހިފަހައްޓަން ސައިންސްވެރިން އިންޒާރުދީފައިވާއިރު، އެ ދިރާސާގައި ބުނީ އެ އަމާޒު ހާސިލު ވަނީ 2030 ގެ ކުރިން ކޮންމެ އަހަރަކު އިޔާދަކުރަނިވި ހަކަތަ އުފައްދާ މިންވަރު 20 ޕަސެންޓަށް އިތުރުކުރެވިގެން ކަމަށެެވެ.

އެ ދިރާސާގައި 2000 އިން 2020 ގެ ނިޔަލަށް 209 ގައުމަކުން އެއްކޮށްފައިވާ ޑާޓާ ހިމަނާފައިވެ އެވެ. އަދި މިދިޔަ އަހަރު 75 ގައުމަކުން ޑާޓާ އެއްކޮށްފައިވެ އެވެ.