ހުރިހާ ސްކޫލަކަށް ތަމްރީނު ލިބިފައިވާ ދިވެހި ޕްރިންސިޕަލުން ހޯދުމަށް މާސްޓާސްއަށް ކިޔަވަން 20 ސްކޮލަޝިޕް ދީފި

ރާއްޖޭގެ ހުރިހާ ސްކޫލަކަށް ތަމްރީނު ލިބިފައިވާ ދިވެހި ޕްރިންސިޕަލުން ހޯދުމުގެ އުއްމީދާއެކު، ސްކޫލް ހިންގުމުގެ ދާއިރާއިން މާސްޓާސްއަށް ކިޔެވުމަށް 20 ސްކޮލަޝިޕް މިރޭ ހަވާލުކޮށްފި އެވެ.

އިސްކަންދަރު ސްކޫލްގައި ބޭއްވި ރަސްމިއްޔާތުގައި، މެލޭޝިޔާގައި މާސްޓަސް އިން ސްކޫލް އެޑްމިނިސްޓްރޭޝަން ކިޔެވުމަށް ސަރުކާރުން ދޭ ފުލީ ފަންޑެޑް ސްކޮލަޝިޕް ލިބުނުކަމުގެ ލިޔުން ހަވާލުކޮށްދެއްވީ ނައިބު ރައީސް ފައިސަލް ނަސީމެވެ.

އެ ރަސްމިއްޔާތުގައި އެޑިއުކޭޝަން މިނިސްޓަރު ޑރ. އައިޝަތު އަލީ ވިދާޅުވީ ޕްރިންސިޕަލުން ހޯދުމަށް އެކި ގޮތަށް މަސައްކަތް ކޮށްފައިވާ ކަމަށެވެ. ބިދޭސީން ހަމަޖައްސައިގެން ނުވަތަ އެ މަގާމަށް ދިވެހިން ހޯދި ނަމަވެސް ދެމެހެއްޓެނިވި ގޮތެއްގައި އަދި ރޭވުންތެރިކަމާއެކު ފެންވަރު ރަނގަޅު ޕްރިންސިޕަލުން ތަމްރީނުކުރަން ފަހުގެ ތާރީހެއްގައި ޕްރޮގްރާމެއް ނުހިންގާ ކަމަށް އޭނާ ވިދާޅުވި އެވެ.

މިނިސްޓަރު ވިދާޅުވީ ޕްރިންސިޕަލުން ތަމްރީނުކުރަން މީގެ ކުރިން އެކަށީގެންވާ ސަމާލުކަމެއް ދީފައިނުވާތީ ސަރުކާރުން ހިންގާ 216 ސްކޫލަށް ތަމްރީނު ލިބިފައިވާ ޕްރިންސިޕަލުން ހޯދަން ދަތިވެފައިވާ ކަމަށެވެ.

ނަމަވެސް މިހާރު ވަނީ ހުރިހާ ސްކޫލަކަށް ތަމްރީނު ލިބިފައިވާ ދިވެހި ޕްރިންސިޕަލުން ހޯދުމުގެ މަސައްކަތް ފަށައިފަ އެވެ. މިނިސްޓްރީގެ އުއްމީދަކީ ޕްރިންސިޕަލް ސްކޮލަޝިޕް ޕްރޮގްރާމުން ކުރިއަށް އޮތް ތިން އަހަރުގެ ތެރޭގައި، ދާއިމީ ޕްރިންސިޕަލުން ނެތް އަދި ބިދޭސީ ޕްރިންސިޕަލުން ތިބި ސްކޫލްތަކަށް ތަމްރީންވެފައިވާ ދިވެހި ޕްރިންސިޕަލުން ހަމަޖެއްސުމެވެ.

އޭގެ ފުރަތަމަ ބެޗުގައި ހިމެނޭ 20 މީހުން ކިޔަވަން މި މަހުގެ ތެރޭގައި މެލޭޝިޔާއަށް ފުރާނެ އެވެ.

މިނިސްޓަރު ވިދާޅުވީ ތައުލީމީ ދާއިރާއަށް ލިބޭނެ އެންމެ ބޮޑު ހިތްހަމަޖެހުމަކީ އެ ޕްރިންސިޕަލުން އަންނަ އަހަރުގެ އޭޕްރީލް މަހު ކިޔެވުން ނިންމައި ސްކޫލްތަކާ ގުޅުމެވެ. އޭގެ ނަތީޖާއެއްގެ ގޮތުން ސްކޫލްތަކުގެ ހިންގުން ހަރުދަނާވެގެންދާނެ ކަމަށް މިނިސްޓަރު ވިދާޅުވި އެވެ.

ޕްރިންސިޕަލްކަމަކީ ގަދަރުވެރި އަދި ބުރަ މަސައްކަތެއް ކަމަށާއި އެ ޒިންމާގެ ބޮޑުކަން އަބަދު ވެސް ހަނދާނުގައި ބަހައްޓަންޖެހޭނެ ކަމަށް އޭނާ ވިދާޅުވި އެވެ.

މިދިޔަ ނޮވެމްބަރު މަހުގެ ތެރޭގައި ހުޅުވާލި ސްކޮލަޝިޕަށް 60 އަށްވުރެ ގިނަ މީހުން ކުރިމަތިލި އެވެ. ނަމަވެސް އޭގެ ތެރެއިން ޝަރުތު ހަމަވަނީ 43 މީހެއްގެ އެވެ.

މި ސްކޮލަޝިޕްގެ ފުރުސަތު ލިބޭ މީހުންނާއެކު ވަކި މުއްދަތަކަށް، ސަރުކާރުގެ ސްކޫލެއްގައި މަސައްކަތް ކުރުމަށް ބޮންޑެއް އޮންނާނެ އެވެ.