އަމިއްލައަށް ޔޫކްރެއިނުން އައި ދަރިވަރުންގެ ހަރަދު ސަރުކާރުން ދެނީ

ޔުކްރެއިންގައި ރަޝިއާ އިން ހަނގުރާމަ ފެށުމުގެ ކުރިން ބައެއް ދަރިވަރުން އަމިއްލަ ހަރަދުގައި ރާއްޖެ އަޔަސް، އެ ދަރިވަރުންގެ އަތުންދިޔަ ހަރަދު ހަޔާ އެޑިއުކޭޝަން މިނިސްޓްރީން ހަމަޖައްސާނެ ކަމަށް އެ މިނިސްޓްރީން މިއަދު ބުނެފި އެވެ.

ރަޝިއާ ސިފައިން ޔޫކްރެއިނަށް އަރައި އެ ގައުމު ހިފައިފާނެ ކަމުގެ ބިރު ބޮޑުވެފައި ވާތީ، އެ ގައުމުގައި ތިބި ދިވެހި ދަރިވަރުން އަނބުރާ ރާއްޖެ ގެނައުމަށް ރައީސް އިބްރާހިމް މުހައްމަދު ސޯލިހު އެންގެވީ މިދިޔަ އަންގާރަ ދުވަހު އެވެ.

ސަރުކާރުގެ ހަރަދުގައި އެ ދަރިވަރުން ގެންނަން ނިންމިއިރު ބައެއް ދަރިވަރުން ތިބީ އަމިއްލަ އަށް ޓިކެޓު ނަގައިގެން ރާއްޖެ އަންނަން ހުރިހާ ކަމެއް ހަމަޖައްސައިގެންނެވެ. އަދި 25 ދަރިވަރަކު އަމިއްލަ ހަރަދުގައި އަ އެވެ.

ހަޔާ އެޑިއުކޭޝަން މިނިސްޓްރީގެ ކޮމިއުނިކޭޝަން ޑިރެކްޓަރު ތަހާރަތު ވަހީދު، "މިހާރު" އަށް ވިދާޅުވީ އެ ހުރިހާ ދަރިވަރުން ރާއްޖެ އައުމަށް ކުރި ހަރަދު މިނިސްޓްރީން ހަމަޖައްސައިދޭނެ ކަމަށާއި މިހާރު ފިނޭންސް މިނިސްޓްރީ އަށް އެ މައުލޫމާތު ފޮނުވާފައިވާނެ ކަމަށެވެ.

ދަރިވަރުން އަމިއްލަ އަށް ކުރި ހަރަދު އެ ދަރިވަރުންނަށް ވަަރަށް އަވަހަށް ހަމަޖެހޭނެ ކަމަށް ވެސް އޭނާ ވިދާޅުވި އެވެ.

ޔޫކްރެއިނުގެ ހާލަތު ގޯސްވިއިރު އެކި ސަބަބުތަކާ ހުރެ އެތަނުން 27 ދިވެއްސަކަށް ނުނިކުމެވުނެވެ. އެކަމަކު ޔޫކްރެއިނުގެ އިވާނޯގައި އުޅެމުން އައި 15 ދިވެހިން އެ ގައުމުން ނެރެ ހަންގޭރީ އަށް ގެންގޮސްފައިވާއިރު އެ ދަރިވަރުން މިހާރު ވަނީ ރާއްޖެ އައިސްފަ އެވެ. އަދި ބާކީ ތިބި 12 ދަރިވަރުން ނުގެނެވިގެން އުޅެނީ އެ މީހުން ތިބި ކާކީވް ހިސާބުގައި ވަރަށް ގަދަޔަށް ހަމަލާތައް ދެމުންދާތީ އެވެ.

ފޮރިން މިނިސްޓްރީން އިއްޔެ ބުނީ އެ ދަރިވަރުން ހަންގޭރީ ބޯޑަރާ ހަމައަށް ގެންދިއުމަށް 15 ގަޑިއިރުގެ ދަތުރެއް ކުރަމުން ޖެހޭ ކަމަށާއި މިވަގުތު ހާލަތު އޮތްގޮތުން އެހާ ދިގު ދަތުރެއްކުރުން ރައްކާތެރި ނޫން ކަމަށް ޔޫކްރެއިނުގެ ފޮރިން މިނިސްޓްރީން މައުލޫމާތު ދޭ ކަމަަށެވެ. އެކަމަކު ރައްކާތެރިކަން ކަށަވަރުވުމާ އެކު ދަތުރު ފަށާނެ ކަމަށާއި އެ ދަރިވަރުން ހަންގޭރީ ބޯޑަރާ ހަމައަށް ގެންދެވުމުން ދެން ކުރަންޖެހޭ ހުރިހާ ކަމެއް މިހާރު ވެސް ހަމަޖައްސާފައިވާ ކަމަށެވެ.