ދިވެހިން ޔުކްރެއިނަށް ދަތުރުނުކުރަން އަންގައިފި

ޔުކްރޭނުގެ މަސްރަހު ހޫނުވެ، ހަނގުރާމައެއް ފެށިދާނެ ކަމުގެ ބިރުވެރިކަން އުފެދިފައިވާތީ، އެ ގައުމަށް ދިވެހިން ދަތުރުނުކުރަން ސަރުކާރުން މިއަދު އިލްތިމާސްކޮށްފި އެވެ.

ފޮރިން މިނިސްޓްރީން ނެރުނު ބަޔާނެއްގައި ބުނީ، ޔުކްރެއިންގެ ހާލަތު ގޯސްވެފައިވާ މި ދަނޑިވަޅުގައި ދިވެހިން އެ ގައުމަށް ދަތުރު ނުކުރުމަށް އިލްތިމާސްކުރާ ކަމަށާއި އެ ގައުމުގައި މިހާރު ދިރިއުޅޭ ދިވެހިން ޔުކްރެއިންގެ ސަރުކާރުގެ ނިންމުންތަކާއި އެންގުންތަކަށް ވަރަށް ބޮޑަށް ސަމާލުވެ، ރައްކާތެރިކަމުގެ ފިޔަވަޅުތައް އެޅުމަށް އަންގާ ކަމަށެވެ.

ޔުކްރެއިނުގައި މިހާރު ތިބި ދިވެހިން، އެ ގައުމާ އެންމެ ކައިރީގައި ހުރި ރާއްޖޭގެ ޑިޕްލޮމެޓިކް މިޝަން، ޖަރުމަނުގައި ހުންނަ ދިވެހި އެމްބަސީ އާއި ފޮރިން މިނިސްޓްރީގައި ރަޖިސްޓަރީ ކުރުމަށް ވެސް އެ މިނިސްޓްރީން އެދެ އެވެ.

ޔުކްރެއިނަށް ދިވެހިން ދަތުރުނުކުރަން މި އެންގީ އެ ގައުމަށް ރަޝިއާގެ ސިފައިން އަރައި، އެ ގައުމު ހިފާނެ ކަމުގެ ބިރުވެރިކަން އޮތުމުން، އެހެން ގައުމުތަކުގެ މީހުން ފައިބަން ގިނަ ގައުމުތަކުން އަންގަމުންދާ ދަނޑިވަޅެއްގަ އެވެ. ޔުކްރެއިނުގައި ހުރި ބައެއް ގައުމުތަކުގެ އެމްބަސީތައް ބަންދުކޮށް، ޑިޕްލޮމެޓުން ވެސް ދަނީ ފައިބަމުންނެވެ.

ރާއްޖޭގެ ފޮރިން މިނިސްޓްރީން ކުރިން ބުނީ ޔުކްރެއިންގައި ތިބި 50 އަށް ވުރެ ގިނަ ދިވެހިންގެ ހާލަތު ގާތުން ބަލަމުން އަންނަ ކަމަށެވެ. އެ ގައުމުގެ ދެ ސަރަހައްދެއްގައި ދިވެހިން އުޅޭ ކަމަށް ފޮރިން މިނިސްޓްރީން ބުންޏެވެ. އެކަމަކު ދިވެހިން ރާއްޖެ ގެނައުމާ ބެހޭ ގޮތުން ސަރުކާރުން މިހާތަނަށް ވަކި އެއްޗެއް ނުބުނެ އެވެ.

ރަޝިއާ އިން ޔުކްރެއިން ހިފައިފާނެ ކަމުގެ ބިރު ބޮޑުވީ އެ ދެ ގައުމު ގުޅޭ ބޯޑަރު ކައިރި އަށް ރަޝިއާގެ ގިނަ އަދަދެއްގެ ސިފައިން ޖަމާ ކުރުމުންނެވެ. އެމެރިކާ އިން ބުނަމުން ދަނީ ކޮންމެ ވަގުތެއްގައި ވެސް ރަޝިއާ ސިފައިން ޔުކްރެއިނަށް އަރައިފާނެ ކަމުގެ ބިރު އެބައޮތް ކަމަށާ އެކަން ކޮށްފި ނަމަ، ރަޝިއާއާ ދެކޮޅަށް ވަރުގަދަ ފިޔަވަޅުތައް އަޅާނެ ކަމަށެވެ. ޔުކްރެއިން ހިފަން އުޅޭ ކަމުގެ ތުހުމަތު ރަޝިއާ އިން ދޮގު ކުރިޔަސް، އަސްކަރީ ފައުޖުތައް ފަހަތަށް ޖައްސަން އެ ގައުމުން ދަނީ ދެކޮޅު ހަދަމުންނެވެ.

އެމެރިކާ އާއި އިނގިރޭސި ވިލާތާއި ނޭޓޯގެ ގިނަ ގައުމުތަކުގެ ސިފައިން މިހާރު ދަނީ ޔުކްރެއިންއާ ކައިރި ގައުމުތަކަށް ފޮނުވަމުންނެވެ. ޔުކްރެއިންގެ ކްރައިމިއާ 2014 ވަނަ އަހަރު ރަޝިއާ އިން ހިފި މައްސަލާގައި ދެ ގައުމުގެ ގުޅުން ގޯސްވެފައި ވަނިކޮށް، ޔުކްރެއިނަށް ނޭޓޯގެ މެމްބަރުކަން ދޭން އެމެރިކާ އާއި ނޭޓޯގެ ގައުމުތަކުގެ މަސައްކަތް ކުރުމަކީ ދެ ގައުމުގެ ގުޅުން އިތުރަށް ގޯސްވި ސަބަބެވެ.