މިއީ ލަގްޒަރީ ހޯމްސްޓޭގެ ނަމޫނާއެއް: ރެއަކަށް 1200 ޑޮލަރަށް ވިއްކާ ގެއެއް!

ޓޫރިޒަމްގެ ވިޔަފާރީގެ ތެރެއަށް ވަނުމަކީ ގއ. ގެމަނަފުށި ހިލިހިލާގޭ އާސިމް މުހައްމަދު ގިނަ ދުވަސްތަކެއް ވަންދެން ދެކެމުން އައި ހުވަފެނެކެވެ. ނަމަވެސް އެކި ސަބަބުތަކާހުރެ އޭނާ އަށް އެކަން ނުވެ އޮންނަތާ އެތައް އަހަރެއް ވެއްޖެ އެވެ. ރާއްޖޭގައި ހޯމް ސްޓޭ ޓޫރިޒަމް ރަސްމީކޮށް ފަށާނެ ކަމުގެ އަޑުތަކާ އެކު އޭނާގެ މި އުއްމީދު އަނެއްކާ ވެސް އާވެ، މި ފުރުސަތާ އެކު އޭނާ ވިސްނީ ރަށަށް ލަގްޒަރީ ހޯމްސްޓޭ ޓޫރިޒަމް ގެނައުމަށެވެ. އޭނާ ދިރިއުޅެން ތައްޔާރުކުރި ގެ ދެން ބަދަލުވާނީ ހޯމްސްޓޭ ޓޫރިޒަމަށެވެ.

ބޭރުން އާދައިގެ ގެއެއް ހެން ފެންނަން ހުރި ނަމަވެސް މިއީ ރިސޯޓުތަކުގައި ހުންނަ ޕްރައިވެޓް ބަންގްލޯ ފަދަ ގެއެކެވެ. އެގޮތުން 3،020 އަކަފޫޓުގެ މި ގެ ހުންނަނީ ޓޫރިސްޓުންނަށް ޕްރައިވެސީ ލިބޭ ސަރަހައްދެއްގައި ކަމަށް ވެފައި، އެ ތަނަށް ވަންނަ ކޮންމެ މީހަކަށް ވެސް ލަގްޒަރީކަން އިހުސާސް ކުރެވޭނެ އެވެ. އަދި ޓޫރިސްޓުންނަށް ބޭނުންވާނެ ހުރިހާ ހިދުމަތެއް މި ގެއިން ލިބެން ހުންނާނެ ކަމުގެ ޔަގީންކަން އާސިމް ދެ އެވެ. ދެ ބުރިއަށް ހަދާފއި ހުންނަ މި ގޭގައި ފަސް ކޮޓަރި ހުންނައިރު ބޮޑު ސިޓިން ރޫމަކާއި ލަގްޒަރީ ބަދިގެއެއް އަދި ލޯންޑްރީ އަށް ހާއްސަ ތަނެއް ހުރެ އެވެ. މިއީ ޓޫރިސްޓުންނަށް އަމިއްލަ ގެއެއްގެ ގޮތުގައި އުޅެވޭނެ ގޮތަށް ހަދާފައިވާ ގެއެކެވެ.

ލަގްޒަރީ ޓޫރިޒަމަށް ހާއްސަ ކޮށްގެން ތައްޔާރު ކުރާ މި ގެ މުޅިން ހަދައި ނުނިމެވެ. ގޭގެ 95 ޕަސެންޓް މަސައްކަތް މިހާތަނަށް ނިމިފައިވާއިރު، ގެ އެއްކޮށް ނިންމައި މި މަހު އޮޕަރޭޝަން ފެށޭވަރު ވާނެ ކަމަށް އާސިމް ލަފާކުރެ އެވެ.

މި ގޭގެ ތިރީ ބުރި އެއްކޮށް ނިމިފައިވާއިރު ސިޓިން ރޫމުން އެކަނި ވެސް، އެ ގޭގެ ފެންވަރު އެނގެ އެވެ. ގެ ޒީނަތްތެރި ކޮށްފައި ވަނީ ޒަމާނީ އިންޓީރިއާ ޑިޒައިންތަކަށް ބަލައިގެންނެވެ. މި ގޭގެ ކޮޓަރިތައް ވެސް ހަދާފައި ވަނީ ދުނިޔޭގެ ބޮޑެތި ޓޫރިސްޓް ހޮޓާތަކުގެ ކޮޓަރިތަކާ އެއް ފެންވަރަށެވެ.

އާސިމް ބުނިގޮތުގައި އޭނާގެ މި ހުވަފެން ހަގީގަތަކަށް ވެގެން ދަނީ އޭނާގެ އަންހެނުން، އާމިނަތު ޝީނާގެ ވަރަށް ބޮޑު އެއްބާރުލުމަކާ އެކުގަ އެވެ. ގޭގެ ބޭރުގެ ޑިޒައިނުން ފެށިގެން އެތެރޭގެ ޑިޒައިނާއި ކޮޓަރިތަކާއި ގެއަށް ބޭނުންވާ ފަރުނީޗަރު އަދި ގޭގެ އެތެރެ ޒީނަތްތެރިކުރަން ބޭނުންވާ ހުރިހާ ސާމާނަކީ ވެސް އެ ދެމަފިރިންގެ ވިސްނުމާއި ޑިޒައިން އެވެ.

"އަޅުގަނޑާއި އަޅުގަނޑުގެ އަންހެނުންނާ ހިއްސާވެގެން މިކަން މިކުރަނީ. އަންހެނުންގެ ހިޔާލު ނެތި އެއްވެސް ކަމެއް ނުކުރަން. އިންޓީރިއާ ޑިޒައިންގައި ވެސް އަންހެނުންގެ ބޮޑު ހިއްސާއެއް އޮންނާނެ. މިތަނަށް ބޭނުންވާ ތަކެތި ވެސް ގަތީ އަޅުގަނޑުމެން ދެ މީހުން ޗައިނާ އަށް ގޮސް އަންހެނުން ތަކެތި ޗޫސްކޮށްގެން،" ރަށު ކައުންސިލްގައި ވަޒީފާ އަދާކުރާ އާސިމް ބުންޏެވެ.

މި ގެއަކީ އާސިމާއި އޭނާގެ އަންހެނުން ދެ މިލިއަން ރުފިޔާގެ ލޯނެއް ނަގައިގެން ހަދާ ގެއެކެވެ. ގެއަށް ދާ ހަރަދު ޓޫރިސްޓުން އަންނަން ފަށާތާ އަހަރެއްގެ ތެރޭގައި ރިކަވާ ކުރެވި، ފައިދާ ވާން ފަށާނެ ކަމަށް އާސިމް ލަފާ ކުރެ އެވެ. އޭނާ ނިންމާފައި ވަނީ މިގެ ރެއަކަށް 1200 ޑޮލަރު (18،504ރ.) އަށް ވިއްކުމަށެވެ. މިއީ ނިސްބަތުން ލަގްޒަރީ ބޮޑެތި ރިސޯޓްތަކުގައި ރޫމެއް ވިއްކާ އަގެވެ.

"ގާތްގަނޑަކަށް މިތަނަށް ހަރަދުވެފައި އެބަހުރި ދެ މިލިއަން ރުފިޔާ. އަޅުގަނޑުމެންނަށް ހޯމްސްޓޭ ފެށުނީމަ ގާތްގަނޑަކަށް އެއް އަހަރު ދުވަހުގެ ތެރޭގައި އަޅުގަނޑު އަތުން އެ ކުރެވުނު ހަރަދު އަޅުގަނޑަށް ލިބޭނެ،" އާސިމް ބުންޏެވެ.

"ފުރަތަމަ ވިސްނީ ވަކި ކޮޓަރިތައް ދެން. އެކަމަކު ގެ އެއްކޮށް ދެންޏާ ވާ ފައިދާ ވެސް ބޮޑުވާނެ. އެހެންވެ އަޅުގަނޑު ނިންމީ 1200 ޑޮލަރު ރެއަކަށް ހަދަން. އެ އަގުގައި މިތަން ވިއްކާލެވޭނެ ކަމުގެ ޔަގީންކަން އެބައޮތް."

ރާއްޖެއަށް އަންނަ ޓޫރިސްޓުން ރަށްތަކަށް ޒިޔާރަތް ކުރަނީ ރާއްޖޭގެ ސަގާފަތް އެންމެ ފުރިހަމަ ގޮތުގައި ތަޖުރިބާ ކުރަން ކަމަށްވާއިރު ގއ. ގެމަނަފުއްޓަކީ ކުރިއަށް އޮތްތަނުގައި ހޯމްސްޓޭގައި ވިދާލާނެ ރަށެއް ކަމަށް އާސިމް ގަބޫލު ކުރެއެވެ. އޭނާ ބުނީ އެ ރަށަކީ މެހެމާންދާރީގައި ނަމޫނާ ރަށަކަށްވާއިރު ޓޫރިސްޓުންނަށް ރައްކާތެރިކަން ވެސް އެންމެ ފުރިހަމައަށް އެ ރަށުން ލިބޭނެ ކަމަށެވެ. އަދި ގުދުރަތީ ރީތިކަން އެ ރަށާއި ރަށް ކައިރީ އޮންނަ ފަޅުރައްތަކުން ތަޖުރިބާ ކުރުމުގެ ފުރުސަތު ރަށަށް އަންނަ ޓޫރިސްޓުންނަށް ލިބޭނެ ކަމަށް އޭނާ ބުންޏެވެ.

"މި ރަށަކީ ގިނަބަޔަކު މިހާރު ވެސް ޒިޔާރަތް ކުރާ ރަށެއް. އެކަނި އުޅެން ވެސް އެހާ ރައްކާތެރިވާނެ މިރަށުގައި. ފިރިހެން ކުއްޖަކަސް އަންހެން ކުއްޖަކަސް ރަށުގައި އެކަނި ހިނގާފައި ދާއިރު ބެހޭނެ މީހަކު ނުހުންނާނެ. ގެ ވެސް މިހުންނަނީ އަބަދު ހުޅުވާފައި. އެކަމަކު ދުވަހަކު ވެސް މީހަކު ގެއަށް އަނިޔާއެއް ނުކުރޭ. ރަށުގެ ރައްޔިތުން ވެސް ބޭނުންވާނީ ރަށަށް ޓޫރިސްޓަކު އަޔަސް ރަށުގެ މެހެމާންދާރީ އެ މީހުންނަށް ދައްކަން،" އާސިމް ބުންޏެވެ.

ގެމަނަފުއްޓަކީ މިހާރު ވެސް މަދުން ނަމަވެސް ޓޫރިސްޓުން ޒިޔާރަތް ކުރާ ރަށެކެވެ. އެ ރަށް އެންމެ ބޮޑަށް ފާހަގަ ކުރެވިފައި އޮންނަނީ ދެކުނުގެ ރަށްތަކުން ޗުއްޓީއާ ދިމާކޮށް ދާ ރަށެއްގެ ގޮތުގަ އެވެ. ރަށުގެ މެހެމާންދާރިއަށް އެ ރަށަށް އަރާ ކޮންމެ މީހަކު ވެސް ތައުރީފު ކުރެ އެވެ.

ގެމަނަފުށީގެ ރައްޔިތުން އެ ރަށް ޕްރޮމޯޓު ކުރަނީ ވެސް "ދަ އައިލެންޑް އޮފް ހޮސްޕިޓަލިޓީ" (މެހެމާންދާރީގެ ރަށް) ގެ ގޮތުގަ އެވެ.