މުއިއްޒަށް ކުރާ ދައުވާގެ އަޑުއެހުން މިއަދު ކެންސަލް

ކުރީގެ ހައުސިން މިނިސްޓަރު އަދި މާލޭ ސިޓީގެ މިހާރުގެ މޭޔަރު ޑރ. މުހައްމަދު މުއިއްޒަށް ކުރާ ދައުވާގެ މިއަދުގެ އަޑުއެހުން ކެންސަލްކޮށްފި އެވެ.

މުއިއްޒުގެ މައްޗަށް ދައުލަތުން ދައުވާ ކުރަނީ އޭނާ ހައުސިން މިިނިސްޓަރަކަށް ހުންނެވިއިރު، ނޫމަޑި ރިސޯޓްސް އެންޑް ރެސިޑެންސް ކުންފުންޏާ އެކު ހެދި އެއްބަސްވުން ބާތިލް ކުރުމުން ބަދަލު ހޯދަން އެ ކުންފުނިން ދައުލަތާ ދެކޮޅަށް ނެދަލެންޑްސްގެ އާބިޓްރޭޝަނަށް ހުށަހެޅި މައްސަލާގައި އާބިޓްރޭޝަންގައި ދޮގު ބަޔާނެއް ދެއްވި ކަމަށް ބުނެ އެވެ. އެ މައްސަލާގައި މުއިއްޒުގެ މައްޗަށް ދައުލަތުން ކުރަނީ ދޮގު ބަޔާނެއް ދިނުމުގެ ދައުވާ އެވެ.

އެ މައްސަލާގެ އަޑުއެހުމެއް މިއަދު ހެނދުނު ކްރިމިނަލް ކޯޓުގައި ބާއްވަން ހަމަޖެއްސުމަށްފަހު ކެންސަލްކުރި ސަބަބެއް ސާފެއް ނުވެ އެވެ.

ގާނޫނުލް އުގޫބާތުގެ 520 ވަނަ މާއްދާގެ ދަށުން މުއިއްޒުގެ މައްޗަށް ކުރާ އެ ދައުވާ ސާބިތުވެއްޖެ ނަމަ އަންނާނެ އަސާސީ އަދަބަކީ ހަތަރު މަހާއި 24 ދުވަހަށް ޖަލަށްލުމެވެ. ނަމަވެސް އެއަށް ވުރެ އަދަބު ބޮޑުވުމުގެ ނުވަތަ ކުޑަވުމުގެ ފުރުސަތު ވެސް އޮންނާނެ އެވެ.

ނޫމަޑިން 155 މިލިއަން ޑޮލަރު ހޯދަން އާބިޓްރޭޝަނަށް ހުށަހެޅި މައްސަލާގައި ސަރުކާރުން ވަނީ ކޯޓުން ބޭރުގައި މައްސަލަ ހައްލުކޮށް، 55 މިލިއަން ޑޮލަރު އެ ކުންފުންޏަށް ދީފަ އެވެ. އާބިޓްރޭޝަނަށް މުއިއްޒު ބަޔާން ދެއްވި މައްސަލާގައި ރައްޔިތުންގެ މަޖިލީހަށް ވެސް އޭނާ ހާޒިރުކޮށް، ކުރިން ސުވާލުކުރި އެވެ.