ރޮނާލްޑޯގެ ސްޓެޗޫއެއް ގޯއާގައި ބެހެއްޓުމުން ހިޔާލު ތަފާތުވުންތަކެއް

ޒުވާނުންގެ މެދުގައި ފުޓްބޯޅައިގެ ޝައުގުވެރިކަން އުފެއްދުމަށް ކަމަށް ބުނެ އިންޑިއާގެ ގޯއާގައި ޕޯޗްގަލްގެ މަޝްހޫރު ފުޓްބޯޅަ ތަރި ކްރިސްޓިއާނޯ ރޮނާލްޑޯގެ ސްޓެޗޫއެއް ބެހެއްޓުމުން އެކަމާ ގަޔާނުވެގެން ބައެއް އާންމުންގެ ތެރޭގައި ހިޔާލު ތަފާތުވުން އުފެދިއްޖެ އެވެ.

ރޮލާންޑޯ ބޯޅައެއްގައި ޖެހޭ ތަން ސިފަކޮށްދޭ ގޮތަށް ހަދާފައިވާ ސްޓެޗޫ ބެހެއްޓީ ހުޅަނގު ގޯއާގެ ޕާކެއްގަ އެވެ. އެތަނުގެ ސްޓޭޓް މިނިސްޓަރެއް ކަމަށްވާ މައިކަލް ލޯބޯ ވިދާޅުވީ ރޮނާލްޑޯ އަކީ ދުނިޔޭގައި އުފެދުނު އެންމެ މޮޅު ފުޓްބޯޅަ ކުޅުންތެރިންގެ ތެރެއިން މި ޖީލުގެ ވަރަށް ގިނަ ބަޔަކު ސަޕޯޓްކުރާ ތަރިއެއް ކަމަށެވެ.

"އެހެންވެ ގޯއާގެ ޒުވާންގެ މެދުގައި ފުޓްބޯޅަ އަށް ލޯބިޖައްސައި ޝައުގުވެރިކަން އުފައްދަން އިންސްޕިރޭޝަނެއްގެ ގޮތުގައި ރޮނާލްޑޯ ބެލުމަށްޓަކައި އޭނަގެ ސްޓެޗޫއެއް ބެހެއްޓީ." އޭނާ ވިދާޅުވި އެވެ.

ލޯބޯ ވިދާޅުވީ މި ސްޓެޗޫގެ ސަބަބުން ގޯއާގެ ހާއްސަކަން ވެސް އިތުރުވާނެ އެވެ. ރޮނާލްޑޯ ފަދަ ފުޓްބޯޅައިގެ ވަރުގަދަ ޝަހުސިއްޔަތެއްގެ ސްޓެޗޫ ގޯއާގައި ބެހެއްޓުމަކީ ޓޫރިޒަމް މަންޒިލެއްގެ ގޮތުގައި ވެސް މަޝްހޫރު ގޯއާގެ ސްޓޭޓަށް ލިބޭ ފަހުރެއް ކަމަށް ވިދާޅުވި އެވެ.

ނަމަވެސް ސްޓެޗޫ ރަސްމީކޮށް ދައްކާލުމާ އެކު، އެކި މީހުން ދަނީ ސޯޝަލް މީޑިއާގައި ކަންބޮޑުވުން ފާޅު ކުރަމުންނެވެ. ބައެއް މީހުން ބުނި ގޮތުގައި އެ ގައުމުގެ ޒުވާނުން އެ ކުޅިވަރަށް ލޯބި ޖައްސަން ބޭނުން ނަމަ އިންޑިއާގެ ފުޓްބޯޅަ ތަރިން އިންސްޕިރޭޝަކަށް ދައްކަން މަސައްކަތް ކުރުން މާ ރަނގަޅު ކަމަށެވެ.

އެހެންވެ ބައެއް މީހުން ބުނީ ރޮނާލްޑޯ ފަދަ ކުޅުންތެރިއެއްގެ ސްޓެޗޫގައި ބަދަލުގައި އިންޑިއާގައި ބަހައްޓަން އެންމެ އައުލާކަން ބޮޑީ ބައިޗުން ބުޓިއާ އާއި ސުނިލް ޗެތުރީ ފަދަ އިންޑިއާގެ ފާހަގަކޮށްލެވޭ ފުޓްބޯޅަ ތަރިންގެ ސްޓެޗޫ ކަމަށެވެ. އަދި ރޮނާލްޑޯ އަކީ ޕޯޗްގަލްގެ ކުޅުންތެރިއަކަށް ވާތީ ވެސް އޭނަގެ ސްޓެޗޫ ގޯއާގައި ބަހައްޓަން ތާއީދުނުކުރާ ކަމަށް ބައެއް މީހުން ބުންޏެވެ. ސަބަބަކީ ގޯއާ އަކީ 450 އަހަރު ވަންދެން ޕޯޗްގީޒުންގެ އަޅުވެތިކަމުގެ ދަށުގައި އޮތް ތަނަކަށްވުމެވެ. ގޯއާ އަޅުވެތިކަމުން ސަލާމަތްވީ 1961 ގަ އެވެ.

ބައެއް މީހުން ބުނި ގޮތުގައި ރޮނާލްޑޯގެ ސްޓެޗޫގެ ސަބަބުން އަނެއްކާވެސް "ސިޔާސީ" ފިތުނަވެރިކަމެއް ވެސް އާންމުންގެ ތެރޭގައި އުފެދި ބައިބައިވުމަށް މަގުފަހިވެދާނެ އެވެ.