ކެނދިކުޅުދޫން ގޯތި ދޭން 18 ނިކަގަސް އެހެން ތަނަކަށް ބަދަލުކުރަނީ

ނ. ކެނދިކުޅުދޫގެ އިރުމަތީފަރާތުން ގޯތި ދޭން ކަނޑައަޅާފައިވާ ސަރަހައްދުގައި ހުރި 18 ނިކަގަސް އެހެން ތަންތަނަށް ބަދަލުކުރުމުގެ މަސައްކަތް އިއްޔެ ފަށައިފި އެވެ.

މި ގަސްތަކުގެ ތެރެއިން ހަ ގަސް އެ ރަށުގެ އެކި ތަންތަނަށް ބަދަލުކުރާއިރު، ބާކީ 12 ގަސް އެހެން ރަށްރަށަށް ވެސް ގެންދަން ވަނީ ނިންމައިފަ އެވެ. މީގެ ތެރޭގައި ވަރަށް ގިނަ ދުވަސްވީ، ބިޔަ ނިކަގަސްތައް ވެސް ހިމެނެ އެވެ.

ކެނދިކުޅުދޫ ކައުންސިލްގެ ނައިބު ރައީސް ހަސަން މުހައްމަދު "މިހާރު" އަށް މިއަދު ވިދާޅުވީ ގަސްތައް ނަގަނީ ހުއްދަ ހޯދައިގެން ކަމަށާއި މިއީ ގޯތި ދޭން އޮތް ސަރަހައްދު ކަމަށް ވާތީ އެ ގަސްތައް ނުނަގައި އެކަން ކުރަން އުނދަގޫވާނެ ކަމަށެވެ.

މި މަސައްކަތް ކުރަނީ ހުއްދަ ނުހޯދާ ކަމަށް ސޯޝަލް މީޑިއާގައި ވާހަކަ ދެކެވުނަސް، އޭނާ ވަނީ އެކަން ދޮގުކުރައްވައިފަ އެވެ.

އޭނާ ވިދާޅުވި ގޮތުގައި، ނިކަގަސްތައް ރީލޮކޭޓްކުރުމުގެ މަސައްކަތް ކުރަނީ ރަސްމީކޮށް، އިދާރާތަކުން ނަގަން ޖެހޭ ހުރިހާ ހުއްދަތަކެއް ވެސް ލިބިގެންނެވެ. އަދި މި މަސައްކަތަކީ ކައުންސިލްގެ މިދިޔަ ދައުރުގައި ކުރަން ނިންމައި، ބިޑަށް ހުޅުވާލައިގެން ބަޔަކާ ހަވާލުކޮށްފައިވާ މަސައްކަތެއް ކަމަށް ވިދާޅުވި އެވެ.

"ގަވާއިދާ ހިލާފު އެއްވެސް ކަމެއް ނޯންނާނެ. ރަސްމީކޮށް ހުރިހާ ހުއްދަތަކެއް ލިބިގެން އެކަން ކުރިއަށް ގެންދަނީ. ސޯޝަލް މީީޑިއާގައި ދެކެވެނީ ދޮގު ވާހަކައެއް،" އޭނާ ވިދާޅުވި އެވެ.

މި ނިކަގަސްތައް އެހެން ތަންތަނަށް ބަދަލުކުރަނީ އީއައިއޭ ނަހަދާ ކަމަށް ސޯޝަލް މީޑިއާގައި ވާހަކަދެކެވުނަސް، އީޕީއޭ އިން މިއަދު ބުނީ ގަހެއް ރިލޮކޭޓްކުރަން ޖެހޭ ކޮންމެ ފަހަރަކު އީއައިއޭ ހަދަން ނުޖެހޭނެ ކަމަށެވެ.