ސޮނެވާގެ ފޮލޯވަރުންގެ އަދަދު މިލިއަނަކަށް

ދުނިޔޭގެ ހޮސްޕިޓަލިޓީ ބްރޭންޑުތަކުގެ ތެރެއިން އިންސްޓަގްރާމުގައި ދެވަނައަށް އެންމެ ގިނަ ބަޔަކު ފޮލޯ ކުރާ ބްރޭންޑަށް ސޮނެވާ ވެއްޖެ އެވެ.

އިންސްޓަގްރާަމުގައި މިހާތަނަށް "އެކްސްޕީރިއެންސް ސޮނެވާ" އަށް ވަނީ އެއް މިލިއަން ފޮލޯވަރުން ލިބިފަ އެވެ.

މިހާތަނަށް އެންމެ ގިނަ ފޮލޯވަރުން ތިބި ހޮސްޕިޓަލިޓީ ބްރޭންޑަކީ ފޯ ސީޒަންސް ހޮޓެލްސް އެންޑް ރިސޯޓްސް އެވެ. އެއީ 1.1 މިލިއަން ފޮލޯވަރުންނެވެ.

ސޮނެވާގެ ފޮލޯވަރުން ޓޫރިޒަމުގައި ދުނިޔޭގެ އެންމެ މަޝްހޫރު ބްރޭންޑުތަކަށް ކަމަށްވާ މެރިއޮޓް އިންޓަނޭޝަނަލް އާއި ހިލްޓަން ގްރޫޕާއި އިންޓަ ކޮންޓިނެންޓަލް އާއި ކޮންރަޑާއި ފެއާމޮންޓް އާއި ރިޒް ކާލްޓަން އަށްވުރެ ވެސް ގިނަ އެވެ. މީގެ ތެރެއިން ގިނަ ބްރޭންޑުތަކުގެ ފޮލޯވަރުންގެ އަދަދު 500،000އަށް ވެސް ނާރަ އެވެ.

ސޮނެވާއިން ރާއްޖޭގައި ދެ ރިސޯޓު ހިންގަ އެވެ. އެއީ ސޮނެވާ ޖާނީ އާއި ސޮނެވާފުއްޓެވެ. މީގެ އިތުރުން ސޮނެވާ އެކުއާގެ ނަމުގައި އެ ރިސޯޓުގެ ޔޮޓެއް ވެސް ރާއްޖޭގައި އޮޕަރޭޓް ކުރެ އެވެ.

ރާއްޖޭގެ އިތުރުން އެ ބްރޭންޑުގެ ދަށުން ސޮނެވާ ކިރީގެ ނަމުގައި ތައިލެންޑުގައި ވެސް ރިސޯޓެއް ހިންގަ އެވެ.