ޓްރާންސްޕޯޓް އޮތޯރިޓީގެ މުވައްޒަފުންނާއި ހިދުމަތް ބަދަލުވާނީ މިނިސްޓްރީ އަށް

ޓްރާންސްޕޯޓް އޮތޯރިޓީ އުވައިލަން ރައްޔިތުންގެ މަޖިލީހުގެ ކޮމިޓީން އިއްޔެ ފާސްކުރުމާއެކު، އެ ތަނުގެ މުވައްޒަފުންނާއި ދެމުން އައި ހިދުމަތްތައް ދެން ބަދަލުވާނީ ޓްރާންސްޕޯޓް މިނިސްޓްރީއަށެވެ.

ހިދުމަތް ލަސްކަމުގެ ކަންބޮޑުވުންތަކާއި ގާނޫނީ ފުށުއެރުންތަކަށް ހައްލެއް ހޯދުމުގެ ގޮތުން ސަރުކާރުން ހުށަހަޅައިގެން މަޖިލީހުގެ ކޮމިޓީން އިއްޔެ ވަނީ ޓްރާންސްޕޯޓް އޮތޯރިޓީ އުވައިލަން ނިންމައިފަ އެވެ. މި ނިންމުމާ ގުޅޭ ރިޕޯޓް މަޖިލީހުގެ ތަޅުމުން ފާސްކުރުމާ އެކު ޓްރާންސްޕޯޓު އޮތޯރިޓީ އުވޭނެ އެވެ.

ޓްރާންސްޕޯޓް އޮތޯރިޓީ އުވައިލުމުގެ ބިލުގައިވާ ގޮތުން މުވައްޒަފުންނާއި މުދަލާއި ވަސީލަތްތައް ވެސް ޓްރާންސްޕޯޓް މިނިސްޓްރީގެ ދަށަށް ބަދަލުވާނެ އެވެ.

އެ މިނިސްޓްރީގެ ޚިދުމަތް ލަސްވުމުގެ ޝަކުވާތަކާއެކު، އެ ތަނުގައި ސިޔާސީ ކޯޅުން ބޮޑުވެ، މުވައްޒަފުންގެ މެދުގައި ބޮޑެތި ހިޔާލު ތަފާތުވުންތައް ވަނީ އުފެދިފަ އެވެ. މި ކަންކަން ހައްލުކުރަން މިނިސްޓްރީގެ އޮޑިޓެއް ވެސް ރައީސް އޮފީހުން ކުރިއަށް ގެންދިޔަ އެވެ.

އެ އޮފީހުން ބުނެފައިވާ ގޮތުގައި މިނިސްޓްރީގެ އޮނިގަނޑަށް ގެންނަ ބަދަލުތަކާ އެކު ހިދުމަތްތައް ހަލުވި ވާނެ އެވެ.

ލައިސަންސް ލިބުން ލަސްވުމާއި އުޅަނދުތައް ރަޖިސްޓަރީ ކުރުމާއި ކަނޑުދަތުރުގެ ހިދުމަތްތައް ލަސްވެ، ވިޔަފާރިތަކަށް ބުރޫއަރައި ޓްރާންސްޕޯޓް މިނިސްޓްރީއާ މެދު ރައްޔިތުން ނާއުއްމީދުވެ، މާޔޫސް ވެފައިވާ ކަމުގެ ޝަކުވާތަކާ ގުޅިގެން މީގެ ދެ ހަފުތާއެއްހާ ދުވަސް ކުރިން މިނިސްޓަރު އައިޝަތު ނަހުލާ މަޖިލީހުގެ ކޮމިޓީއަށް ހާޒިރުކުރި އެވެ.

އެ ބައްދަލުވުމުގައި މިނިސްޓަރު ވިދާޅުވީ އެ ތަނަށް ގިނަ ބަދަލުތަކެއް ގެނެސްފައިވާ ކަމަށާއި ހިދުމަތް ކުރިއަށް ވުރެން އަވަސްވާނެ ކަމަށެވެ.