10 ދުވަހުގެ ޓްރޭނިން ކޭމްޕަށް މާޒިޔާ ކެނދިކުޅުދުއަށް

ކުރިއަށް އޮތް ސީޒަނަށް ތައްޔާރުވުމަށް މާޒިޔާ އިން، ނ. ކެނދިކުޅުދޫގައި ކޭމްޕްކޮށްފި އެވެ.

މާޒިޔާއިން ބުނީ އެ ރަށުގައި 10 ދުވަހުގެ ކޭމްޕެއް ކުރިއަށް ގެންދާނެ ކަމަށެވެ. މިފަހަކަށް އައިސް މާޒިޔާއިން ދަނީ ސީޒަން ފެށުމުގެ ކުރިން ރަށްރަށުގައި ކޭމްޕް ކުރަމުންނެވެ. އެކަމަކު ކޮވިޑް-19 އާ ގުޅިގެން މިިދޔަ ސީޒަން ފެށުމުގެ ކުރިން އެއްވެސް ރަށަކަށް ނުދެވުނެވެ. ނަމަވެސް އޭއެފްސީ ކަޕަށް ތައްޔާރުވުމުގެ ގޮތުން މާޒިޔާ އިން ވަނީ ސައުދީ އަރަބިއާގައި ޖުލައި މަހު ކޭމްޕްކޮށްފަ އެވެ.

މާޒިޔާ އިން ވަނީ 2019 ގައި، އދ. މަހިބަދޫގައި ކޭމްޕްކޮށްފަ އެވެ. އާ ސީޒަނަށް މާޒިޔާ ތައްޔާރުވީ ބަދަލުތަކާ އެކު އެވެ. އެ ޓީމުގެ ކޯޗަކަށް ހަމަޖެއްސީ މުހައްމަދު ޝިޔާޒު (މޯހަން) އެވެ. އޭގެ ފަހުން ގައުމީ ޓީމުގެ ދެ ޑިފެންޑަރުން ކަމަށްވާ، ކެޕްޓަން އަކްރަމް އަބްދުލް ގަނީ އާއި ހައިޝަމް ހަސަން ސޮއިކުރުވި އެވެ. އަދި ނޭޕާލްގެ ގައުމީ ޓީމު ކީޕަރު ކިރަން ޝެމެޝޮން ވެސް ވަނީ މާޒިޔާ އަށް ސޮއިކޮށްފަ އެވެ.

އަންނަ މަހު ފަށާ އާ ސީޒަން ހުޅުވުމުގެ ގޮތުން ކުޅޭ ޗެރިޓީ ޝީލްޑް މެޗުގައި ލީގު ޗެމްޕިއަން ހައިސިއްޔަތުން މަޒިޔާ ވާދަކުރާނެ އެވެ. އަނެއްކޮޅުން ނުކުންނާނީ ލީގުގެ ދެވަނަ ހޯދި، ކްލަބު ވެލެންސިއާ އެވެ. އާ ސީޒަން ފަށާނީ އަންނަ މަހު 15 ގަ އެވެ.

މިދިޔަ ސީޒަންގެ ލީގުގެ ދެ ބުރު ކުޅުނު ފަހުން، ކޮވިޑާ ގުޅިގެން ސީޒަން އިތުރަށް ކުރިއަށް ގެންދެވޭނެ ގޮތެއް ނުވި އެވެ. ސީޒަން ނިންމާލީ ލީގުގެ އެއްވަނައިގައި މާޒިޔާ އޮތުމުން އެ ޓީމަކީ ޗެމްޕިއަން ޓީމު ކަމަށް ކަނޑައެޅުމަށް ފަހު އެވެ.

އަންނަ އަހަރުގެ އޭއެފްސީ ކަޕުގައި ގުރޫޕް ސްޓޭޖުން ރާއްޖެއިން ސީދާ ޖާގަ ލިބިފައި ވަނީ މާޒިޔާ އަށެވެ. ލީގުގެ ދެވަނަ ހޯދި ވެލެންސިއާ އަށް ޖެހޭނީ ކޮލިފައިން ކުޅޭށެވެ.