ދައުވާކުރުމުގެ ބާރު އޭސީސީއަށް ދޭން އެދިއްޖެ

އެންޓި ކޮރަޕްޝަން ކޮމިޝަން (އޭސީސީ)ން ތަހުގީގުކޮށް ނިންމާ މައްސަލަތަކުގައި ދައުވާކުރުމުގެ ބާރު އެ ކޮމިޝަނަށް ލިބިދޭނެ އިސްލާހެއް ހުށަހަޅައިދިނުމަށް އެ ކޮމިޝަނުން އިއްޔެ އެދިއްޖެ އެވެ.

ރައްޔިތުންގެ މަޖިލީހުގެ ބަޖެޓު ކޮމިޓީގައި ކޮމިޝަނުގެ މައްސަލަތައް ލަސްވުމާއި ތަހުގީގުކުރާ މައްސަލަތައް ކޮޅެއްގައި ނުޖެހޭތީ މެމްބަރުން ފާޅުކުރި ކަންބޮޑުވުންތަކަށް އޭސީސީން އެއް ކަމަކަށް އެދުނީ އިސްލާހެއް ހުށަހަޅައި ދިނުމަށެވެ. ދެން އެދުނީ މުވައްޒަފުންގެ އަދަދު އިތުރުކޮށްދިނުމަށެވެ.

ކޮމިޝަންގެ މެމްބަރު އިބްރާހިމް ޝަކީލް ވިދާޅުވީ "އަޅުގަނޑުމެން އެންމެ ބޭނުންވާނެ އިސްލާހަކަށް ވާނީ ޕްރޮސެކިއުޝަންގެ ބާރު އެންޓި ކޮރަޕްޝަން ކޮމިޝަނަށް ލިބިދިނިން" ކަމަށެވެ.

"އަޅުގަނޑަށް އެނގޭ މިހެން ދަންނަވާއިރު ވެސް އެހާ ފަސޭހަ ކަމަކަށް ނުވެދާނެ ކަން. އެކަމަކު އުއްމީދަކީ، ކޮންމެވެސް ދުވަހަކުން ތަހުގީގު ނިންމާފައި ދައުވާކުރުމުގެ ބާރު ލިބުން،" ޝަކީލް ވިދާޅުވި އެވެ.

މި ވާހަކަ އޭނާ ހުށަހެޅުއްވީ އޭސީސީން ތަހުގީގުކޮށް ދައުވާކޮށްދޭން ޕްރޮސިކިއުޓާ ޖެނެރަލްގެ އޮފީހަށް ފޮނުވާ މައްސަލަތައް، ދައުވާ ނުކޮށް އަނބުރާ ފޮނުވާލާތީ އެ ކަންބޮޑުވުން ފާޅުކުރެއްވުމަށް ފަހު އެވެ.

އޭނާ ވިދާޅުވި ގޮތުގައި ކޮމިޝަނުން ފޮނުވާ މައްސަލަތަކުގައި "އުންސުރު ނުވަތަ ފަންސުރު" ހަމަނުވާ ކަމަށް ޕީޖީ އޮފީހުން ކަންބޮޑުވުންފާޅުކޮށްފައި އޮންނަ ތަން ނޫސްތަކުން ފެނެ އެވެ. ފޮނުވާ މައްސަލަތަކާ ގުޅޭ ގޮތުން ޕީޖީގެ ނިންމެވުންތަކާ ގުޅޭ ގޮތުން އެއްޗެއް ދަންނަވަން ބޭނުން ނުވާ ކަމަށާއި އެކަމަކު ދައުވާ ނުކުރެވޭ ސަބަބު މަޖިލީހުން ބަލަން ޖެހޭ ކަމަށް ދެކިވަޑައިގަންނަވާ ކަމަށް ޝަކީލް ވިދާޅުވި އެވެ.

ޕްރޮސެކިއުޓަ ޖެނެރަލް ހުސެއިން ޝަމީމް މި ހަފުތާގައި ވިދާޅުވެފައިވާ ގޮތުގައި އޭސީސީން ފޮނުވި އަށް މައްސަލައެއްގެ ތެރެއިން އެ އޮފީހުގައި މިހާރު އޮތީ ތިން މައްސަލަ އެވެ. ބާކީ ހުރި މައްސަލަތައް ފޮނުވާލަން ޖެހުނީ އިތުރަށް ތަހުގީގުކުރަން ނުވަތަ ދައުވާ ކުރިއަށް ނުގެންދެވޭނެތީ އެވެ.

ދައުވާކުރުމުގެ ބާރު ލިބިދޭ އިސްލާހަކަށް އޭސީސީން އެދުނުއިރު ބަޖެޓް ކޮމިޓީގެ މެމްބަރުން ވަނީ އޭސީސީން މައްސަލަތައް އެކަށީގެންވާ ސްޕީޑުގައި ނުބެލޭތީ ކަންބޮޑުވުންފާޅުކުރައްވައިފަ އެވެ. އަހަރަކަށް ކަނޑައަޅާ ބަޖެޓާ އެއްވަރަށް އޭސީސީގެ މެމްބަރުންނަށް މަސައްކަތް ކުރެއްވޭތޯ ވެސް ކޮމިޓީގައި ސުވާލު އުފެއްދި އެވެ.

ބަޖެޓު ކޮމިޓީގެ މެމްބަރުންގެ ނުރުހުން އޭސީސީއަށް އަމާޒުވިއިރު ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން ވަނީ އޭސީސީގެ މެމްބަރުންގެ މަސައްކަތް ވަޒަންކޮށް މަގާމުން ވަކިކުރުމުގެ މަރުހަލާ ފެށުމަށް ނިންމައިފަ އެވެ.