މުދަލުގެ ޒަކާތް ނުދައްކައިފި ނަމަ އޮތީ ގަދަފަދަ އަޒާބު!

އަހަރެމެންގެ ތެރެއިން ބައެއް މީހުންނަށް ހީވެފައި އޮންނަނީ ފިތުރު ޒަކާތް ދެއްކީމާ އެކަން އެ ހިސާބުން ނިމުނީމާ ކަމަށެވެ. ފިތުރު ޒަކާތާއި މުދަލުގެ ޒަކާތް ބައެއް މީހުންނަށް އޮޅޭތީ ވެސް މި މައްސަލަ ދިމާވާ ކަމަށް ޝައިހު އާޒިމް ޚާލިދު ވިދާޅުވި އެވެ.

ފިތުރު ޒަކާތަކީ އިސްލާމްދީނުގައި ކަނޑައަޅާފައިވާ ފަރުޟެއް ކަމަށް ވިޔަސް އެއީ ދީނުގެ ރުކުނެއް ނޫނެވެ. ނަމަވެސް މުދަލުގެ ޒަކާތަކީ އިސްލާމްދީނުގެ ރުކުންތަކުގެ ތެރޭގައި ހިމޭނެ ކަމެކެވެ.

އިންވެސްޓް ކޮށްފައި ހުންނަ މުދާތަކުގެ ފައިދާއިން ޒަކާތް އަދާކުރުމަކީ ކުރަންޖެހޭ ކަމެކެވެ. ޝައިހު ވިދާޅުވިގޮތުގައި، ޒަކާތް އަދާނުކޮށްފި ނަމަ މި ދުނިޔޭގައި އެއްކުރި މުދާތައް ވާނީ ގިޔާމަތް ދުވަހުގައި ވަރަށް ބޮޑު އަޒާބަކަށް މީހާ ހުށަހެޅޭނެ ސަބަބަކަށެވެ. އެ ކަމުގެ ވޭންދެނިވި އަޒާބުގެ ވާހަކަ ކީރިތި ގުރުއާނުން ދަލީލު ދައްކަވަމުން ޝައިހު އާޒިމް ވިދާޅުވި އެވެ.