ގުރުއާން ކޯސްތަކުގައި ހުންނަ ޖެހޭ "މިނިމަން ސްޓޭންޑަޑެއް" ކަނޑައަޅައިފި

ކޮލެޖް/ޔުނިވާސިޓީތަކުގައި ކިޔަވައިދޭ ގުރުއާނުގެ އިލްމުގެ ދާއިރާގެ ކޯސްތަކުގައި ހުންނަން ޖެހޭ މިނިމަން ސްޓޭންޑަޑެއް މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ) އިން ކަނޑައަޅައިފި އެވެ.

އެމްކިއުއޭގެ ސީއީއޯ ޑރ. އަބްދުލް ހަންނާނު ވަހީދު ސޮއިކުރައްވައި، މިދިޔަ ހަފުތާގައި ނެރުނު ސާކިއުލާއެއްގައި ބުނެފައި ވަނީ މަތީ ތައުލީމުގެ ފެންވަރު ކަށަވަރުކުރުމުގައި ކުރާ އެންމެ މުހިންމު އެއް މަސައްކަތަކީ ރާއްޖޭގެ މަތީ ތައުލީމު ދޭ ތަންތަނުން ހިންގާ ކޯސްތަކުގެ ފެންވަރު ރަނގަޅު ކުރުން ކަމަށް ވާއިރު، އެ އޮތޯރީޓިން ހިންގުމުގެ ހުއްދަ ދޭ ގުރުއާނުގެ އިލްމުގެ ދާއިރާގެ ކޯސްތަކުގައި ހުންނަން ޖެހޭ "މިނިމަން ސްޓޭންޑަޑެއް" މިހާރު ކަނޑައަޅާފައިވާ ކަމަށެވެ.

އެ ނިންމުން ފާސްކޮށްފައި ވަނީ އެ އޮތޯރިޓީގެ އެންމެ ފަހުން ބޭއްވި އެޑްވައިޒަރީ ބޯޑުގެ ބައްދަލުވުމުގަ އެވެ.

މިނިމަމް ސްޓޭންޑަޑެއް ކަނޑައެޅި ސަބަބުތައް

1. އާންމުންނާއި ދާއިރާގެ މާހިރުންނާއި ސަރުކާރުގެ ކަމާބެހޭ އިދާރާތަކާއި ދަރިވަރުންގެ މެދުގައި ފެންވަރާ މެދު އޮންނަ ކަންބޮޑުވުމާއި ހިތްހަމަނުޖެހުން ކުޑަކުރުން.

2. މަތީ ތައުލީމު ދޭ މަރުކަޒުތަކުގައި ކިޔަވައިދޭ މުގައްރަރުތައް އެއްގޮތް ކުރުން.

3. މަތީ ތައުލީމު ދޭ މަރުކަޒުތަކުގައި ކިޔަވައިދޭ މުއްދަތު އެއްވަރު ކުރުން.

4. ފެންވަރު ރަނގަޅު ޓީޗަރުން އުފެއްދުން.

ގުރުއާނުގެ ދާއިރާގެ ކޮލިފިކޭޝަންތައް ކަމުގައި ބަލާނީ ޤާރީ/ޤިރާއަތު ކޯހާއި ގުރުއާން ޓީޗިން ކޯހާއި އަދި އިމާމް ކޯހެވެ. އަދި މި މިނިމަން ސްޓޭންޑަޑް ކަނޑައަޅާފައި ވަނީ ހަ ބަޔަކަށެވެ. އެއީ ކޯ-މޮޑިއުލްތަކާއި ކޯ-މޮޑިއުލްތަކުގެ މުގައްރަރާއި މުއްދާތައި ކްރެޑިޓް ޕޮއިންޓް ދޭނެ އަދަދާއި ޓީޗަރުންގެ ޝަރުތުތަކާއި އަދި ޕްރޮގްރާމްތަކަށް ވަދެވޭނެ ޝަރުތުތަކާ އެކު އެވެ.

އެމްކިއުއޭ އިން ބުނީ ގުރުއާނުގެ އިލްމުގެ ދާއިރާއިން ދެން އަލަށް ފަށާ ކޯސްތަކުގެ ބެޗުތަކާއި އަލަށް ހުއްދަ ހޯދަން އެ އޮތޯރިޓީ އަށް ހުށަހަޅާ ކޯސްތައް ހުންނަން ވާނީ މި ސްޓޭންޑަޑަށް ފެތޭ ގޮތަށް ކަމަށެވެ. ނަމަވެސް، މިހާރު ފަށައިގެން ކުރިއަށް ގެންދާ ބެޗުތައް ކުރިން ވެސް އޮތް ގޮތަށް ކުރިއަށް ގެންދެވޭނެ ކަމަށެވެ. އެކަމަކު އެ ބެޗުތަކަށް ވެސް މި ސްޓޭންޑާޑަށް ފައްތައިގެން ކޯސް ކުރިއަށް ގެންދިއުމުގެ އިހުތިޔާރު ވަނީ ދީފަ އެވެ.